ନୂଆଦିଲ୍ଲୀ: ଭାରତ ବିରୋଧୀ ଆଭିମୁଖ୍ୟ ସହ ପ୍ରଚାର କରି ନିର୍ବାଚନରେ କ୍ଷମତା ହାସଲ କରିଥିବା ଚୀନ ସମର୍ଥିତ ମାଳଦ୍ବୀପ ରାଷ୍ଟ୍ରପତି ମହମ୍ମଦ ମୁଇଜୁଙ୍କ ଅଡୁଆ ବଢିବାକୁ ଯାଉଛି । ମାଳଦ୍ବୀପର ମୁଖ୍ୟ ବିରୋଧୀ ଦଳ ମୁଇଜୁଙ୍କ ବିରୋଧରେ ସଂସଦରେ ମହାଭିଯୋଗ ପ୍ରସ୍ତାବ ଆଣିବାକୁ ଯାଉଛି । ଏନେଇ ସମସ୍ତ ପ୍ରକ୍ରିୟା ମଧ୍ୟ ଶେଷ ହୋଇଛି । ସଂସଦରେ ଅଧିକ ସଭ୍ୟ ଥିବା ମାଳଦ୍ବୀପ ଡେମୋକ୍ରାଟିକ ପାର୍ଟି ଏହାର ସଦସ୍ୟଙ୍କ ଠାରୁ ଏହି ପ୍ରସ୍ତାବ ସମ୍ପର୍କରେ ହସ୍ତାକ୍ଷର ସଂଗ୍ରହ କରିବା ଆରମ୍ଭ କରିଛି । ସଂସଦରେ ମୁଇଜୁ ସରକାର ବିରୋଧରେ ମହାଭିଯୋଗ ଆଗତ ହେବା ଏକ ପ୍ରକାର ସ୍ଥିର ବୋଲି କିଛି ଅନ୍ତର୍ଜାତୀୟ ଗଣମାଧ୍ୟମରେ ଖବର ମଧ୍ୟ ପ୍ରସାରିତ ହୋଇଛି ।
ମାଳଦ୍ବୀପ ରାଜଧାନୀ ମାଲେ ବନ୍ଦରରେ ଏକ ଚୀନ ଯାହାଜକୁ ପ୍ରବେଶ ଅନୁମତି ମିଳିବା ପରେ ମାଳଦ୍ବୀପରେ ରାଜନୈତିକ ପାରା ମଧ୍ୟ ଉପର ମୁହାଁ ହୋଇଛି । ଗତକାଲି ଏହି ପ୍ରସଙ୍ଗରେ ଚର୍ଚ୍ଚା ବେଳେ ମାଳଦ୍ବୀପ ସଂସଦରେ ପ୍ରବଳ ଉତ୍ତେଜନା ଦେଖିବାକୁ ମିଳିଥିଲା । ଏହାପରେ ବିରୋଧୀ ମହାଭିଯୋଗ ପ୍ରସ୍ତାବ ଆଣିବାକୁ ପ୍ରସ୍ତୁତି ଆରମ୍ଭ କରିଛନ୍ତି ।
ପୂର୍ବ ରାଷ୍ଟ୍ରପତି ଭାରତ ସହ ସୁସମ୍ପର୍କ ରଖିଥିବା ବେଳେ ମୁଇଜୁ ପୂର୍ବରୁ ଭାରତ ବିରୋଧୀ ଓ ଚୀନ ସମର୍ଥିତ ବୋଲି ଜଣାଶୁଣା । ଏପରିକି ସେ ନିର୍ବାଚନ ସମୟରେ ଭାରତୀୟ ସୈନ୍ୟ ଅପସାରଣ ମୁଦ୍ଦାକୁ ନିର୍ବାଚନୀ ମୁଦ୍ଦା କରିଥିଲେ । ତାଙ୍କ ନେତୃତ୍ବରେ ମାଳଦ୍ବୀପରେ ‘ଆଉଟ ଇଣ୍ଡିଆ’ କ୍ୟାମ୍ପେନ ମଧ୍ୟ ଆରମ୍ଭ ହୋଇଥିଲା । ଏହାର ପ୍ରଭାବ ନିର୍ବାଚନରେ ଦେଖିବାକୁ ମିଳିଥିଲା । ମୁଇଜୁଙ୍କ ପାର୍ଟି ବହୁମତ ହାସଲ କରି ସରକାର ଗଠନ କରିଥିଲେ । ଏହା ପରେ ପ୍ରଥମ କରି ତୁର୍କୀ ଓ ପରେ ଚୀନ ଗସ୍ତ କରିଥିଲେ । ସେଠାରେ ସେ ରାଷ୍ଟ୍ରପତି ସି ଜିନପିଙ୍ଗକୁ ଭେଟିବା ପରେ ଭାରତକୁ ସୈନ୍ୟ ଅପସାରଣ ପାଇଁ ଚାପ ମଧ୍ୟ ପକାଇଥିଲେ । ଭାରତ ମାଳଦ୍ବୀପ ମଧ୍ୟରେ ଏହି ପ୍ରସଙ୍ଗରେ ଆଲୋଚନା ଜାରି ରହିଛି ।