ପୁରୀ: ଆସନ୍ତାକାଲି (ଫେବ୍ରୁଆରୀ ୧ ତାରିଖ) ଠାରୁ ପୁରୀ ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ ହେବ କି ନାହିଁ ତା'କୁ ନେଇ ଏବେ ଅନିଶ୍ଚିତତା ଲାଗି ରହିଛି । ଏନେଇ ଥିବା ଆବଶ୍ୟକୀୟ ପ୍ରକ୍ରିୟା ଶେଷ ହୋଇନାହିଁ । ରାଜ୍ୟ ସରକାରଙ୍କ ପକ୍ଷରୁ କୌଣସି ନୂଆ ନିର୍ଦ୍ଦେଶନାମା ମଧ୍ୟ ଆସିନାହିଁ । ଶ୍ରୀମନ୍ଦିର ନାଟମଣ୍ଡପରେ ଥିବା ହୁଣ୍ଡି ସ୍ଥାନାନ୍ତର ପାଇଁ ସ୍ବତନ୍ତ୍ର ନିୟମ ରହିଛି । ତେଣୁ ହୁଣ୍ଡି ଗୁଡିକର ସ୍ଥାନାନ୍ତରଣ ହେବା ପରେ ହିଁ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ କରାଯିବ । ରାଜ୍ୟ ସରକାରଙ୍କର ନିର୍ଦ୍ଦେଶ ଆସିବା ପରେ ନାଟମଣ୍ଡପରେ ଥିବା ହୁଣ୍ଡିକୁ ସ୍ଥାନାନ୍ତର କରାଯାଇ ଧାଡ଼ି ଦର୍ଶନ ପାଇଁ ପ୍ରକ୍ରିୟା ଆରମ୍ଭ ହେବ । ନାଟମଣ୍ଡପରେ ଅସ୍ଥାୟୀ ବ୍ୟାରିକେଡ୍ ଏବଂ ରାମ୍ପ କରାଯାଇ ଭକ୍ତଙ୍କ ପାଇଁ ଧାଡ଼ି ଦର୍ଶନ ବ୍ୟବସ୍ଥା କରାଯିବ ।
ଧାଡ଼ି ଦର୍ଶନ ବିଳମ୍ବକୁ ନେଇ ଭକ୍ତ ମହଲରେ ଅସନ୍ତୋଷ:
ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ ହେବାରେ ଅହେତୁକ ବିଳମ୍ବକୁ ନେଇ ଭକ୍ତ ମହଲରେ ଅସନ୍ତୋଷ ଦେଖାଦେଇଛି । ଶ୍ରୀମନ୍ଦିରରେ ଶୃଙ୍ଖଳିତ ଦର୍ଶନ ବ୍ୟବସ୍ଥା ପାଇଁ ରାଜ୍ୟ ସରକାରଙ୍କ ଉଦାସୀନତାକୁ ନେଇ ଭକ୍ତ ଅସନ୍ତୋଷ ପ୍ରକାଶ କରିଛନ୍ତି । ଭବାନୀପାଟଣାରୁ ଆସିଥିବା ଜଣେ ଭକ୍ତ ନମିତାଞ୍ଜଳୀ ପାଣିଗ୍ରାହୀ କହିଛନ୍ତି, "ଶ୍ରୀମନ୍ଦିର ବାହାରେ ଯେଭଳି ଧାଡ଼ି ବ୍ୟବସ୍ଥା ହୋଇଛି ଶ୍ରୀମନ୍ଦିର ଭିତରେ ମଧ୍ୟ ମହାପ୍ରଭୁଙ୍କ ଦର୍ଶନ ବେଳେ ଧାଡ଼ି ଦର୍ଶନ ବ୍ୟବସ୍ଥା ରହିବା ଉଚିତ୍ । ମହିଳା, ଦିବ୍ୟାଙ୍ଗ, ବରିଷ୍ଠ ନାଗରିକଙ୍କ ପାଇଁ ସ୍ବତନ୍ତ୍ର ଧାଡ଼ି ଦର୍ଶନ ବ୍ୟବସ୍ଥା ରହିବା ଉଚିତ୍ । ମହାପ୍ରଭୁଙ୍କୁ ଦର୍ଶନ ପାଇଁ ବହୁ ଦୂରରୁ ଭକ୍ତ ଶ୍ରୀମନ୍ଦିରକୁ ଆସୁଛନ୍ତି । ଶ୍ରୀମନ୍ଦିର ଭିତରେ ଧାଡ଼ି ଦର୍ଶନ ବ୍ୟବସ୍ଥା ହେଲେ ଭକ୍ତ ଉପକୃତ ହୋଇ ପାରିବେ। ମହାପ୍ରଭୁଙ୍କ ଦର୍ଶନ ଭଲରେ କରିପାରିବେ । ବିଭିନ୍ନ ପର୍ବପର୍ବାଣୀ ଓ ଛୁଟି ଦିନ ମହାପ୍ରଭୁଙ୍କୁ ଦର୍ଶନ ପାଇଁ ଆସୁଥିବା ଭକ୍ତ ପ୍ରବଳ ଭିଡ଼ ଯୋଗୁଁ ଅସୁବିଧା ଭୋଗୁଛନ୍ତି । ମହାପ୍ରଭୁଙ୍କ ଦର୍ଶନ ସଠିକ ଭାଗରେ କରିପାରୁନାହାଁନ୍ତି । ମନ୍ଦିର ଭିତରେ ଠେଲାପେଲାରେ ଭକ୍ତ ଆହତ ହେଉଛନ୍ତି । ସାରା ବିଶ୍ବରୁ ଭକ୍ତ ମହାପ୍ରଭୁଙ୍କ ନିକଟକୁ ଆସୁଛନ୍ତି । ତେଣୁ ଶ୍ରୀମନ୍ଦିରରେ ନିହାତି ଶୃଙ୍ଖଳିତ ଦର୍ଶନ ବ୍ୟବସ୍ଥା ଶୀଘ୍ର କାର୍ଯ୍ୟକାରୀ ହେବା ଉଚିତ୍ । ଏହା ଫଳରେ ଭକ୍ତ ଭଲ ଅନୁଭୂତି ନେଇ ଫେରିବେ । ଭାରତର ବିଭିନ୍ନ ପ୍ରସିଦ୍ଧ ମନ୍ଦିରରେ ଲାଇନ ବ୍ୟବସ୍ଥା ରହିଛି । ଶ୍ରୀମନ୍ଦିରରେ ଶୀଘ୍ର ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ କରାଯାଉ ।"
ମହାପ୍ରଭୁଙ୍କୁ ଦର୍ଶନ ପାଇଁ ଆସିଥିବା ଆଉ ଜଣେ ଭକ୍ତ କେ.ବନଜା କହିଛନ୍ତି, "ଆମେ ଛୋଟ ପିଲାଙ୍କୁ ନେଇ ଦର୍ଶନ ପାଇଁ ଯାଇଥିଲୁ । ହେଲେ ପ୍ରବଳ ଭିଡ ଯୋଗୁଁ ଅସୁବିଧା ଭୋଗିଲୁ। ଛୋଟ ପିଲା, ବରିଷ୍ଠ ନାଗରିକ, ମହିଳାମାନେ ପ୍ରବଳ ଠେଲାପେଲାରେ ସମସ୍ୟା ଭୋଗୁଛନ୍ତି । ଅନେକ ଚେତାଶୂନ୍ୟ ହୋଇ ପଡୁଛନ୍ତି । ସରକାର ଧାଡ଼ି ଦର୍ଶନ ପାଇଁ ଯେଉଁ ଚିନ୍ତା କରିଛନ୍ତି ତାହା ସ୍ବାଗତଯୋଗ୍ୟ । ତିରୁପତି, ସିମାଞ୍ଚଳ ଭଳି ପ୍ରସିଦ୍ଧ ମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା ରହିଛି । ଯାତ୍ରୀମାନେ ଧାଡ଼ି ଦର୍ଶନ କରିବା ଦ୍ବାରା ଭକ୍ତ ଶୃଙ୍ଖଳାରେ ଦର୍ଶନ କରୁଛନ୍ତି । ଶ୍ରୀମନ୍ଦିର ବାହାରୁ ଆରମ୍ଭ ହେଇଥିବା ଧାଡ଼ି ଦର୍ଶନ ମହାପ୍ରଭୁଙ୍କୁ ଦର୍ଶନ କରିବା ଯାଏଁ ରହିବା ଉଚିତ୍ । ଯେତେ ଶୀଘ୍ର ଧାଡ଼ି ଦର୍ଶନ ଆରମ୍ଭ ହେବ ଭକ୍ତ ବେଶ୍ ଉପକୃତ ହେବେ ।"
ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ କହିଛନ୍ତି, "ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାରଙ୍କ ପ୍ରକ୍ରିୟା ଜାରି ରହିଛି । କେତେକ ଆଇନଗତ ଅନୁମତି ରହିଛି । ସରକାରଙ୍କ ପକ୍ଷରୁ ନିର୍ଦ୍ଦେଶ ଆସିବା ପରେ ଶ୍ରୀମନ୍ଦିର ଭିତରେ ଆମେ ଧାଡ଼ି ଦର୍ଶନ ବ୍ୟବସ୍ଥା ଆରମ୍ଭ କରିବୁ । କେତେକ ସେବାୟତ ନିଯୋଗ ସହ ଆଲଚୋନା ରହିଛି । ତାହା ଖୁବଶୀଘ୍ର ଶେଷ କରାଯିବ । ନାଟ ମଣ୍ଡପ ଭିତରେ ଅସ୍ଥାୟୀ ବ୍ୟାରିକେଡ୍ ଓ ରାମ୍ପ ପାଇଁ ସମସ୍ତ ବ୍ୟବସ୍ଥା ସରିଛି । ନାଟ ମଣ୍ଡପ ଭିତରେ ଥିବା ହୁଣ୍ଡିକୁ ଏକ ଉପଯୁକ୍ତ ସ୍ଥାନକୁ ସ୍ଥାନାନ୍ତର ପରେ ଧାଡ଼ି ଦର୍ଶନ ବ୍ୟବସ୍ଥା ଆରମ୍ଭ ହେବ । ଏଥିପାଇଁ ଆମେ କେବଳ ଏବେ ରାଜ୍ୟ ସରକାରଙ୍କ ନିର୍ଦ୍ଦେଶକୁ ଅପେକ୍ଷା କରିଛୁ ।
ଶ୍ରୀମନ୍ଦିର ଚାରିଦ୍ବାର ଭକ୍ତଙ୍କ ପାଇଁ ଖୋଲା ଥିବାବେଳେ ନାଟମଣ୍ଡପ ଭିତରେ ଶୃଙ୍ଖଳିତ ଦର୍ଶନ ବ୍ୟବସ୍ଥା ନଥିବାରୁ ମହାପ୍ରଭୁଙ୍କର ଦର୍ଶନ ଠିକ୍ ଭାବେ ଭକ୍ତମାନେ କରିପାରୁ ନଥିବାରୁ ପ୍ରବଳ ଅସନ୍ତୋଷ ରହିଥିଲା । ଫେବ୍ରୁଆରୀ ୧ ତାରିଖରୁ ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା ଆରମ୍ଭ କରାଯିବା ନେଇ ଆଇନମନ୍ତ୍ରୀ ପୂର୍ବରୁ ସୂଚନା ଦେଇଥିଲେ । ତେବେ ଫେବ୍ରୁଆରୀ ୧ ତାରିଖରୁ ଧାଡି ଦର୍ଶନ ଆରମ୍ଭ ହେବା ନେଇ ରାଜ୍ୟ ସରକାରଙ୍କ ପକ୍ଷରୁ ନୂଆ ନିର୍ଦ୍ଦେଶ ଆସିନାହିଁ । ତେଣୁ ଫେବ୍ରୁଆରୀ ୧ ତାରିଖରୁ ଧାଡି ଦର୍ଶନ ବ୍ୟବସ୍ଥା କାର୍ଯ୍ୟକାରୀ ହେବ କି ନାହିଁ ସେନେଇ ଏବେ ଅନିଶ୍ଚିତତା ଲାଗି ରହିଛି । ସେପଟେ ଶ୍ରୀମନ୍ଦିରରେ ଯଥାଶୀଘ୍ର ଶୃଙ୍ଖଳିତ ଧାଡି ଦର୍ଶନ ବ୍ୟବସ୍ଥା କାର୍ଯ୍ୟକାରୀ ପାଇଁ ଭକ୍ତ ଓ ଜଗନ୍ନାଥ ପ୍ରେମୀ ଆଶା ରଖିଛନ୍ତି ।
ଇଟିଭି ଭାରତ, ପୁରୀ
