ଭୁବନେଶ୍ବର: ଓଡିଶାର ନୂଆ ମୁଖ୍ୟମନ୍ତ୍ରୀ କିଏ ? କିଏ ଅଛନ୍ତି ସିଏମ ରେସରେ ଆଗରେ । ବିଜେପି ଅପ୍ରତ୍ୟାଶିତ ବିଜୟ ଲାଭ କରିବା ପରେ କିଏ ସେହି ଓଡିଆ ପୁଅ କିମ୍ବା ଝିଅ, ଯିଏ ରାଜ୍ୟର ସାଢେ 4 କୋଟି ଲୋକଙ୍କ ଭାଗ୍ୟ ବିଧାତା ସାଜିବ । ଜନାଦେଶରେ ଲୋକମାନେ ବିଜେପିକୁ ବିପୁଳ ପରିମାଣରେ ଅବିଶ୍ବସନୀୟ ଭାବେ ଆଶୀର୍ବାଦ ଦେବା ପରେ କିଏ ବସିବେ ସିଏମ ସିଟରେ ? ଏଭଳି ଏନେକ ପ୍ରଶ୍ନ ବର୍ତ୍ତମାନ ଲୋକଙ୍କ ମନରେ ଉଙ୍କି ମାରିଥିବା ବେଳେ ବଡ ବଡ ନାଁ ବର୍ତ୍ତମାନ ଚର୍ଚ୍ଚାରେ । ପ୍ରଧାନମନ୍ତ୍ରୀ ମୋଦି ଖୋଦ କିଛି ଦିନ ପୂର୍ବରୁ କହିଥିଲେ ଓଡିଶା ବାସୀଙ୍କ ଦୁଃଖ ବୁଝିବା ପରେ ଜଣେ ଓଡିଆଙ୍କୁ ଆମେ ଜୁନ 10 ତାରିଖରେ ମୁଖ୍ୟମନ୍ତ୍ରୀ କରି ରାଜ୍ୟବାସୀଙ୍କ ସେବା ପାଇଁ ଶପଥ ପାଠ କରାଇବୁ । ବର୍ତ୍ତମାନ ବିଜେପି ରାଜ୍ୟରେ 78 ଆସନରେ ବିଜୟ ହାସଲ ପରେ ରାଜ୍ୟର ନୂଆ ମୁଖ୍ୟମନ୍ତ୍ରୀ କିଏ ହେବ ସେ ନେଇ ଚାରିଆଡେ କଳ୍ପନା ଜଳ୍ପନା ।
ଗତବର୍ଷ ମଧ୍ୟପ୍ରଦେଶ, ରାଜସ୍ଥାନ ଏବଂ ଛତିଶଗଡରେ ବିଜେପି ବିଜୟ ପରେ ଭେଟେରାନ ଲିଡରଙ୍କୁ ହଟାଇ ନୂଆ ଚେହେରାଙ୍କୁ ସାମ୍ନାକୁ ଆଣି ମୁଖ୍ୟମନ୍ତ୍ରୀ କରିଥିଲା । ସେହି ଫର୍ମୁଲାରେ କଣ ଓଡିଶାରେ ଦେଖିବାକୁ ମିଳିବ କି ମୁଖ୍ୟମନ୍ତ୍ରୀ ଚେହେରା ? ତାହା ହେଲେ କିଏ ହେବେ ରାଜ୍ୟରେ ନୂଆ ମୁଖ୍ୟମନ୍ତ୍ରୀ ? ରେଜଲ୍ଟ ଆସିବାର 24 ଘଣ୍ଟା ପରେ ଏହି ଚର୍ଚ୍ଚା ଜୋର ଧରିଥିବା ବେଳେ କିଏ ଚେହେରା ସାମ୍ନାକୁ ଆସିଛି । ଚର୍ଚ୍ଚା ହେଉଛି କି କେନ୍ଦ୍ରମନ୍ତ୍ରୀ ତଥା ସମ୍ବଲପୁରରେ ଲୋକସଭାରେ ବିଜୟୀ ହୋଇଥିବା ଧର୍ମେନ୍ଦ୍ର ପ୍ରଧାନ ରେସରେ ସବୁଠୁ ଆଗରେ ଥିବା ବେଳେ ବାଲେଶ୍ବର ସାଂସଦ ପ୍ରତାପ ଷଡଙ୍ଗୀ, ଝାରସୁଗୁଡା ଜିଲ୍ଲା ବ୍ରଜରାଜନଗର ବିଧାନସଭାରୁ ବିଜୟୀ ହୋଇଥିବା ସୁରେଶ ପୂଜାରୀ, ତଥା ସିଏଜି ଗିରିଶ ମୁର୍ମୁଙ୍କ ନାମ ମୁଖ୍ୟମନ୍ତ୍ରୀ ରେସରେ ରହିଛି ।
କିଏ ଆଗରେ କିଏ ପଛରେ:
