ହାଇଦ୍ରାବାଦ:ଇସ୍ରାଏଲ ଉପରେ ପାଲେଷ୍ଟାନୀୟ ଆତଙ୍କୀ ସଂଗଠନ ‘ହମାସ’ର ଆକ୍ରମଣକୁ ଆଜି ବର୍ଷେ ପୂରିଛି । ଆଜି ଯୁଦ୍ଧକୁ ବର୍ଷେ ପୂର୍ତ୍ତି ହେଉଥିବା ବଳେ ଗତକାଲି (ରବିବାର) ରାତିରେ ପରସ୍ପରକୁ ପ୍ରଚଣ୍ଡ ଆକ୍ରମଣ କରିଛନ୍ତି ଇସ୍ରାଏଲ ଓ ହିଜବୁଲ୍ଲା । ଇସ୍ରାଏଲ ଏୟାରଫୋର୍ସ ଲେବନନ ରାଜଧାନୀ ବେରୁତରେ ଏକାଧିକ ଏୟାର ଷ୍ଟ୍ରାଇକ କରିଛି । ଘନ ଘନ ରକେଟ୍ ମାଡରେ ପୂରା ବେରୁତ ଥରିଛି । ବହୁ କ୍ଷୟକ୍ଷତି ହୋଇଥିବା ଆଶଙ୍କା କରାଯାଉଛି । ଅନ୍ୟପଟେ ହିଜବୁଲ୍ଲା ମଧ୍ୟ ଇସ୍ରାଏଲକୁ ରକେଟ୍ ମାଡ କରିଛି । ହିଜବୁଲ୍ଲାର ରକେଟ ଉତ୍ତର-ଇସ୍ରାଏଲର ଏକାଧିକ ସୈନ୍ୟ ଠିକଣା ଓ ଅନ୍ୟ ସାର୍ବଜନୀନ ସ୍ଥାନକୁ ଟାର୍ଗେଟ କରିଛି । ଉଭୟ ପଟୁ ଗତକାଲି ରାତିରେ ଆକ୍ରମଣ ଓ ପ୍ରତିଆକ୍ରମଣ ଦେଖିଥିବାକୁ ମିଳିଛି ।
- ସପ୍ଟେମ୍ବର 7ରେ ହମାସ କରିଥିଲା ଆକ୍ରମଣ
ଗତବର୍ଷ (2023) ସେପ୍ଟେମ୍ବରରେ ଗାଜାରୁ ସଞ୍ଚାଳିତ ହେଉଥିବା ଆତଙ୍କୀ ସଂଗଠନ ହମାସ ଇସ୍ରାଏଲ ଉପରେ ଅତର୍କିତ ଆକ୍ରମଣ କରିଥିଲା । ଏକାକାଳୀନ ପ୍ରାୟ 5 ହଜାର ରକେଟ ମାଡ କରି ଇସ୍ରାଏଲୀ ବାୟୁ ପ୍ରତିରକ୍ଷା ପ୍ରଣାଳୀ ‘ଆଇରନ ଡୋମ’କୁ ମଧ୍ୟ ନିଷ୍କ୍ରିୟ କରିଦେଇଥିଲା ‘ହମାସ’ । ଏହି ଆକ୍ରମଣରେ ପ୍ରାୟ 12ଶହ ଇସ୍ରାଏଲୀ ନାଗରିକ ପ୍ରାଣ ହରାଇଥିଲେ । ଏଥିରେ ପ୍ରାୟ 2ଶହରୁ ଅଧିକ ସାଧାରଣ ଲୋକଙ୍କୁ ‘ହମାସ’ର ଆତଙ୍କବାଦୀମାନେ ପଣବନ୍ଦୀ ଭାବେ ନେଇଯାଇଥିଲେ । ସେମାନଙ୍କ ମଧ୍ୟରୁ କିଛି ଇସ୍ରାଏଲ ଫେରିଥିବା ବେଳେ ଅନ୍ୟ କିଛି ପଣବନ୍ଦୀଙ୍କୁ ହତ୍ୟା କରାଯାଇଥିଲା । ଏବେ ମଧ୍ୟ ଶତାଧିକ ପଣବନ୍ଦୀଙ୍କ ସମ୍ପର୍କରେ କୌଣସି ସୂଚନା ନାହିଁ । ଏହାର ପ୍ରତିଜବାବରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ‘ହମାସ’ ସମ୍ପୂର୍ଣ୍ଣ ଶେଷ କରିବା ପାଇଁ ଇସ୍ରାଏଲ ସେନାକୁ ନିର୍ଦ୍ଦେଶ ଦେଇଥିଲେ ।