ରାୟପୁର: ଛତିଶଗଡର ବିଜାପୁର ଜଙ୍ଗଲରେ ଏନକାଉଣ୍ଟର । ସୁରକ୍ଷାବଳ ଗୁଳିରେ ତିନିଜଣ ହାର୍ଡକୋର ନକ୍ସଲ ନିପାତ ହୋଇଛନ୍ତି । ମଦ୍ଦେଡ ଜିଲ୍ଲାରେ ଏହି ଅପରେସନ ଜାରି ରହିଛି । ନିହତ ୩ ନକ୍ସଲ ୟୁନିଫର୍ମରେ ଥିଲେ । ସୁରକ୍ଷାକର୍ମୀ ସେମାନଙ୍କର ମୃତଦେହ ସହ ମାରଣାସ୍ତ୍ର ଓ ଅନ୍ୟାନ୍ୟ ସାମଗ୍ରୀ ଉଦ୍ଧାର କରିଛନ୍ତି । ବିଜାପୁର ଏଏସପି ଚନ୍ଦ୍ରକାନ୍ତ ଗୋବର୍ଣ୍ଣା ଗଣମାଧ୍ୟମକୁ ଏହି ସୂଚନା କରିଛନ୍ତି ।
- ଇନପୁଟ୍ ସୂଚନା ଆଧାରରେ ଅପରେସନ ଆରମ୍ଭ କରିଥିଲା ସୁରକ୍ଷା ବାହିନୀ
ବିଜାପୁର ଜିଲ୍ଲାର ବାନ୍ଦେପାରା ଜଙ୍ଗଲରେ ନକ୍ସଲଙ୍କ ଉପସ୍ଥିତି ସମ୍ପର୍କରେ ସ୍ଥାନୀୟ ପୋଲିସକୁ ଗୁଇନ୍ଦା ସୂଚନା ମିଳିଥିଲା । ଆଜି କେନ୍ଦ୍ରୀୟ ଫୋର୍ସ ଓ ସ୍ଥାନୀୟ ପୋଲିସର ସଶସ୍ତ୍ର ଫୋର୍ସ ଦ୍ବାରା ଜଙ୍ଗଲରେ ମିଳିତ ସର୍ଚ୍ଚ ଅପରେସନ ଆରମ୍ଭ କରାଯାଇଥିଲା । ଆଜି ସକାଳେ ସଶସ୍ତ୍ର ନକ୍ସଲଙ୍କ ସହ ମୁହାଁମୁହିଁ ହେବା ସହ ଗୁଳି ବିନିୟମ ହୋଇଥିଲା । ଏଥିରେ ୩ ଜଣ ନକ୍ସଲ ନିପାତ ହୋଇଛନ୍ତି । ୩ ନକ୍ସଲଙ୍କ ମୃତଦେହ, ଏକାଧିକ ମାରଣାସ୍ତ୍ର ଓ କିଛି ମାଓ ସାମଗ୍ରୀ ମଧ୍ୟ ଘଟଣାସ୍ଥଳରୁ ଜବତ ହୋଇଛି । ଅନ୍ୟ କିଛି ନକ୍ସଲ ଜଙ୍ଗଲ ମଧ୍ୟକୁ ଖସିଯାଇଥିବା ସନ୍ଦେହରେ ଏବେ ମଧ୍ୟ ସର୍ଚ୍ଚ ଅପରେସନ ଜାରି ରହିଛି ।
| ଏହା ମଧ୍ୟ ପଢନ୍ତୁ:- ଛତିଶଗଡରେ ନକ୍ସଲଙ୍କ ବଡ଼ ଆକ୍ରମଣ, ୮ ଯବାନ ଶହୀଦ - BIJAPUR NAXAL ATTACK |