ବରଗଡ଼ ଜଙ୍ଗଲରୁ ଉଦ୍ଧାର ଯୁବତୀଙ୍କ ସହ ହୋଇନି ଦୁଷ୍କର୍ମ, ସ୍ପଷ୍ଟ କଲେ ଡାକ୍ତର

ଜଙ୍ଗଲରୁ କ୍ଷତାକ୍ତ ଅବସ୍ଥାରେ ହୋଇଥିଲେ ଉଦ୍ଧାର । ଦୁଷ୍କର୍ମ ସହ ହତ୍ୟା ଉଦ୍ୟମ ଅଭିଯୋଗ ଆଣିଥିଲେ ପରିବାର । ଦୁଷ୍କର୍ମ ହୋଇନଥିବା ସ୍ପଷ୍ଟ କଲେ ଡାକ୍ତର ।

ସମ୍ବଲପୁର: ବରଗଡ଼ ଜିଲ୍ଲାର କୁର୍ଲା ଜଙ୍ଗଲରୁ କ୍ଷତାକ୍ତ ଅବସ୍ଥାରେ ଜଣେ ଯୁବତୀ ଉଦ୍ଧାର ହେବା ଘଟଣାରେ ଭିନ୍ନ ତଥ୍ୟ ସାମ୍ନାକୁ ଆସିଛି । ପାରିପାର୍ଶ୍ବିକ ସ୍ଥିତି ଓ ପୀଡିତାଙ୍କ ପରିବାର ସଦସ୍ୟ ଏହା ଏକ ଦୁଷ୍କର୍ମ ଓ ହତ୍ୟା ଉଦ୍ୟମ ଘଟଣା ବୋଲି ଅଭିଯୋଗ କରିଥିଲେ । ହେଲେ ସମ୍ପୃକ୍ତ ଯୁବତୀଙ୍କ ସହ ଦୁଷ୍କର୍ମ କିମ୍ବା ଗଣଦୁଷ୍କର୍ମ ହୋଇନଥିଲା ମେଡିକାଲ ରିପୋର୍ଟ କହୁଛି । ଏନେଇ ବୁର୍ଲା ମେଡିକାଲ ଅଧୀକ୍ଷକ ଲାଲ ମୋହନ ନାୟକ ସ୍ପଷ୍ଟ କରିଛନ୍ତି ।

• 'ଦୁଷ୍କର୍ମ ହୋଇନାହିଁ'

ବରଗଡ ବିଶ୍ବପ୍ରସିଦ୍ଧ ଧନୁଯାତ୍ରା ଦେଖିବାକୁ ଯାଇ ନିଖୋଜ ହୋଇଯାଇଥିଲେ ଯୁବତୀ । ଏହି ଘଟଣାରେ ଆଜି ବରଗଡ଼ ପୋଲିସ ବୁର୍ଲା ଭୀମସାର ମେଡିକାଲରୁ ରିପୋର୍ଟ ସଂଗ୍ରହ କରିଛି । ତେବେ ମେଡିକାଲ ରିପୋର୍ଟ ଆସିବା ପରେ ବୁର୍ଲା ମେଡିକାଲ ଅଧୀକ୍ଷକ ଲାଲ ମୋହନ ନାୟକ ଗୁରୁତ୍ୱପୂର୍ଣ୍ଣ ସୂଚନା ପ୍ରଦାନ କରିଛନ୍ତି । ସେ କହିଛନ୍ତି, ଯୁବତୀଙ୍କ ସହ କୌଣସି ଦୁଷ୍କର୍ମ କି ଗଣଦୁଷ୍କର୍ମ ହୋଇନଥିବା ଡାକ୍ତରୀ ମାଇନା ପରେ ଜଣାପଡିଛି । ପୀଡିତାଙ୍କ ପ୍ରାଇଭେଟ ପାର୍ଟରେ କୌଣସି କ୍ଷତ ଚି଼ହ୍ନ ନାହିଁ l ବର୍ତ୍ତମାନ ଯୁବତୀଙ୍କ ସ୍ୱାସ୍ଥ୍ୟାବସ୍ଥା ଭଲ ରହିଛି ।"

• ଯୁବତୀ ସୁସ୍ଥ:

