ନାଇଜେରିଆ: ହିଂସାର ନିଆଁରେ ଜଳୁଛି ପଶ୍ଚିମ ଆଫ୍ରିକୀୟ ଦେଶ ନାଇଜେରିଆ । ଦେଶର ପ୍ଲାଟୋଉ ରାଜ୍ୟ ମଙ୍ଗୁ ଜିଲ୍ଲାରେ ହିଂସାକାଣ୍ଡ ଘଟିଛି । କିିଛି ବନ୍ଧୁକଧାରୀ 2 ଦିନ ମଧ୍ୟରେ ପାଖାପାଖି 50 ଜଣ ଗ୍ରାମବାସୀଙ୍କୁ ଗୁଳି କରି ହତ୍ୟା କରିଥିବା ଜଣାପଡିଛି । ଏଥିସହ ଅନେକ ଘରେ ନିଆଁ ଲଗାଇ ଦେଇଥିବା ସୂଚନା ରହିଛି । ସ୍ଥିତି ନିୟନ୍ତ୍ରଣ ପାଇଁ ସମଗ୍ର ଅଞ୍ଚଳରେ ପ୍ରଶାସନ ପକ୍ଷରୁ କର୍ଫ୍ୟୁ ଜାରି କରାଯାଇଛି । ତେବେ ଜିଲ୍ଲାରେ ପଶୁପାଳକ ଓ କୃଷକ 2 ଗୋଷ୍ଠୀ ମଧ୍ୟରେ ହିଂସା ଜାରି ରହିଥିବା ବେଳେ ଏହି ଘଟଣା ସାମ୍ନାକୁ ଆସିଛି । 2 ମାସ ମଧ୍ୟରେ ରାଜ୍ୟରେ ଏହା ଦ୍ୱିତୀୟ ବଡ ଆକ୍ରମଣ ଘଟଣା ଅଟେ । ଏହା ପୂର୍ବରୁ ଡିସେମ୍ବର ମାସରେ ଏକ ଆକ୍ରମଣରେ 140 ଜଣଙ୍କ ମୃତ୍ୟୁ ହୋଇଥିଲା ।
ଅଶାନ୍ତ ନାଇଜେରିଆ । ଦେଶର ଉତ୍ତର ମଧ୍ୟ ରାଜ୍ୟ ପ୍ଲାଟୋଉର ମଙ୍ଗୁ ଜିଲ୍ଲାରେ ହିଂସାକାଣ୍ଡ ଦେଖିବାକୁ ମିଳିଛି । ଜିଲ୍ଲାର ପଶୁପାଳକ ଓ କୃଷକ ସମୁଦାୟ ମଧ୍ୟରେ ମୁହାଁମୁହିଁ ସ୍ଥିତି ଲାଗି ରହିଛି । ଏହାକୁ ଆୟତ୍ତ କରିବା ପାଇଁ ସମଗ୍ର ଅଞ୍ଚଳରେ 24 ଘଣ୍ଟିଆ କଫ୍ୟୁ ଜାରି କରାଯାଇଥିଲେ ମଧ୍ୟ ଅନେକ ସ୍ଥାନରେ ହିଂସାକାଣ୍ଡ ଘଟଣା ସାମ୍ନାକୁ ଆସିଛି । ମଙ୍ଗୁ ଜିଲ୍ଲାରେ 3 ଦିନ ମଧ୍ୟରେ କିଛି ବନ୍ଧୁକଧାରୀ ପାଖାପାଖି 50 ଜଣ ଗ୍ରାମବାସୀଙ୍କୁ ଗୁଳି କରି ହତ୍ୟା କରିଥିବା ବେଳେ ଏବେବି ଅନେକ ନିଖୋଜ ରହିଥିବା ନେଇ ଜଣାପଡିଛି । ଅନେକ ଗୁରୁତର ଆହତ ମଧ୍ୟ ହୋଇଛନ୍ତି । ତେବେ ଆଗକୁ ମୃତ୍ୟୁ ସଂଖ୍ୟା ବଢିବାର ଆଶଙ୍କା କରାଯାଉଛି । କିଛି ବନ୍ଧୁକଧାରୀ ଆତତାୟୀ ଗୁଳିକରି ହତ୍ୟା କରିବା ସହ ଅନେକ ଘରେ ନିଆଁ ଲଗାଇ ଦେଇଥିବା ସୂଚନା ରହିଛି । ତେବେ ଏହି ଆକ୍ରମଣ ପାଇଁ ଏବେସୁଦ୍ଧା କୌଣସି ସଂଗଠନ ନିଜକୁ ଦାୟୀ କରିନାହିଁ । ଏହି ଆକ୍ରମଣ ଫୁଲାନି ଟ୍ରାଇବ୍ ପଶୁପାଳକ ଗୋଷ୍ଠୀ କରିଥିବା ନେଇ ସ୍ଥାନୀୟ ଲୋକେ ଦାବି କରିଛନ୍ତି ।