ହାଇଦ୍ରାବାଦ: ପ୍ୟାରିସ ଅଲିମ୍ପିକ୍ସ 2024ରେ ଭାରତର ପଦକ ଆଶା ନେଇ ଯାଇଥିବା ବକ୍ସର ନିଶାନ୍ତ ଦେବ କ୍ବାର୍ଟର ଫାଇନାଲରୁ ବାଦ ପଡିଛନ୍ତି । ଶନିବାର ରାତିରେ ମେକ୍ସିକୋ ବକ୍ସରଙ୍କ ବିପକ୍ଷରେ ପରାଜୟ ପରେ ଅଲିମ୍ପିକ୍ସ ଅଭିଯାନ ଶେଷ କରିଛନ୍ତି ନିଶାନ୍ତ ଦେବ । ହେଲେ ଏହି ପରାଜୟକୁ ଗ୍ରହଣ କରିପାରିନାହାନ୍ତି ଦେଶବାସୀ । ଅନେକ ଭାରତୀୟ ସୋସିଆଲ ମିଡିଆରେ ନିଶାନ୍ତଙ୍କ ପ୍ରଦର୍ଶନକୁ ପ୍ରଶଂସା କରିବା ସହିତ ବିଚାରପତିଙ୍କ ନିଷ୍ପତ୍ତି ଉପରେ ପ୍ରଶ୍ନ ଉଠାଇଛନ୍ତି । ଏପରିକି ପୂର୍ବତନ ବକ୍ସର ବିଜେନ୍ଦର ସିଂହ ଏବଂ ଅଭିନେତା ରଣଦୀପ ହୁଡ୍ଡା ମଧ୍ୟ ମ୍ୟାଚରେ ସ୍କୋରିଂ ସିଷ୍ଟମ ଉପରେ ପ୍ରଶ୍ନ ଉଠାଇଛନ୍ତି ।
ଏହି ମ୍ୟାଚରେ ସ୍ପଷ୍ଟ ଭାବରେ ଦେଖାଯାଉଥିଲା ଯେ ନିଶାନ୍ତ ପ୍ରଥମ ଦୁଇ ରାଉଣ୍ଡରେ ଅଧିକ ପ୍ରଭାବଶାଳୀ ଥିଲେ । 23 ବର୍ଷୀୟ ନିଶାନ୍ତ ପ୍ରଥମ ରାଉଣ୍ଡରେ ଜବରଦସ୍ତ ପ୍ରଦର୍ଶନ କରି ଜିତିଥିଲେ । କିନ୍ତୁ ପରବର୍ତ୍ତୀ ଦୁଇ ରାଉଣ୍ଡରେ ବିଚାରପତିମାନେ ମେକ୍ସିକୋ ବକ୍ସରଙ୍କୁ ବିଜେତା ଘୋଷଣା କରିଥିଲେ । ଏହା ଦେଖି ଖୋଦ ନିଶାନ୍ତ ମଧ୍ୟ ଆଶ୍ଚର୍ଯ୍ୟ ହୋଇଗଲେ । କାରଣ ସେ ତାଙ୍କ ପ୍ରଦର୍ଶନରୁ ବିଜୟ ଆଶା କରିଥିଲେ । ସେ ବିଚାରପତିଙ୍କ ଫଳାଫଳ ଶୁଣି ଆଶ୍ଚର୍ଯ୍ୟ ହୋଇଯାଇଥିଲେ ।
2008 ଅଲିମ୍ପିକ୍ ବ୍ରୋଞ୍ଜ ପଦକ ବିଜେତା ବିଜେନ୍ଦର ନିଶାନ୍ତଙ୍କ ଉତ୍କୃଷ୍ଟ ପ୍ରଦର୍ଶନକୁ ପ୍ରଶଂସା କରିବା ସହିତ ମ୍ୟାଚର ସ୍କୋରିଂ ସିଷ୍ଟମ ଉପରେ ପ୍ରଶ୍ନ ଉଠାଇଛନ୍ତି । ସେ ନିଜ ଏକ୍ସ ହ୍ୟାଣ୍ଡେଲରେ ଲେଖିଛନ୍ତି, 'ସ୍କୋରିଂ ସିଷ୍ଟମ୍ କ’ଣ ମୁଁ ଜାଣେନାହିଁ, କିନ୍ତୁ ମୁଁ ଭାବୁଛି ଏହା ଏକ କଡ଼ା ମ୍ୟାଚ୍ ଥିଲା... ସେ (ନିଶାନ୍ତ) ବହୁତ ଭଲ ଖେଳିଥିଲେ... କିଛି କଥା ନାହିଁ ଭାଇ ନିଶାନ୍ତ ଦେବ...।' ଅନ୍ୟପଟେ ଅଭିନେତା ରଣଦୀପ ହୁଡ୍ଡାଙ୍କ କହିବା କଥା ହେଉଛି, ନିଶାନ୍ତଙ୍କୁ ହରାଇ ତାଙ୍କଠାରୁ ଅଲିମ୍ପିକ୍ସ ପଦକ ଛଡ଼ାଇ ନିଆଯାଇଛି । ସେ ନିଜ ଏକ୍ସ ହ୍ୟାଣ୍ଡେଲରେ ଲେଖିଛନ୍ତି, 'ନିଶାନ୍ତ ଜିତି ସାରିଥିଲେ, ଏ କି ପ୍ରକାର ସ୍କୋରିଂ ? ପଦକ ଛଡ଼ାଇ ନିଆଗଲା କିନ୍ତୁ ହୃଦୟ ଜିତିଗଲେ ନିଶାନ୍ତ । ଦୁଃଖର ବିଷୟ, ତଥାପି ବହୁତ କିଛି କରିବାକୁ ବାକି ଅଛି ଭାଇ...।'