ହାଇଦ୍ରାବାଦ: ପ୍ରଥମ ଟେଷ୍ଟ ନଖେଳି ମଧ୍ୟ ଚମକିଲେ ବିରାଟ କୋହଲି । ଇଂଲଣ୍ଡ ପାଇଁ ହିରୋ ସାଜିଥିବା ଓଲି ପୋପ୍ ଟେଷ୍ଟ ରାଙ୍କିଙ୍ଗ୍ରେ ମାରିଲେ ଲମ୍ବ ଡିଆଁ । ଆଜି ଆଇସିସି ଦ୍ବାରା ଏହାର ସଦ୍ୟତମ ଟେଷ୍ଟ ରାଙ୍କିଙ୍ଗ୍ ପ୍ରକାଶ ପାଇଛି । ତେବେ ଏଥିରେ ଟେଷ୍ଟ ଓ ଦିନିକିଆ ମାନ୍ୟତାରେ ବିରାଟ କୋହଲି ଏକମାତ୍ର ଭାରତୀୟ ଭାବେ ଉଭୟ ଫର୍ମାଟ୍ରେ ଟପ୍ ୧୦ରେ ସ୍ଥାନ ପାଇଛନ୍ତି । ସେପଟେ ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ ହାରିବା ପରେ ଶୀର୍ଷକୁ ଉନ୍ନୀତ ହୋଇପାରିନାହିଁ ଟିମ୍ ଇଣ୍ଡିଆ । ଆଇସିସି ଟିମ୍ ମାନ୍ୟତାରେ ୧୧୭ ପଏଣ୍ଟ ସହ ଦ୍ବିତୀୟରେ ରହିଛି ଭାରତ । ୧୧୭ ପଏଣ୍ଟ ଅଷ୍ଟ୍ରେଲିଆ ଏବେ ବି ପ୍ରଥମ ସ୍ଥାନରେ ରହିଛି ।
ଟେଷ୍ଟ ମାନ୍ୟତା:
ବ୍ୟାଟର- ବୁଧବାର ପ୍ରକାଶ ପାଇଥିବା ଆଇସିସି ଟେଷ୍ଟ ବ୍ୟାଟିଂ ମାନ୍ୟତାରେ ନ୍ୟୁଜିଲାଣ୍ଡ ଅଧିନାୟକ କେନ୍ ୱିଲିୟମସନ୍ ୮୬୪ ପଏଣ୍ଟ ସହ ପ୍ରଥମ ସ୍ଥାନରେ ରହିଛନ୍ତି । ତାଙ୍କ ପଛକୁ ଇଂଲଣ୍ଡର ଜୋ ରୁଟ ୮୩୨ ପଏଣ୍ଟ ସହ ୨ୟରେ ରହିଥିବା ବେଳେ ୮୧୮ ପଏଣ୍ଟ ପାଇ ୩ୟରେ ରହିଛନ୍ତି ଷ୍ଟିଭ ସ୍ମିଥ । ସେହିଭଳି ଡାରିଲ ମିଚେଲ୍ (୭୮୬) ୪ର୍ଥ ଓ ବାବର ଆଜମ (୭୬୮) ୫ମରେ ରହିଛନ୍ତି । ତେବେ ଟେଷ୍ଟ ପୁରୁଷ ବ୍ୟାଟର ମାନ୍ୟତାରେ ଏକମାତ୍ର ଭାରତୀୟ ବ୍ୟାଟର ବିରାଟ କୋହଲି ଶୀର୍ଷ ୧୦ରେ ସ୍ଥାନ ପାଇବାରେ ସକ୍ଷମ ହୋଇଛନ୍ତି । ସେ ୭୬୭ ପଏଣ୍ଟ ସହ ସିଧାସଳଖ ୬ଷ୍ଠ ସ୍ଥାନକୁ ଉନ୍ନୀତ ହୋଇଛନ୍ତି । ବିରାଟ ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ ନଖେଳି ମଧ୍ୟ ଆଇସିସି ମାନ୍ୟତାରେ ଉନ୍ନତି ଆଣିବାରେ ସଫଳ ହୋଇଛନ୍ତି । ତେବେ ଏହି ତାଲିକାର ଦ୍ବାଦଶ ସ୍ଥାନରେ ରୋହିତ ଶର୍ମା ଓ ଦୀର୍ଘ ୧ ବର୍ଷରୁ ଊର୍ଦ୍ଧ୍ବ ସମୟ ଧରି ଦଳରୁ ବାହାରେ ଥିବା ଋଷଭ ପନ୍ତ ଏବେ ମଧ୍ୟ ୧୩ ତମ ସ୍ଥାନରେ ରହିଛନ୍ତି ।
