ହାଇଦ୍ରାବାଦ: ରୋହିତ ଶର୍ମା ଅଧିନାୟକତ୍ୱରେ ଟିମ ଇଣ୍ଡିଆର ପ୍ରଦର୍ଶନ ୨୦୨୪ରେ ମିଶ୍ରିତ ରହିଥିବା ଦେଖିବାକୁ ମିଳିଛି । ଭାରତୀୟ କ୍ରିକେଟ ଟିମ ଓ୍ବେଷ୍ଟଇଣ୍ଡିଜ ଓ ୟୁଏସଏରେ ଆୟୋଜିତ ଟି-୨୦ ବିଶ୍ୱକପ ଜିତି ଇତିହାସ ରଚିଛି, କିନ୍ତୁ ଚଳିତବର୍ଷ ଟିମ ଇଣ୍ଡିଆକୁ ଅପ୍ରତ୍ୟାଶିତ ଅସଫଳର ବି ସାମ୍ନା କରିବାକୁ ପଡିଛି ।
- ଗୋଟିଏ ବି ଦିନିକିଆ ସିରିଜ ଜିତିନି ଭାରତ
ଏହାମଧ୍ୟରୁ ସବୁଠୁ ଚକିତ କଲା ଭଳି ଫଳାଫଳ ରହିଛି ୨୦୨୪ ରେ ଟିମ୍ ଇଣ୍ଡିଆ ଗୋଟିଏ ବି ODI ସିରିଜ ଜିତି ପାରିନାହିଁ । ଏଭଳି ଘଟଣା ଶେଷଥର ପାଇଁ ୧୯୭୯ରେ ଦେଖିବାକୁ ମିଳିଥିଲା । ୧୯୭୪ରୁ ଭାରତ ଦିନିକିଆ ମ୍ୟାଚ ଖେଳିବା ଆରମ୍ଭ କରିଥିବା ବେଳେ ଏଭଳି ଘଟଣା ଚତୁର୍ଥ ଥର ପାଇଁ ଦେଖିବାକୁ ମିଳିଛି, ଦୀର୍ଘ ୪୫ ବର୍ଷ ପରେ ଭାରତୀୟ ଟିମ ଚଳିତ ବର୍ଷ ଗୋଟିଏ ବି ଦିନିକିଆ ଅନ୍ତର୍ଜାତୀୟ ମ୍ୟାଚରେ ଜିତ ହାସଲ କରିପାରିନାହିଁ ।
୨୦୨୪ରେ ଦିନିକିଆ ମ୍ୟାଚରେ ଭାରତର ପ୍ରଦର୍ଶନ ସେତେଟା ଆଶାନ୍ବିତ ନଥିଲା । ରୋହିତଙ୍କ ଅଧିନାୟକତ୍ୱରେ ଟିମ ଅଗଷ୍ଟ ମାସରେ ଶ୍ରୀଲଙ୍କାରେ ୩ଟି ମ୍ୟାଚ ବିଶିଷ୍ଟ ଓ୍ବାନଡେ ସିରିଜ ଖେଳିଥିଲା । କେବଳ ଗୋଟିଏ ମ୍ୟାଚ ଟାଇ ରହିଥିବା ବେଳେ ଆଉ ୨ ଟି ମ୍ୟାଚରେ ପରାଜୟ ହୋଇ ୨-୦ରେ ସିରିଜ ହରାଇଥିଲା ଟିମ୍ ଇଣ୍ଡିଆ । ୧୯୯୭ ପରେ ପ୍ରଥମ ଥର ପାଇଁ ଶ୍ରୀଲଙ୍କା ଭାରତ ବିପକ୍ଷରେ ଦ୍ୱିପାକ୍ଷିକ ଦିନିିକିଆ ସିରିଜରେ ବିଜୟ ହାସଲ କରିଥିଲା ।
- ଇଣ୍ଡିଆ ଟିମ ପାଇଁ ଚ୍ୟାଲେଞ୍ଜିଂ ଥିଲା ୨୦୨୪
ଅଧିନାୟକ ଭାବେ ରୋହିତ ଶର୍ମାଙ୍କ ପାଇଁ ଚଳିତ ବର୍ଷ ବେଶ ଆହ୍ବାନଭରା ରହିଥିଲା । ଏହି ବର୍ଷ ଟିମ୍ ନାଁରେ ୨ଟି ଅଲୋଡା ରେକର୍ଡ ଯୋଡି ହୋଇଛି । ୨୦୨୪ ରେ ଭାରତ ନା କେବଳ ଗୋଟିଏ ବି ଦିନିକିଆ ସିରିଜ ଜିତିବାରେ ବିଫଳ ରହିଲା, ଆଉ ମଧ୍ୟ ୯୨ ବର୍ଷ ପରେ ନ୍ୟୁଜିଲାଣ୍ଡ ବିପକ୍ଷରେ ଘରୋଇ ଟେଷ୍ଟ ସିରିଜରେ ଐତିହାସିକ କ୍ଲିନସ୍ବିପର ସାମ୍ନା କରିବାକୁ ପଡିଥିଲା । ଯେଉଁଥିରେ ମେଜବାନରେ ଆୟୋଜିତ ଘରୋଇ ସିରିଜ ଜିତିବାର ଲକ୍ଷ୍ୟରେ ପାଣି ପଶିଯାଇଥିଲା । ୨-୦ରେ ହାରି ଭାରତ ପ୍ରଥମ ଥର ନ୍ୟୁଜିଲାଣ୍ଡକୁ ଟେଷ୍ଟ ସିରିଜରେ କ୍ଲିନ୍ ସ୍ବିପ କରିବାର ମୌକା ଦେଇଥିଲା ।
ଅନ୍ୟପଟେ ଆୟରଲ୍ୟାଣ୍ଡ ଓ ଜିମ୍ବାଓ୍ବେ ୨୦୨୪ ରେ ସୀମିତ ଦିନିକିଆ ସିରିଜ ଖେଳି ମଧ୍ୟ ଅତିକମରେ ଗୋଟିଏ ଲେଖାଁଏ ବିଜୟ ହାସଲ କରିବାରେ ସଫଳ ହୋଇଥିଲେ । ଆୟରଲ୍ୟାଣ୍ଡ ୫ଟି ଦିନିକିଆ ଖେଳିଥିବା ବେଳେ ସେଥିରେ ଗୋଟିଏ ସିରିଜ ଜିତିଥିଲା । ସେହିପରି ଜିମ୍ବାଓ୍ବେ ୬ଟି ମ୍ୟାଚରୁ ଗୋଟିଏରେ ବିଜୟୀ ହୋଇଥିଲା । ଚଳିତ ବର୍ଷ ଦକ୍ଷିଣ ଆଫ୍ରିକାର ପ୍ରଦର୍ଶନ ବେଶ ଭଲ ରହିଥିଲା । ଦକ୍ଷିଣ-ଆଫ୍ରିକା ୬ଟି ଓ୍ବାନ-ଡେ ଖେଳିଥିବା ବେଳେ ୩ଟିରେ ବିଜୟୀ ହୋଇଥିଲା ।