Papaya Health Benefits: ଆପଣଙ୍କୁ ଅମୃତଭଣ୍ଡା ଖାଇବା ପସନ୍ଦ କି ? ଏହି ଫଳ କେବଳ ସ୍ବାଦିଷ୍ଟ ନୁହେଁ, ଅନେକ ସ୍ବାସ୍ଥ୍ୟ ଉପକାରୀ ଗୁଣରେ ଭରପୂର ମଧ୍ୟ । ଆମେ ଉଭୟ କଞ୍ଚା ଓ ପାଚିଲା ଅମୃତ ଭଣ୍ଡା ଖାଇଥାଉ । ଅମୃତଭଣ୍ଡାରେ ଭିଟାମିନ ଏ, ଭିଟାମିନ ସି, ପ୍ରୋଟିନ, କାର୍ବୋହାଇଡ୍ରେଟ୍ସ, ଫୋଲେଟ, କପର, ଫାଇବର ପୋଟାସିୟମ, କ୍ୟାଲେସିୟମ, ମ୍ୟାଗ୍ନେସିୟମ ଭଳି ନ୍ୟୁଟ୍ରିଏନ୍ସ ରହିଥାଏ । ସେହିପରି ଏହା ଶକ୍ତିଶାଳୀ ଆଣ୍ଟିଅକ୍ସାଡାଣ୍ଟ ଗୁଣରେ ମଧ୍ୟ ଭରପୂର । ଯାହାଫଳରେ ଏହାକୁ ଖାଇବା ଦ୍ବାରା ଅନେକ ମାରାତ୍ମକ ରୋଗରୁ ରକ୍ଷା ମିଳିଥାଏ । ଆପଣ ପାଚିଲା ଅମୃତଭଣ୍ଡା କାଟିକି ଖାଇପାରିବେ ନହେଲେ ଜୁସ୍ କରି ପିଇପାରିବେ ।
ଅମୃତଭଣ୍ଡା ସ୍ବାଦିଷ୍ଟ ହେବା ସଙ୍ଗେ ସଙ୍ଗେ ବହୁ ପୋଷକ ତତ୍ତ୍ବରେ ଭରପୂର । ଏହା ଶରୀରକୁ ଅନେକ ରୋଗରୁ ରକ୍ଷା କରିଥାଏ । ଯେମିତିକି:-
ସୁଗାର ନିୟନ୍ତ୍ରଣ କରେ:ଡାଇବେଟିସ୍ ରୋଗୀଙ୍କ ପାଇଁ ଅମୃତଭଣ୍ଡା ଏକ ଭଲ ଫଳ । ଏଥିରେ ଫାଇବର ଥିବାରୁ ଏହା ରକ୍ତରେ ସୁଗାର ସ୍ତର ହ୍ରାସ କରେ । ଟାଇପ୍-2 ଡାଇବେଟିସ୍ ପୀଡିତ ଲୋକଙ୍କ ବ୍ଲଡ ସୁଗାର ନିୟନ୍ତ୍ରଣ କରିବା ସହ ଲିପିଡ୍ ଓ ଇନସୁଲିନ ସ୍ତରରେ ସୁଧାର ଆଣେ । ଗୋଟିଏ ଛୋଟ ଅମୃତଭଣ୍ଡାରେ ପାଖାପାଖି 3 ଗ୍ରାମ ଫାଇବର ଓ 17 ଗ୍ରାମ କାର୍ବୋହାଇଡ୍ରେଟ ଥାଏ ।
ହଜମ ପ୍ରକ୍ରିୟା ଉନ୍ନତ କରେ: ଏଥିରେ ଫାଇବର ଓ ପାଣି ମାତ୍ରା ଅଧିକ ଥାଏ, ଯାହା କୋଷ୍ଠକାଠିନ୍ୟରୁ ରକ୍ଷା କରିବା ସହ ଏଥିରେ ଥିବା ପାପେନ ଏନଜାଇମ ହଜମ ପ୍ରକ୍ରିୟା ଉନ୍ନତ କରେ । କେବଳ ଅମୃତ ଭଣ୍ଡା ନୁହେଁ, ଏହାର ମଞ୍ଜି ଓ ପତ୍ର ମଧ୍ୟ ବେଶ୍ ସ୍ବାସ୍ଥ୍ୟ ଉପଯୋଗୀ ।
ହୃଦୟ ସ୍ବାସ୍ଥ୍ୟ ପାଇଁ ଭଲ:ନିୟମିତ ଅମୃତଭଣ୍ଡା ଖାଇବା ଦ୍ବାରା ହୃଦୟ (ହାର୍ଟ) ସୁସ୍ଥ ରହିଥାଏ । ଏଥିରେ ଥିବା ଭିଟାମିନ-ସି ଏବଂ ଆଣ୍ଟିଅକ୍ସିଡାଣ୍ଟ ହୃଦରୋଗର ଆଶଙ୍କା କମ୍ କରିଥାଏ । ଏଥିସହ ଶରୀରରେ ଭଲ କୋଲେଷ୍ଟ୍ରଲ ପ୍ରଭାବ ବୃଦ୍ଧି କରିଥାଏ ।
କ୍ୟାନ୍ସର ଆଶଙ୍କା କମାଏ: ଗବେଷକମାନେ କୁହନ୍ତି, ଅମୃତଭଣ୍ଡାରେ ଥିବା ଲିକୋପେନ (Lycopene) ଆଣ୍ଟିଅକ୍ସିଡାଣ୍ଟ ଶରୀରରେ କ୍ୟାନ୍ସର ଆଶଙ୍କା କମ୍ କରେ । କ୍ୟାନ୍ସର ଚିକିତ୍ସିତ ହେଉଥିବା ଲୋକେ ଏହାକୁ ସେବନ କରିବା ଲାଭଦାୟକ । ଏହା କ୍ୟାନ୍ସର ସୃଷ୍ଟିକାରୀ ଫ୍ରି ରାଡିକଲ୍ସ କମ୍ କରିବାରେ ସାହାଯ୍ୟ କରେ ।