ନୂଆଦିଲ୍ଲୀ:‘‘ଭାରତର ସୁରକ୍ଷାକୁ କ୍ଷୂର୍ଣ୍ଣ କରିବା କରି କୌଣସି କାର୍ଯ୍ୟ ମାଳଦ୍ୱୀପ କରିବ ନାହିଁ । ନୂଆଦିଲ୍ଲୀକୁ ଏକ ଦୃଢ ସହଯୋଗୀ ତଥା ବନ୍ଧୁ ଭାବରେ ମାଳଦ୍ବୀପ ବିଚାର କରିଆସିଛି । ଆଗକୁ ମଧ୍ୟ ଏହା ଜାରି ରହିବ । ପ୍ରତିରକ୍ଷା ସମେତ ବିଭିନ୍ନ କ୍ଷେତ୍ରରେ ସହଯୋଗ ସବୁବେଳେ ପ୍ରାଥମିକତା ହେବ ।’’ ‘ଇଣ୍ଡିଆ-ଆଉଟ’ କ୍ୟାମ୍ପେନର ନେତୃତ୍ବ ନେଇ ଆରବ ସାଗରୀୟ ଦ୍ବୀପପୂଞ୍ଜ ରାଷ୍ଟ୍ର ମାଳଦ୍ବୀପର ରାଷ୍ଟ୍ରପତି ହୋଇଥିବା ପରବର୍ତ୍ତୀ ସମୟରେ ଭାରତ ବିରୋଧୀ ନୀତି ପାଇଁ ଚର୍ଚ୍ଚାରେ ଥିବା ମହମ୍ମଦ ମୁଇଜୁ ନିଜ ପ୍ରଥମ ଦ୍ବିପାକ୍ଷିକ ଭାରତ ଗସ୍ତ ସମୟରେ ଏପରି ୟୁ-ଟର୍ଣ୍ଣ ମନ୍ତବ୍ୟ ଦେଇଛନ୍ତି । ଗତକାଲି 5 ଦିନିଆ ଭାରତ ଗସ୍ତରେ ଆସିଥିବା ମୁଇଜୁ ଆଜି ଔପଚାରିକ ଭାବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ସାକ୍ଷାତ ଓ ଆଲୋଚନା କରିଛନ୍ତି । ଏହା ପରେ ମୁଇଜୁଙ୍କ ଭାରତ ପ୍ରତି ଏହି ବନ୍ଧୁତ୍ବପୂର୍ଣ୍ଣ ମନ୍ତବ୍ୟ ସାମ୍ନାକୁ ଆସିଛି ।
- ମୁଇଜୁଙ୍କ ପ୍ରଥମ ଦ୍ବିପାକ୍ଷିକ ଗସ୍ତ:-
ଗତକାଲି 5 ଦିନିଆ ଭାରତ ଗସ୍ତରେ ଆସିଛନ୍ତି ମୁଇଜୁ । ରାଷ୍ଟ୍ରପତି ନିର୍ବାଚିତ ହେବା ପରେ ମୁଇଜୁଙ୍କ ଏହା ପ୍ରଥମ ଦ୍ବିପାକ୍ଷିକ ଭାରତ ଗସ୍ତ । ପୂର୍ବରୁ ସେ ମୋଦି 3.0 ର ଶପଥ ସମ୍ମିଳନୀରେ ପାଇଁ ଦିଲ୍ଲୀ ଆସିଥିଲେ । ଗତକାଲି ଅପରାହ୍ନରେ ଦିଲ୍ଲୀ ବିମାନ ବନ୍ଦରରେ ଭାରତୀୟ ପ୍ରତିନିଧି ମଣ୍ଡଳୀ ତାଙ୍କୁ ସ୍ବାଗତ କରିଥିଲେ । ଆଜି ସେ ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୋପଦୀ ମୁର୍ମୁଙ୍କୁ ସାକ୍ଷାତ କରିବା ପରେ ହାଇଦ୍ରାବାଦ ହାଉସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସାକ୍ଷାତ କରିଛନ୍ତି ।
