ଭୁବନେଶ୍ବର:ସାଧାରଣ ନିର୍ବାଚନ ଆସୁଥିବାବେଳେ ଏଥିରେ ନାଗରିକଙ୍କ ସହଭାଗିତା ଜରୁରୀ । ଯାହାକୁ ନେଇ ସଚେତନତାର ବାର୍ତ୍ତା ଦେଇଛି ଏକ ଫିଲ୍ମ । ଓଡ଼ିଆ ଚଳଚ୍ଚିତ୍ର 'ଭୋଟ'ର ଟ୍ରେଲର ରିଲିଜ ହୋଇଛି । ଫେବୃଆରୀ ୨୩ ତାରିଖରେ ମୁକ୍ତିଲାଭ କରିବ ଏହି ଚଳଚ୍ଚିତ୍ର । ଭୁବନେଶ୍ୱର ସ୍ଥିତ ଏକ ହୋଟେଲରେ ଏହାର ଟ୍ରେଲର ରିଲିଜ୍ ହୋଇଛି ।ତେବେ 'ଭୋଟ' ପଡିବା ସମୟ ପାଖେଇ ଆସୁଥିବାରୁ ଦର୍ଶକଙ୍କ ମନରେ ଆଗ୍ରହ ବଢ଼ିବାରେ ଲାଗିଛି । ଏନେଇ ଭୋଟରଙ୍କୁ ସଚେତନ ସହ ଦର୍ଶକମାନଙ୍କ ମନୋରଞ୍ଜନ ପାଇଁ ଋତୁପ୍ରିୟା ପ୍ରଡ଼କସନ୍ସ ବ୍ୟାନରରେ ଅତୀଶ କୁମାର ରାଉତଙ୍କ ପ୍ରଯୋଜନାରେ ନିର୍ମିତ ହୋଇଛି ଓଡ଼ିଆ ଚଳଚ୍ଚିତ୍ର 'ଭୋଟ' । ନିଚ୍ଛକ ମୌଳିକ କାହାଣୀକୁ ନେଇ ସିନେମା ତିଆରି ହୋଇଥିବାବେଳେ ମଞ୍ଚ ଦୁନିଆର ବହୁ ବିଶିଷ୍ଟ କଳାକାରଙ୍କୁ ନେଇ ନିର୍ମାଣ ହୋଇଛି ଏହି ଫିଲ୍ମ ।
ମଞ୍ଚ କଳାକାରମାନେ ସିନେମାର ପ୍ରତିଟି ଚରିତ୍ରକୁ ସୁନ୍ଦର ଭାବେ ଚିତ୍ରିତ କରିଛନ୍ତି । ଗାଁର ଭୋଟ ଓ ଭୋଟରଙ୍କ ମିଜାଜକୁ ନେଇ ସିନେମାଟି ପ୍ରସ୍ତୁତ ହୋଇଥିବାବେଳେ ଭୋଟ ସମୟରେ କିଭଳି ଅନେକ ସମ୍ପର୍କ ଭାଙ୍ଗିଯାଏ ଓ ଅନେକ ପରିବାରରେ ତିକ୍ତତା ଆସିଯାଏ ତାହା ମଧ୍ୟ ଦର୍ଶାଯାଇଛି । ଏସବୁ ଦୃଷ୍ଟିଭଙ୍ଗୀକୁ ନେଇ ଗତିଶୀଳ ହୋଇଛି ଓଡ଼ିଆ କାହାଣୀ । ମୌଳିକ କାହାଣୀ ସହ ଗଣତନ୍ତ୍ରର ନିଛକ ସତ ଉପରେ ଚଳଚିତ୍ର ପରିବେଷିତ ହୋଇଥିବା ବେଳେ ଦର୍ଶକଙ୍କ ହୃଦୟକୁ ଛୁଇଁବ ବୋଲି କହିଛି ପ୍ରଯୋଜନା ସଂସ୍ଥା ।