ଭୁବନେଶ୍ବର : ଚଳିତବର୍ଷ ପ୍ୟାରିସ୍ ଅଲିମ୍ପିକ୍ସ 2024 ଓ ପାରାଲିମ୍ପିକ୍ସ 2024ରେ ଅଂଶଗ୍ରହଣ କରିଥିବା KIIT-KISSର 17 ଜଣ ଖେଳାଳିଙ୍କୁ ଆଜି କିଟ୍ ପରିସରରେ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ସମ୍ବର୍ଦ୍ଧନା ଦିଆଯାଇଛି । କାର୍ଯ୍ୟକ୍ରମରେ କିଟ୍ର 15 ଜଣ ଅଲିମ୍ପିଆନ୍ ଓ 2 ଜଣ ପାରାଲିମ୍ପିଆନଙ୍କୁ ସମ୍ମାନୀତ କରାଯିବା ସହ ପ୍ରତ୍ୟେକ ଖେଳାଳିଙ୍କୁ 7 ଲକ୍ଷ ଟଙ୍କା ଲେଖାଏଁ ଆର୍ଥିକ ପୁରସ୍କାର ରାଶି ପ୍ରଦାନ କରାଯାଇଛି ।
'ଅଲିମ୍ପିକ୍ସକୁ ସର୍ବାଧିକ ଖେଳାଳି ପଠାଇ KIIT ଗର୍ବିତ' :-
ଏହି କାର୍ଯ୍ୟକ୍ରମ ଅବସରରେ KIIT ପ୍ରତିଷ୍ଠାତା ଅଚ୍ୟୁତ ସାମନ୍ତ କହିଛନ୍ତି, "କିଟ୍ ସର୍ବଦା କ୍ରୀଡ଼ା ଓ କ୍ରୀଡ଼ାବିତ୍ଙ୍କ ବିକାଶ ଦିଗରେ କାର୍ଯ୍ୟ କରିଆସୁଛି । ଅଲିମ୍ପିକ୍ସକୁ ସର୍ବାଧିକ ଖେଳାଳି ପଠାଇ କିଟ୍ ନିଜକୁ ଗୌରବାନ୍ୱିତ ମନେକରୁଛି । କିଟ୍ ଓ କିସ୍ରୁ ଏପର୍ଯ୍ୟନ୍ତ ମୋଟ 20 ଜଣ ଅଲିମ୍ପିଆନ୍, 2 ଜଣ ପାରାଲିମ୍ପିଆନ୍ ତିଆରି ହୋଇସାରିଲେଣି । ସେମାନେ 2016 ରିଓ ଅଲିମ୍ପିକ୍ସ, 2020 ଟୋକିଓ ଅଲିମ୍ପିକ୍ସରେ ଭାରତର ପ୍ରତିନିଧିତ୍ୱ କରିଥିବାବେଳେ ଚଳିତବର୍ଷ ସର୍ବାଧିକ 17 ଜଣ ପ୍ୟାରିସ୍ ଅଲିମ୍ପିକ୍ସ ଓ ପରାଲିମ୍ପକ୍ସ 2024ରେ ଅଂଶଗ୍ରହଣ କରିଥିଲେ । ସେମାନଙ୍କ ମଧ୍ୟରୁ 7 ଜଣ ଅର୍ଜୁନ ପୁରସ୍କାରପ୍ରାପ୍ତ ଖେଳାଳି ମଧ୍ୟ ରହିଛନ୍ତି ।"