- ମୋଦି-ମୁଇଜୁ ଦ୍ବିପାକ୍ଷିକ ଆଲୋଚନା ଆରମ୍ଭ:
ଔପଚାରିକ ସାକ୍ଷାତ ଓ ବାର୍ତ୍ତାଳାପ ପରେ ଦୁଇ ଦେଶର ଉଚ୍ଚସ୍ତରୀୟ ପ୍ରତନିଧି ମଣ୍ଡଳୀ ମଧ୍ୟରେ ଦ୍ବିପାକ୍ଷିକ ଆଲୋଚନା ଆରମ୍ଭ ହୋଇଛି । ଏଥିରେ ପ୍ରଧାନମନ୍ତ୍ରୀ ମୋଦି ଓ ଅତିଥି ରାଷ୍ଟ୍ରପତି ମୁଇଜୁଙ୍କ ସହ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବିଦେଶ ମନ୍ତ୍ରୀ ଜୟଶଙ୍କର ଓ ଦୁଇ ପକ୍ଷର ବରିଷ୍ଠ ଅଧିକାରୀମାନେ ସାମିଲ ହେଇଛନ୍ତି । ଦୁଇଦେଶ ମଧ୍ୟର ପ୍ରତିରକ୍ଷା, ବାଣିଜ୍ୟ, ପର୍ଯ୍ୟଟନ ଓ ଅନ୍ୟାନ୍ୟ ଗୁରୁତ୍ବପୂର୍ଣ୍ଣ ଦିଗ ଉପରେ ଏହି ଆଲୋଚନା ହେଉଛି ।
- ଇଣ୍ଡିଆ ଆଉଟ କ୍ୟାମ୍ପେନର ନେତୃତ୍ବ ନେଇଥିଲେ:-
ମାଳଦ୍ବୀପରେ ଭାରତୀୟ ସେନା ମୁତୟନକୁ ନେଇ ପ୍ରଥମରୁ ମୁଇଜୁଙ୍କ ବିରୋଧ ରହିଆସିଛି । ନିର୍ବାଚନ ଲଢିବା ବେଳେ ସେ ଏହି ପ୍ରସଙ୍ଗକୁ ମୁଦ୍ଦା କରିଥିଲେ । ସେ କ୍ଷମତାକୁ ଆସିଲେ ଭାରତୀୟ ଫୋର୍ସ ମାଳଦ୍ବୀପରୁ ପ୍ରତ୍ୟାହାର କରିବେ ବୋଲି ଘୋଷଣା କରିଥିଲେ । ନିର୍ବାଚନ ଜିତି ରାଷ୍ଟ୍ରପତି ହେବା ପରେ ସେ ଏହାକୁ କାର୍ଯ୍ୟକାରୀ କରିବା ପାଇଁ ନୂଆଦିଲ୍ଲୀ ଉପରେ ଚାପ ମଧ୍ୟ ସୃଷ୍ଚି କରିଥିଲେ ।
- ଭାରତ-ମାଳଦ୍ବିପ ତିକ୍ତତା:-
ମୋଦିଙ୍କ ଲାକ୍ଷାଦ୍ବୀପ ଗସ୍ତରେ ପର୍ଯ୍ୟଟନ ବିବାଦ ଆରମ୍ଭ ହୋଇଥିଲା । ମୁଇଜୁ ଓ ତାଙ୍କ ସରକାରର ଏକାଧିକ ମନ୍ତ୍ରୀ ମୋଦିଙ୍କ ଏହି ଗସ୍ତକୁ ସମାଲୋଚନା କରିବା ସହ ମାଳଦ୍ବୀପ ପର୍ଯ୍ୟଟନ ବ୍ୟାପାର ସହ ଯୋଡିଥିଲେ । ଏହାକୁ ନେଇ ଦୁଇ ଦେଶରେ ଦ୍ବିପାକ୍ଷିକ ସମ୍ପର୍କ ମଧ୍ୟ ପ୍ରଭାବିତ ହୋଇଥିଲା । ମୁଇଜୁ ଜଣେ ଚୀନ ଅନୁଗାମୀ ନେତା ଭାବେ ଜଣାଶୁଣା । ବେଜିଂର ପ୍ରରୋଚନାରେ ସେ ଏପରି କରୁଥିବା ଚର୍ଚ୍ଚା ହୁଏ ।