ନୂଆଦିଲ୍ଲୀ: ଭାରତ ବାୟୋଟେକର କୋଭିଡ ଟିକା କୋଭାକ୍ସିନକୁ ନେଇ ଆସିଲା ବଡ଼ ଖବର । କୋଭିସିଲ୍ଡ ଭଳି କୋଭାକ୍ସିନରେ ମଧ୍ୟ ଦେଖାଯାଉଛି ପାର୍ଶ୍ବ ପ୍ରତିକ୍ରିୟା । ବନାରସ ହିନ୍ଦୁ ବିଶ୍ବବିଦ୍ୟାଳୟ (ବିଏଚୟୁ) ପକ୍ଷରୁ କୋଭାକ୍ସିନ ଟିକାର ଦୀର୍ଘମିଆଦି ପ୍ରଭାବକୁ ଅଧ୍ୟୟନ କରାଯାଇଥିଲା । ଅଧ୍ୟୟନରୁ ଜଣାପଡିଛି ଯେ, କୋଭାକ୍ସିନ ନେଇଥିବା ଏକ ତୃତୀୟାଂଶ ଲୋକଙ୍କ ମଧ୍ୟରେ 'ବିଶେଷ ପ୍ରତିକୂଳ ପ୍ରଭାବ' ଅଥବା 'AESI' (Adverse effects of special interest) ଦେଖିବାକୁ ମିଳିଛି । ୩୦ ପ୍ରତିଶତ ଲୋକେ ଗୁରୁତର ରୋଗର ସାମ୍ନା କରୁଥିବା ଅଧ୍ୟୟନରେ ଦାବି କରାଯାଇଛି ।
ରିପୋର୍ଟ ଅନୁଯାୟୀ, ବିଏଚୟୁ ଭ୍ୟାକ୍ସିନ ନେଇଥିବା ୯୨୬ ଜଣଙ୍କ ଉପରେ ଅଧ୍ୟୟନ କରିଥିଲା । ସେମାନଙ୍କ ମଧ୍ୟରେ ୬୩୫ କିଶୋର ଓ ୨୯୧ ପ୍ରାପ୍ତ ବୟସ୍କ ସାମିଲ ରହିଥିଲେ । ଯେଉଁଥିରେ ଏକ ତୃତୀୟାଂଶ ଲୋକେ ଏଇଏସଆଇ ରିପୋର୍ଟ କରିଥିଲେ । ଏହି ବ୍ୟକ୍ତିମାନଙ୍କ ଠାରେ ଷ୍ଟ୍ରୋକ ଓ ଗିଲେନବାର ସିଣ୍ଡ୍ରୋମ ଭଳି ଗୁରୁତର ଏଇଏସଆଇ ଲକ୍ଷଣ ଦେଖିବାକୁ ମିଳିଥିଲା । କିଶୋରଙ୍କ ଠାରେ ଦେଖାଯାଇଥିବା ଆଇଏସଆଇ ମଧ୍ୟରେ ସାଧାରଣ ସମସ୍ୟା, ଚର୍ମ ଓ ଚର୍ମତଳି ରୋଗ ଓ ସ୍ନାୟୁପ୍ରଣାଳୀରେ ସମସ୍ୟା ଆଦି ରହିଥିଲା । ସେହିପରି ପ୍ରାପ୍ତବୟସ୍କଙ୍କ ଠାରେ ମାଂସପେଶୀ ଓ ଅସ୍ଥି ସମସ୍ୟା, ସ୍ନାୟୁରୋଗ ସହ ସାଧାରଣ ସମସ୍ୟା ଦେଖାଯାଇଥିଲା । ସେଥିମଧ୍ୟରେ ଉପର ଶ୍ବାସନଳୀରେ ସଂକ୍ରମଣ ସବୁଠୁ ସାଧାରଣ ଅଭିଯୋଗ ରହିଥିଲା । ଅନ୍ୟ ପାର୍ଶ୍ବପ୍ରତିକ୍ରିୟା ମଧ୍ୟରେ ମାଂସପେଶୀ ରୋଗ, ଋତୁସ୍ରାବ ଅନିୟମିତା, ଆଖି ସମସ୍ୟା ଇତ୍ୟାଦି ଅନ୍ତର୍ଭୁକ୍ତ ।