ବୁର୍ଲା ମେଡିକାଲ ଅଧୀକ୍ଷକ ଆହୁରି କହିଛନ୍ତି," ପୀଡିତାଙ୍କ ମୁଣ୍ଡରେ ଥିବା କ୍ଷତଟି ଭଲ ହୋଇଗଲେ ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ହୋଇଯିବ ବୋଲି ଆଶା କରୁଛୁ । ପୀଡିତାଙ୍କ ସମସ୍ତ କ୍ଲିନିକାଲ ରୁଟିନ୍‌ ଟେଷ୍ଟ କରାଯାଇଛି । ଏଚଆଇଭି, ଭିଡିଆରଏଲ ଆଦି ଟେଷ୍ଟ କରାଯାଇଛି । ଏହାସହ ସିଟିସ୍କାନ ମଧ୍ୟ ଠିକ ବାହାରିଛି । ଯୁବତୀଙ୍କୁ ନିୟୁରୋ ସର୍ଜରୀ, ପ୍ଲାଷ୍ଟିକ ସର୍ଜରୀ, ଜେନରାଲ ସର୍ଜରୀ, ଗାଇନୋକଲୋଜି ବିଭାଗର ଡାକ୍ତରୀ ଟିମ୍‌ ଚିକିତ୍ସା କରିଛନ୍ତି l ସେ ବର୍ତ୍ତମାନ କଥାବାର୍ତ୍ତା ମଧ୍ୟ କରି ପାରୁଛନ୍ତି ଓ ତାଙ୍କ ସ୍ୱାସ୍ଥ୍ୟବସ୍ଥାରେ ବହୁ ଉନ୍ନତି ଆସିଛି । ମହିଳା ତାକ୍ତରମାନେ ମଧ୍ୟ ତାଙ୍କୁ କାଉନସିଲିଂ କରିଛନ୍ତି । ଶଖୀ ସେଣ୍ଟରର ସଦସ୍ୟମାନେ ମଧ୍ୟ ତାଙ୍କୁ ଦେଖା କରି କଥାବାର୍ତ୍ତା କରିଛନ୍ତି ।"

ଏହା ବି ପଢନ୍ତୁ...କୋଲକାତା ଡାକ୍ତର ଦୁଷ୍କର୍ମ-ହତ୍ୟା ମାମଲା: ଦୋଷୀ ସଞ୍ଜୟ ରାୟକୁ ଆଜୀବନ ଜେଲ୍‌

• କ'ଣ ଥିଲା ପୂରା ଘଟଣା ?

ଅଭିଯୋଗ ଅନୁସାରେ, ବରଗଡ଼ ସହର ଉପକଣ୍ଠ ଏକ ଗ୍ରାମର ଜଣେ 24 ବର୍ଷୀୟା ଯୁବତୀ ଗତ ରବିବାର ଦିନ 12 ତାରିଖ ଅପରାହ୍ନ 4ଟା ସମୟରେ ଧନୁଯାତ୍ରା ଦେଖିବା ପାଇଁ ଆସି ଆଉ ଘରକୁ ଫେରିନଥିଲେ । ପରିବାର ଲୋକେ ରାତ୍ରି 10ଟା 30 ସମୟରେ ଫୋନ ମାଧ୍ୟମରେ ସୂଚନା ପାଇଥିଲେ ଯେ, ତାଙ୍କ ଝିଅ ରକ୍ତ ଜୁଡୁବୁଡୁ ଅବସ୍ଥାରେ କୁର୍ଲା ଜଙ୍ଗଲ ମଧ୍ୟରେ ପଡ଼ିରହିଛି । ଖବର ପାଇବା ପରେ ପରିବାର ଲୋକେ ସଙ୍ଗେ ସଙ୍ଗେ ଗ୍ରାମାଞ୍ଚଳ ଥାନାକୁ ଯାଇ ଲିଖିତ ଅଭିଯୋଗ କରିବା ସହିତ ଘଟଣାସ୍ଥଳରେ ଅନେକ ଖୋଜାଖୋଜି କରିଥିଲେ ବି ପାଇନଥିଲେ । ପରଦିନ ଆଉ ଏକ ଅଜଣା ଫୋନ କଲ ପାଇବା ପରେ ନର୍ଲା ଜଙ୍ଗଲରୁ ଯୁବତୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା । ଦୁର୍ବୃତ୍ତ ଯୁବତୀଙ୍କୁ ଦୁଷ୍କର୍ମ ସହ ହତ୍ୟା ଉଦ୍ୟମ କରି ଜଙ୍ଗଲକୁ ଫିଙ୍ଗି ଦେଇଥିବା ପରିବାର ଲୋକ ଅଭିଯୋଗ କରିଥିଲେ । ହେଲେ ଡାକ୍ତରୀ ମାଇନା ପରେ ଦୁଷ୍କର୍ମ ହୋଇନଥିବା ସୂଚନା ଦେଇଛନ୍ତି ଡାକ୍ତର ।

ଇଟିଭି ଭାରତ, ସମ୍ବଲପୁର