ମୁମ୍ବାଇ:ଲୋକପ୍ରିୟ ଅଭିନେତା ସଞ୍ଜୟ ଦତ୍ତ ଚଳିତ ନିର୍ବାଚନ ଲଢିବା ନେଇ ଗତ କିଛି ଦିନ ହେବ ଚର୍ଚ୍ଚା ଜୋର ଧରିଥିଲା । ସେ କଂଗ୍ରେସ ଟିକେଟରେ ହରିୟାଣାର କୌଣସି ସଂସଦୀୟ କ୍ଷେତ୍ରରୁ ନିର୍ବାଚନ ଲଢିବା ନେଇ ବିଭିନ୍ନ ସୂତ୍ରରୁ ଭିନ୍ନ ଭିନ୍ନ ଚର୍ଚ୍ଚା ହେବାରେ ଲାଗିଥିଲା । ଆଜି ସଞ୍ଜୟ ନିଜେ ଏହି ଚର୍ଚ୍ଚାରେ ପୂର୍ଣ୍ଣଚ୍ଛେଦ ପକାଇଛନ୍ତି । ସେ କୌଣସି ରାଜନୈତିକ ଦଳରେ ସାମିଲ ହେଉନାହାନ୍ତି କିମ୍ବା ରାଜନୀତିରେ ପୁଣି ପ୍ରବେଶ କରିବେ ନାହିଁ ବୋଲି ଆଜି ସୋସିଆଲ ମିଡିଆରେ ସ୍ପଷ୍ଟ କରିଛନ୍ତି ।
ଆଜି ସଞ୍ଜୟ ନିଜ ‘ଏକ୍ସ’ ହ୍ୟାଣ୍ଡଲରେ ପୋଷ୍ଟ କରି କହିଛନ୍ତି, ‘‘ମୁଁ ନିର୍ବାଚନରେ ଅଂଶଗ୍ରହଣ କରିବା ନେଇ ଯେଉଁ ଚର୍ଚ୍ଚା ହେଉଛି, ତାହାକୁ ମୁଁ ଶେଷ କରିବାକୁ ଚାହେଁ । ମୁଁ କୌଣସି ରାଜନୈତିକ ଦଳରେ ସାମିଲ ହେଉନାହିଁ, କିମ୍ବା ଚଳିତ ନିର୍ବାଚନରେ ପ୍ରତିଦ୍ବନ୍ଦ୍ବିତା ମଧ୍ୟ କରୁନାହିଁ । ମୁଁ ଯଦି ନିର୍ବାଚନ ଲଢିବାକୁ କିମ୍ବା ରାଜନୀତିରେ ପ୍ରବେଶ କରିବାକୁ ନିଷ୍ପତ୍ତି ନିଏ,ତେବେ ମୁଁ ନିଜେ ହିଁ ପ୍ରଥମେ ଘୋଷଣା କରିବି । ମୋ ସମ୍ପର୍କରେ ହେଉଥିବା ଏପରି ଚର୍ଚ୍ଚାକୁ ସ୍ବୀକାର କରିବା ଉଚିତ ନୁହେଁ ।’’
ଏହା ମଧ୍ୟ ପଢନ୍ତୁ :- ନିର୍ବାଚନ ଲଢ଼ିପାରିବେ ବରିଷ୍ଠ ନେତା ଦିଲ୍ଲୀପ ରାୟ, ଦିଲ୍ଲୀ ହାଇକୋର୍ଟରୁ ମିଳିଲା ଆଶ୍ବସ୍ତି - Dilip Roy in Coal Scam Case
ତେବେ ପୂର୍ବରୁ ମଧ୍ୟ ସଞ୍ଜୟ ନିର୍ବାଚନ ଲଢିବା ପାଇଁ ପ୍ରୟାସ କରିସାରିଛନ୍ତି । ସେ 2009 ସାଧାରଣ ନିର୍ବାଚନରେ ସାମାଜବାଦୀ ପାର୍ଟିର ପ୍ରାର୍ଥୀ ଭାବେ ଲକ୍ଷ୍ନୌ ସଂସଦୀୟ ଆସନରୁ ନାମାଙ୍କନ ଭରିଥିଲେ । ମାତ୍ର ଏହାକୁ ପରେ ସେ ପ୍ରତ୍ୟାହାର କରିବାକୁ ବାଧ୍ୟ ହୋଇଥିଲେ । ସେ ବେଆଇନ ଅସ୍ତ୍ରଶସ୍ତ୍ର ରଖିବା ମାମଲାରେ ପାଇଥିବା ଦଣ୍ଡାଦେଶକୁ ଖାରଜ କରିବା କିମ୍ବା ରହିତାଦେଶ ଜାରି କରିବା ପାଇଁ ସେତେବେଳେ କୋର୍ଟ ମନା କରିଦେଇଥିଲେ । ଫଳରେ ସଞ୍ଜୟଙ୍କ ନିର୍ବାଚନ ଲଢିବା ଇଚ୍ଛା ପୂରଣ ହୋଇପାରିନଥିଲା । ଏବେ ପୁଣି ଥରେ ଏହି ଚର୍ଚ୍ଚା ଆରମ୍ଭ ହୋଇଥିଲା । ସେ କୌଣସି ସମୟରେ କଂଗ୍ରେସ ଦଳରେ ସାମିଲ ହୋଇପାରନ୍ତି ବୋଲି ଶୁଣିବାକୁ ମିଳିଥିଲା । ହେଲେ ଆଜି ସଞ୍ଜୟ ନିଜେ ଏହି ଚର୍ଚ୍ଚାରେ ପୂର୍ଣ୍ଣଚ୍ଛେଦ ଟାଣିଛନ୍ତି । ତେବେ ବଲିଉଡର ଏହି ସଫଳ ତଥା ଲୋକପ୍ରିୟ ଅଭିନେତା ମାରଣାସ୍ତ୍ର ରଖିବା ମାମଲାରେ ଗିରଫ ହୋଇ ଜେଲ ମଧ୍ୟ ଯାଇ ସାରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
