ନୂଆଦିଲ୍ଲୀ : ପ୍ୟାରିସ ଅଲିମ୍ପିକ୍ସ 2024ରେ ଚମତ୍କାର ପ୍ରଦର୍ଶନ ସତ୍ତ୍ବେ ଫାଇନାଲରୁ ଅଯୋଗ୍ୟ ହୋଇଥିବା ଭାରତୀୟ ରେସଲର ଭିନେଶ ଫୋଗାଟ ଆଜି ଭାରତ ଫେରିଛନ୍ତି । ସ୍ବଦେଶ ଫେରିବା ପରେ ଆଜି ତାଙ୍କୁ ଦିଲ୍ଲୀରେ ଭବ୍ୟ ସ୍ବାଗତ କରାଯାଇଥିଲା । ତାଙ୍କ ସାଥୀ ଭାରତୀୟ ରେସଲର ବଜରଙ୍ଗ ପୁନିଆ ଏବଂ ସାକ୍ଷୀ ମଲିକ ତାଙ୍କୁ ସ୍ବାଗତ କରିବାକୁ ଦିଲ୍ଲୀ ବିମାନବନ୍ଦରରେ ପହଞ୍ଚିଥିଲେ । ଭିନେଶ ଦୁହିଁଙ୍କୁ ଆଲିଙ୍ଗନ କରି କାନ୍ଦିବାକୁ ଲାଗିଲେ । ଏହି ଘଟଣାକ୍ରମ ମଧ୍ୟରେ ବଜରଙ୍ଗ ପୁନିଆଙ୍କର ଏକ ଫଟୋ ଭାଇରାଲ ହେବାରେ ଲାଗିଛି, ଯେଉଁଥିରେ ସେ ଭିନେଶଙ୍କୁ ସ୍ବାଗତ କରୁଥିବାବେଳେ 'ତ୍ରିରଙ୍ଗା' ଚିତ୍ର ଥିବା ପୋଷ୍ଟର ଉପରେ ଛିଡ଼ା ହୋଇଥିବା ଦେଖିବାକୁ ମିଳିଛି । ଏହାକୁ ନେଇ ସୋସିଆଲ ମିଡିଆରେ ବଜରଙ୍ଗ ପୁନିଆଙ୍କୁ କଡ଼ା ସମାଲୋଚନାର ସାମ୍ନା କରିବାକୁ ପଡ଼ୁଛି ।
'ତ୍ରିରଙ୍ଗା' ଚିତ୍ର ଥିବା ପୋଷ୍ଟର ଉପରେ ଛିଡ଼ା ହୋଇଥିଲେ ପୁନିଆ :-
ଭିନେଶ ଫୋଗାଟଙ୍କୁ ଭବ୍ୟ ସ୍ବାଗତ ମଧ୍ୟରେ ବଜରଙ୍ଗ ଏକ ସମୟରେ 'ତ୍ରିରଙ୍ଗା' ଚିତ୍ର ଥିବା ପୋଷ୍ଟର ଉପରେ ଛିଡ଼ା ହୋଇଥିବା ଦେଖିବାକୁ ମିଳିଥିଲା । ଏକ ଭିଡିଓରେ ବଜରଙ୍ଗ ପୁନିଆ ଏକ କାରର ବନେଟ ଉପରେ ଛିଡ଼ା ହୋଇଥିବା ଦେଖିବାକୁ ମିଳିଥିଲା, ଯେଉଁଥିରେ ଏକ 'ତ୍ରିରଙ୍ଗା' ପୋଷ୍ଟର ଲଗାଯାଇଥିଲା । ପ୍ରକାଶ ଥାଉ, ଏହି ସମୟରେ ପୁନିଆ ଜନତା ଏବଂ ଗଣମାଧ୍ୟମକୁ ନିୟନ୍ତ୍ରଣ କରୁଥିବାବେଳେ ଅଜାଣତରେ ତାଙ୍କ ପାଦ 'ତ୍ରିରଙ୍ଗା' ପୋଷ୍ଟରରେ ପଡ଼ିଥିଲା । ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି ଏବଂ ୟୁଜର୍ସ ଏଥିପାଇଁ ରେସଲର ବଜରଙ୍ଗଙ୍କୁ ସମାଲୋଚନା କରୁଛନ୍ତି ।