ନୂଆଦିଲ୍ଲୀ: ପ୍ୟାରିସ ଅଲିମ୍ପିକ୍ସ 2024ରେ ଭିନେଶ ଫୋଗତ ମେଡାଲ ଆଣିବେ ବୋଲି ସାରା ଦେଶ ଅପେକ୍ଷା କରିଥିଲା । ହେଲେ ଭିନେଶଙ୍କୁ ଅଯୋଗ୍ୟ ଘୋ,ଣା କରି ପ୍ୟାରିସ ଅଲିମ୍ପିକ୍ସରୁ ବିଦା କରିଦିଆଯାଇଛି । ଫଳରେ ମେଡାଲ ଆଶାରେ ଥିବା 140 କୋଟି ଭାରତୀୟଙ୍କୁ ଲାଗିଛି ଜୋରଦାର ଝଟ୍କା । ମଙ୍ଗଳବାର କ୍ବାର୍ଟର ଏବଂ ସେମିଫାଇନାଲରେ ଚମତ୍କାର ବିଜୟ ପରେ ଫୋଗତ ଫାଇନାଲରେ ପ୍ରବେଶ କରି ଇତିହାସ ସୃଷ୍ଟି କରିଥିଲେ । ବର୍ତ୍ତମାନ ସେ ଫାଇନାଲ ପୂର୍ବରୁ ଅଲିମ୍ପିକ୍ସରୁ ଅଯୋଗ୍ୟ ହୋଇଛନ୍ତି ଏବଂ ସେ ଆଉ ରୌପ୍ୟ ପଦକ ପାଇବାକୁ ମଧ୍ୟ ଯୋଗ୍ୟ ନୁହଁନ୍ତି । ଏଭଳି ହାର୍ଟବ୍ରେକ ପରେ ପ୍ରଧାନମନ୍ତ୍ରୀ ମୋଦି ନିଜ ଏକ୍ସ ହ୍ୟାଣ୍ଡେଲରେ ବିନେଶଙ୍କ ପାଇଁ ଲେଖିଛନ୍ତି ଏକ ଭାବୁକ ବାର୍ତ୍ତା ।
ଭାବୁକ ପୋଷ୍ଟ କଲେ ପ୍ରଧାନମନ୍ତ୍ରୀ :-
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ସୋସିଆଲ ମିଡିଆ ଆକାଉଣ୍ଟ 'X'ରେ ପୋଷ୍ଟ କରି ଲେଖିଛନ୍ତି, "ଭିନେଶ, ତୁମେ ଚମ୍ପିଆନମାନଙ୍କ ମଧ୍ୟରେ ବି ଚମ୍ପିଆନ । ତୁମେ ଭାରତର ଗର୍ବ ଏବଂ ପ୍ରତ୍ୟେକ ଭାରତୀୟଙ୍କ ପାଇଁ ପ୍ରେରଣା । ଆଜିର ବିଫଳତା କଷ୍ଟଦାୟକ । ମୁଁ ଯେଉଁ ନିରାଶା ଅନୁଭବ କରୁଛି ତାହା ଶବ୍ଦରେ କହିପାରିବିନି । ଏଥିସହ, ମୁଁ ଜାଣେ ତୁମେ ସ୍ଥିରତାର ଉଦାହରଣ । ଆହ୍ବାନର ସମ୍ମୁଖୀନ ହେବା ସର୍ବଦା ତୁମର ସ୍ବଭାବ । ଅଧିକ ଶକ୍ତିଶାଳୀ ହୁଅ । ଆମେ ସମସ୍ତେ ତୁମ ପାଇଁ ପ୍ରାର୍ଥନା କରୁଛୁ ।"