ଅନ୍ୟପଟେ ଭାରତ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ରେ ଇଂଲଣ୍ଡ ପାଇଁ ହିରୋ ସାଜିଥିବା ଓଲି ପୋପ୍ ନିଜ ଟେଷ୍ଟ କ୍ୟାରିୟରର ଶ୍ରେଷ୍ଠ ମାନ୍ୟତା ପାଇଛନ୍ତି । ରାଜୀବ ଗାନ୍ଧୀ ଷ୍ଟାଡିୟମରେ ତାଙ୍କର ୧୯୬ ରନର ପାଳି ପାଇଁ ସେ ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ । ଏଥର ଆଇସିସି ମାନ୍ୟତାରେ ୩୫ତମ ସ୍ଥାନରୁ ଲମ୍ଫ ମାରି ସିଧାସଳଖ ୧୫ତମ ସ୍ଥାନରେ ପହଞ୍ଚିଛନ୍ତି ପୋପ୍ ।
ବୋଲର- ଆଇସିସି ଟେଷ୍ଟ ମାନ୍ୟତାରେ ଟପ୍ ୧୦ରେ ୩ ଭାରତୀୟ ବୋଲର ସ୍ଥାନ ପାଇଛନ୍ତି । ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ବିନ ୮୫୩ ପଏଣ୍ଟ ସହ ଶୀର୍ଷରେ ରହିଛନ୍ତି । ଯଶପ୍ରୀତ ବୁମ୍ରା ୮୨୫ ପଏଣ୍ଟ ପାଇ ୪ର୍ଥରେ ପହଞ୍ଚିଥିବା ବେଳେ ରବୀନ୍ଦ୍ର ଜାଡେଜା (୭୫୪) ୬ଷ୍ଠ ସ୍ଥାନରେ ରହିଛନ୍ତି । ଅନ୍ୟ ଭାରତୀୟଙ୍କ ମଧ୍ୟରେ ମହମ୍ମଦ ସିରାଜ ୧୯ ଓ ମହମ୍ମଦ ଶାମି ୨୦ତମ ସ୍ଥାନରେ ରହିଛନ୍ତି ।
ଅଲରାଉଣ୍ଡର- ଆଇସିସି ଅଲରାଉଣ୍ଡର ମାନ୍ୟତାରେ ମଧ୍ୟ ଭାରତୀୟ ଖେଳାଳୀଙ୍କ ଦବଦବା ଦେଖିବାକୁ ମିଳିଛି । ରବୀନ୍ଦ୍ର ଜାଡେଜା (୪୨୫) ଓ ରବିଚନ୍ଦ୍ର ଅଶ୍ବିନ (୩୨୮) ଯଥାକ୍ରମେ ପ୍ରଥମ ଓ ଦ୍ବିତୀୟ ସ୍ଥାନରେ ରହିଛନ୍ତି । ସେହିଭଳି ୨୯୦ ପଏଣ୍ଟ ସହ ଅକ୍ଷର ପଟେଲ ଗୋଟିଏ ସ୍ଥାନ ଖସି ୬ଷ୍ଠରେ ରହିଛନ୍ତି ।
ଏହା ମଧ୍ୟ ପଢ଼ନ୍ତୁ...ଭାରତ-ଇଂଲଣ୍ଡ ଟେଷ୍ଟ ମ୍ୟାଚ: ଆଚରଣ ସଂହିତା ଉଲ୍ଲଂଘନ କଲେ ବୁମରା
ନଜର ପକାନ୍ତୁ ଦିନିକିଆ ଓ ଟି୨୦ରେ ରହିଥିବା ଭାରତୀୟ ଖେଳାଳିଙ୍କ ରାଙ୍କିଂ ଉପରେ...