ଚାରି ମହଲା ବିଲ୍ଡିଂରେ ଲାଗିଲା ନିଆଁ, 4 ଜୀବନ୍ତ ଦଗ୍ଧ

Fire Incident in Delhi: ଦିଲ୍ଲୀର ଏକ ଚାରି ମହଲା ବିଲ୍ଡିଂରେ ଅଗ୍ନିକାଣ୍ଡ ଘଟିବାରୁ 4 ଜଣ ଜୀବନ୍ତ ଦଗ୍ଧ । ନିଆଁକୁ ଆୟତ୍ତ କଲା ଅଗ୍ନିଶମ ବିଭାଗ । ଅଧିକ ପଢନ୍ତୁ

ନୂଆଦିଲ୍ଲୀ:ରାଜଧାନୀ ଦିଲ୍ଲୀରେ ଭୟାବହ ଅଗ୍ନିକାଣ୍ଡ । ଏକ ଚାରି ମହଲା ବିଲ୍ଡିଂରେ ନିଆଁ ଲାଗିବାରୁ 4 ଜଣଙ୍କର ମୃତ୍ୟୁ ହୋଇଥିବା ସୂଚନା । ମୃତକଙ୍କ ମଧ୍ୟରେ 2 ଜଣ ଶିଶୁ ରହିଛନ୍ତି । ଦିଲ୍ଲୀର ଗୀତା କଲୋନୀ ପୋଲିସ ଷ୍ଟେସନ ଅଞ୍ଚଳର ଶାସ୍ତ୍ରୀନଗରରେ ଏହି ଘଟଣା ଘଟିଛି । ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଥିବା ବେଳେ ଅଗ୍ନିଶମ ବାହିନୀ ଦ୍ୱାରା ନିଆଁକୁ ଆୟତ୍ତ କରାଯାଇଛି । ମୃତକଙ୍କ ପରିଚୟ ବର୍ତ୍ତମାନ ସୁଦ୍ଧା ମିଳିପାରି ନାହିଁ । ଅଗ୍ନିକାଣ୍ଡ ସମୟରେ ବିଲ୍ଡିଂର ଏକ ଘର ଭିତରେ 9 ଜଣ ଫସି ରହିଥିଲେ ।

ଅଗ୍ନିକାଣ୍ଡ ନେଇ ଶାହଦରା ଜିଲ୍ଲା ଡିସିପି ସୁରେନ୍ଦ୍ର ଚୌଧୁରୀ କହିଛନ୍ତି ଯେ, ଆଜି ଭୋର୍ 5ଟା ସମୟରେ ଶାସ୍ତ୍ରୀନଗରର 13 ନମ୍ବର ଲେନରେ ଥିବା ଏକ କୋଠା ଘରେ ନିଆଁ ଲାଗିଥିବା ଖବର ଆସିଥିଲା । ଏହାପରେ ସଙ୍ଗେ ସଙ୍ଗେ ଅଗ୍ନିଶମ ଗାଡି ଓ ପୋଲିସ ଘଟଣାସ୍ଥଳରେ ପହଞ୍ଚିଥିଲା । 9 ଜଣଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେମାନଙ୍କ ମଧ୍ୟରେ 4 ଜଣଙ୍କର ମୃତ୍ୟୁ ହୋଇଛି । ଅଗ୍ନିଶମ ବିଭାଗ ନିଆଁଲିଭା କାର୍ଯ୍ୟରେ ନିୟୋଜିତ ରହିଛନ୍ତି । ଅଗ୍ନିକାଣ୍ଡ ପରେ ପୁରା ବିଲ୍ଡିଂ ଧୂଆଁମୟ ହୋଇଯାଇଥିଲା । ମୃତଦେହକୁ ଉଦ୍ଧାର କରାଯାଇ ପୋଷ୍ଟମର୍ଟମ ପାଇଁ ପଠାଯାଇଛି । ତେବେ ବେସମେଣ୍ଟରେ ପାର୍କିଂ ହୋଇଥିବା ଗାଡିରେ ନିଆଁ ଲାଗିବାରୁ ଏହା କୋଠାକୁ ବ୍ୟାପିଥିବା ପ୍ରାଥମିକ ଅନୁସନ୍ଧାନରୁ ଅନୁମାନ କରାଯାଉଥିବା ଅଗ୍ନିଶମ ଅଧିକାରୀ କହିଛନ୍ତି ।

ଗତ ଫେବୃଆରୀ 15 ତାରିଖରେ ରାଜଧାନୀ ଦିଲ୍ଲୀରେ ଦୁଇଟି ରଙ୍ଗ କାରଖାନା ଓ କେମିକାଲ କାରଖାନାରେ ଅଗ୍ନିକାଣ୍ଡ ଘଟିଥିଲା । ଏଥିରେ 11 ଜଣଙ୍କର ମୃତ୍ୟୁ ହୋଇଥିଲା । ଅଗ୍ନିକାଣ୍ଡରେ 4ଜଣ ଆହତ ହୋଇଥିବା ବେଳେ ଲକ୍ଷ ଲକ୍ଷ ଟଙ୍କାର ସାମଗ୍ରୀ ଜଳିଯାଇଥିଲା । ଏନେଇ ଖବର ପାଇବା ପରେ ଘଟଣାସ୍ଥଳରେ ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲା । ଆଲିପୁର ଅଞ୍ଚଳରେ ଥିବା ରାସାୟନିକ କାରଖାନାରେ ପ୍ରଥମେ ଅଗ୍ନିକାଣ୍ଡ ଘଟିଥିଲା । ପରେ ଏହା ରଙ୍ଗ କାରଖାନାକୁ ବ୍ୟାପିଥିଲା । ସ୍ଥାନୀୟ ଲୋକେ ସଙ୍ଗେ ସଙ୍ଗେ ଦମକଳ ବାହିନୀକୁ ଖବର ଦେବାରୁ ନିଆଁକୁ ଆୟତ୍ତ କରାଯାଇଥିଲା । ଜାନୁଆରୀ 19 ତାରିଖରେ ଉତ୍ତର ଦିଲ୍ଲୀର ପିତାମପୁରା ଅଞ୍ଚଳରେ ଭୟାବହ ଅଗ୍ନିକାଣ୍ଡ ଘଟିଥିଲା । ଗୋଟିଏ ଘରେ ନିଆଁ ଲାଗିବାରୁ 6 ଜଣ ଜୀବନ୍ତ ଦଗ୍ଧ ହୋଇଯାଇଥିଲେ ।