ଧର୍ମେନ୍ଦ୍ର ପ୍ରଧାନ: କେନ୍ଦ୍ରମନ୍ତ୍ରୀ ତଥା ସମ୍ବଲପୁରରେ ଲୋକସଭାରେ ବିଜୟୀ ହୋଇଥିବା ଧର୍ମେନ୍ଦ୍ର ପ୍ରଧାନ ରାଜ୍ୟର ନୂଆ ମୁଖ୍ୟମନ୍ତ୍ରୀ ପାଇଁ ରେସରେ ଆଗରେ । ସମ୍ବଲପୁର ମୈଦାନରେ ବିଜେଡି ହେଭିଓ୍ବେଟ ପ୍ରଣବ ପ୍ରକାଶ ଦାସଙ୍କୁ ଏକ ଲକ୍ଷ 19 ହଜାର 836 ଖଣ୍ଡ ଭୋଟରେ ପରାଜିତ କରିଥିବା ଧର୍ମେନ୍ଦ୍ର ପ୍ରଧାନ ବର୍ତ୍ତମାନ ମୁଖ୍ୟମନ୍ତ୍ରୀ ପଦ ପାଇଁ ପ୍ରମୁଖ ଦାବିଦାର । କାରଣ ରାଜ୍ୟ ବିଜେପିର ସବୁଠୁ ବଡ ଚେହେରା ହେଲେ ଧର୍ମେନ୍ଦ୍ର ପ୍ରଧାନ । ରାଜ୍ୟର ବିଭିନ୍ନ ପ୍ରସଙ୍ଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସର୍ବଦା ଟାର୍ଗେଟ କରୁଥିବା ବେଳେ ବିଜେଡି ମଧ୍ୟ ସର୍ବଦା ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରୁଥିଲା । ଏପରେ ବିଜୟ ପରେ ନୂଆଦିଲ୍ଲୀ ଗସ୍ତରେ ଅଛନ୍ତି ଧର୍ମେନ୍ଦ୍ର । ଯାହା ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି ।
ଗିରିଶ ମୁର୍ମୁ: ସିଏଜି ଗିରିଶ ମୁର୍ମୁ ବର୍ତ୍ତମାନ ମୁଖ୍ୟମନ୍ତ୍ରୀ ରେସରେ ଥିବା ଚର୍ଚ୍ଚା ହେଉଛି । ଜଣେ ଓଡିଆ ତଥା ମୟୂରଭଞ୍ଜ ଜିଲ୍ଲାରୁ ପ୍ରତିନିଧିତ୍ୱ କରୁଛନ୍ତି ମୁର୍ମୁ । ସେ ପୂର୍ବରୁ ଧାରା 370 ଉଚ୍ଛେଦ ପରେ ଜମ୍ମୁ କାଶ୍ମୀରରେ ଉପରାଜ୍ୟପାଳ ରହିସାରିଛନ୍ତି । ଏହା ସହିତ ସେ ପ୍ରଧାନମନ୍ତ୍ରୀ ମୋଦି ଗୁଜୁରାଟର ମୁଖ୍ୟମନ୍ତ୍ରୀ ଥିବା ବେଳେ ତାଙ୍କର ବ୍ୟକ୍ତିଗତ ସଚିବ ଥିଲେ । ଜଣେ ଆଇଏଏସ୍ ଅଫିସର ଭାବେ ସେ ମୋଦିଙ୍କ ଖାସ ଥିଲେ ।
ପ୍ରତାପ ଷଡଙ୍ଗୀ: ନୂଆ ମୁଖ୍ୟମନ୍ତ୍ରୀ ପଦ ପାଇଁ ଚର୍ଚ୍ଚାରେ ‘ଓଡିଶାର ମୋଦି’ । 2019 ନିର୍ବାଚନରେ ବାଲେଶ୍ବରରୁ ଲୋକସଭା ଆସନରେ ବିଜୟୀ ହେବା ପରେ ସେତେବେଳେ ସମଗ୍ର ଦେଶରେ ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଥିଲେ ନନା ତଥା ସାଂସଦ ପ୍ରତାପ ଷଡଙ୍ଗୀ । ସେତେବେଳେ ମଧ୍ୟ ମୋଦି ସରକାରରେ ମନ୍ତ୍ରୀ ହୋଇଥିଲେ ନନା । ତେବେ ବର୍ତ୍ତମାନ ନନା ଓଡିଶାର ମୁଖ୍ୟମନ୍ତ୍ରୀ ରେସରେ ଅଛନ୍ତି । ବାଲେଶ୍ୱରରେ ଏଥର ଏକ ଲକ୍ଷ 47 ହଜାରରୁ ଅଧିକ ଭୋଟରେ ବିଜୟୀ ହୋଇଥିବା ପ୍ରତାପ ଷଡଙ୍ଗୀ ରାଜ୍ୟରେ ଜଣେ ଲୋକପ୍ରିୟ ନେତା । ବିଜେପିର ବିଭିନ୍ନ ସାଂଗଠନିକ କାର୍ଯ୍ୟ ମଧ୍ୟ ତୁଲାଇଛନ୍ତି ।