ହାଇଦ୍ରାବାଦ: ଆଜିକାଲି ଯୁବପିଢି ଇୟରବଡ୍ସର ବହୁଳ ବ୍ୟବହାର କରୁଛନ୍ତି । ଘରେ ହେଉ ଅବା ବାହାରେ ପୋଷାକ ଭଳି ହାତରେ ଫୋନ ସହ କାନରେ ଇୟରବଡ୍ସ ଯେମିତି ନିତ୍ୟବ୍ୟବହାର୍ଯ୍ୟ ସାମଗ୍ରୀ ପାଲଟିଛି । ହେଲେ କେବେ ଭାବିଛନ୍ତି କି, ଆପଣ ବ୍ୟବହାର କରୁଥିବା ଏହି ଇଲେକ୍ଟ୍ରୋନିକ ଡିଭାଇସ ଶରୀର ପାଇଁ କେତେ ହାନିକାରକ ? ଆପଣ ଜାଣି ଆଶ୍ଚର୍ଯ୍ୟ ହେବେ ଯେ, ଅତ୍ୟଧିକ ଇୟରବଡ୍ସ ବ୍ୟବହାର ଦ୍ବାରା ଶ୍ରବଣ ଶକ୍ତି ଗୁରୁତର ପ୍ରଭାବିତ ହୋଇଥାଏ । ଆପଣଙ୍କ ଶୁଣିବା କ୍ଷମତା ହ୍ରାସ ପାଇପାରେ ।
ଇୟରବଡ୍ସ ବ୍ୟବହାର କାନକୁ କ୍ଷତି ପହଞ୍ଚାଇପାରେ । ଏହା କେବଳ ଶୁଣିବା ଶକ୍ତିକୁ ପ୍ରଭାବିତ କରେନି, ବରଂ ସବୁ ସମୟରେ ଇୟରବଡ୍ସ ବ୍ୟବହାର କରିବା ଦ୍ବାରା କାନରେ ମଇଳା ଜମା ହେବାରେ ଲାଗେ । ଯାହାକି କାନ ନଳୀର ଗଭୀରରେ ପହଞ୍ଚି ଶରୀର ପାଇଁ ହାନିକାରକ ସାବ୍ୟସ୍ତ ହୋଇପାରେ । ଆସନ୍ତୁ ଜାଣିବା ଇୟରବଡ୍ସର ଅତ୍ୟଧିକ ବ୍ୟବହାର ଦ୍ବାରା ଶରୀରକୁ କେତେ ହାନି ପହଞ୍ଚେ ।
ଘଣ୍ଟା ଘଣ୍ଟା ଧରି ଇୟରବଡ୍ସ ବ୍ୟବହାର କରିବା ଫଳରେ ମୁଣ୍ଡବିନ୍ଧା ସମସ୍ୟା ହୋଇପାରେ । ଏହି କାରଣରୁ ପ୍ରବଳ ମୁଣ୍ଡବିନ୍ଧା ଓ ମାଇଗ୍ରେନ ଆରମ୍ଭ ହୁଏ । କେବଳ ଏତିକି ନୁହେଁ, ଏହା ଆମର ନିଦ୍ରାକୁ ମଧ୍ୟ ପ୍ରଭାବିତ କରେ । ଅଧିକ ସମୟ କାନରେ ଇୟରବଡ ଲଗାଇ ଶୁଣିବା ଦ୍ବାରା ଅନିଦ୍ରା ଓ ସ୍ଲିପ୍ ଏପନିୟା ଭଳି ସମସ୍ୟା ସୃଷ୍ଟି ହୋଇପାରେ ।
ଇୟରବଡ୍ସ ଆମର ଶ୍ରବଣ ଶକ୍ତିକୁ କ୍ଷତି ପହଞ୍ଚାଏ । ଲଗାତାର ଉଚ୍ଚ ଶବ୍ଦରେ ଗୀତ ଶୁଣିବା କିମ୍ବା ଫିଲ୍ମ ଦେଖିବା ଦ୍ବାରା ଧୀରେ ଧୀରେ ଆମର ଶୁଣିବା କ୍ଷମତା କମ୍ ହୋଇପାରେ । ଇୟରବଡ୍ସ କାରଣରୁ କାନରେ ରକ୍ତ ସଞ୍ଚାଳନ ଗୁରୁତର ପ୍ରଭାବିତ ହୁଏ । ସେଥିପାଇଁ ରାତିରେ ଶୋଇବା ସମୟରେ ଇୟରବଡ୍ସ ବ୍ୟବହାର କରିବାରୁ ଦୂରେଇ ରୁହନ୍ତୁ ।
ଅତ୍ୟଧିକ ଇୟରବଡ୍ସ ବ୍ୟବହାର ହୃଦୟ ସମ୍ବନ୍ଧୀୟ ରୋଗ ଆଶଙ୍କା ମଧ୍ୟ ବଢାଇଥାଏ । ଘଣ୍ଟା ଘଣ୍ଟା ଧରି ଇୟରବଡ୍ସ କିମ୍ବା ହେଡଫୋନ ଲଗାଇବା ଓ ଜୋରରେ ଗୀତ ଶୁଣିବା ଅଭ୍ୟାସ ଆମର ହୃଦୟ ଉପରେ ସିଧାସଳଖ ପ୍ରଭାବ ପକାଏ । ଏହାଦ୍ବାରା ହୃଦୟର ଗତି ତୀବ୍ର ହୁଏ ଓ ଭବିଷ୍ୟତରେ ବଡ଼ ସମସ୍ୟା ସୃଷ୍ଟି କରିଥାଏ ।