ଭୁବନେଶ୍ୱର: ଓଡ଼ିଆ ନବବର୍ଷ ପୂର୍ବରୁ ସରିବ ବିଜେଡି ସମସ୍ତ ସଂଗଠନ ନିର୍ବାଚନ ପ୍ରକ୍ରିୟା । ଦଳକୁ ମିଳିବ ନୂଆ ମଙ୍ଗୁଆଳ । ଜିଲ୍ଲା, ବ୍ଲକ ଓ ପଞ୍ଚାୟତ ସଭାପତି ନିଯୁକ୍ତ ହେବେ । ସେହିପରି ପଞ୍ଚାୟତ ନିର୍ବାଚନରେ ଭଲ ଫଳାଫଳ କରିବା ଲାଗି ଏବେଠୁ ଫୋକସ କରି କାର୍ଯ୍ୟକ୍ରମ ହାତକୁ ନେଉଛି ବିଜେଡି ।
ବିଜେଡି ସମନ୍ୱୟ କମିଟି ବୈଠକ:
ବିଜୁ ଜନତା ଦଳ ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ଆଜି (ସୋମବାର) ଦଳର ସମନ୍ୱୟ କମିଟି ବୈଠକ ଅନୁଷ୍ଠିତ ହୋଇଛି । ସମନ୍ୱୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ବସିଛି ଏହି ବୈଠକ । ବୈଠକରେ ଉପଦେଷ୍ଟା କମିଟି ଅଧ୍ୟକ୍ଷ ପ୍ରସନ୍ନ ଆଚାର୍ଯ୍ୟଙ୍କ ସମେତ ସମନ୍ୱୟ କମିଟିର 13 ଜଣ ସଦସ୍ୟ ଶଙ୍ଖ ଭବନରେ ଉପସ୍ଥିତ ଥିଲେ । ବାକି ସମସ୍ତେ ଭିସି ଜରିଆରେ ଯୋଡି ହୋଇଥିଲେ । ବୈଠକରେ ବିଜେଡିର ସଂଗଠନ ନିର୍ବାଚନ ସମ୍ପର୍କରେ ଆଲୋଚନା ହୋଇଛି । ଦଳର ରାଜ୍ୟ ନିର୍ବାଚନ ଅଧିକାରୀ ପ୍ରତାପ ଦେବ ମଧ୍ୟ ବୈଠକରେ ସାମିଲ ହୋଇଥିଲେ । ନିର୍ବାଚନ ସମ୍ପର୍କରେ ସେ ସମସ୍ତ ତଥ୍ୟ ଉପସ୍ଥାପନ କରିଥିଲେ ।
ଓଡ଼ିଶା ନବବର୍ଷ ପୂର୍ବରୁ ସରିବ ଦଳର ସାଂଗଠନିକ ନିର୍ବାଚନ:
ବିଜେଡି ନେତା ପ୍ରଦୀପ କୁମାର ଅମାତ କହିଛନ୍ତି, "ଠିକ ଭାବେ ନିର୍ବାଚନ ପରିଚାଳନା ପାଇଁ ନିର୍ବାଚନ ମଣ୍ଡଳୀ ନେତା ଓ ଜିଲ୍ଲା ନେତାଙ୍କ ସହ ଆଲୋଚନା କରି କାମ ଆରମ୍ଭ କାର୍ଯ୍ୟକ୍ରମ ହୋଇଛି । ଫେବୃଆରୀ ପ୍ରଥମ ସପ୍ତାହରେ ଜିଲ୍ଲା ନିର୍ବାଚନ ଅଧିକାରୀ ନିଯୁକ୍ତି ହେବେ । ତା'ପରେ ନିର୍ବାଚନ ମଣ୍ଡଳୀ ନିର୍ବାଚନ ଅଧିକାରୀ ନିଯୁକ୍ତି ପାଇବେ । ନିର୍ବାଚନ ପ୍ରକ୍ରିୟା ଓଡ଼ିଆ ନବବର୍ଷ ପୂର୍ବରୁ ସରିବ । ଏଥିରେ କାର୍ଯ୍ୟକାରିଣୀ କମିଟି ସଦସ୍ୟ, ଷ୍ଟେଟ କାଉନସିଲ ସଦସ୍ୟ ବି ନିର୍ବାଚିତ ହେବେ । ଏହା ସହ ଦଳୀୟ ସଭାପତି ନିର୍ବାଚନ ହେବେ । ଦଳରେ ବରିଷ୍ଠ ଓ କନିଷ୍ଠ କିଛି ନାହିଁ । ହାତରେ ହାତ ମିଶେଇ, ସହଭାଗିତାରେ ଦଳ ଆଗେଇ ଚାଲିଛି । ମେଳି ବାନ୍ଧିବା ସମସ୍ୟା ବିଜେଡିରେ ହୋଇନାହିଁ । ହେବାର ସମ୍ଭାବନା ମଧ୍ୟ ନାହିଁ । ବରିଷ୍ଠ ଓ ଯୁବଙ୍କ ସମନ୍ୱୟରେ କାର୍ଯ୍ୟକ୍ରମ ଆଗେଇ ଚାଲିବ ।"
ନବୀନ ପଟ୍ଟନାୟକ ପୁନର୍ବାର ଆମର ସଭାପତି ହେବେ:
ସେହିପରି ସମନ୍ୱୟ କମିଟି ସଦସ୍ୟ ମହେଶ ସାହୁ କହିଛନ୍ତି, "ମାର୍ଚ୍ଚ 31 ସୁଦ୍ଧା କିମ୍ବା ଓଡ଼ିଆ ନୂଆବର୍ଷ ପୂର୍ବରୁ ସାଂଗଠନିକ ନିର୍ବାଚନ ପ୍ରକ୍ରିୟା ଶେଷ ହେବ । ନିର୍ବାଚନ ମଣ୍ଡଳୀ ନେତାଙ୍କ ସହ ଆଲୋଚନା କରି ୱାର୍ଡ, ପଂଚାୟତ, ବ୍ଲକ, ଏନଏସି ନେତା ଚୟନ ହେବେ । ନବୀନ ପଟ୍ଟନାୟକ ପୁନର୍ବାର ଆମର ସଭାପତି ହେବେ । ଏଥିରେ ସନ୍ଦେହ ନାହିଁ । ଦଳରେ ନବୀନଙ୍କ ପ୍ରତିନ୍ଦ୍ୱନ୍ଦ୍ବୀ ନାହାନ୍ତି । ସଂଗଠନ, ସଦସ୍ୟ ସଂଗ୍ରହ ବାବଦରେ ଆଲୋଚନା ହୋଇଛି । ବିଜେଡିର 34 ଟି ସାଙ୍ଗଠନିକ ଜିଲ୍ଲା ରହିଛି । 23ରୁ ଅଧିକ ନିର୍ବାଚନ ମଣ୍ଡଳୀରେ ସଦସ୍ୟ ସଂଗ୍ରହ ଅଭିଯାନ ଶେଷ ହୋଇଛି । ଅନ୍ୟାନ୍ୟ ବଳକା ଅଞ୍ଚଳରେ ଚାଲିଛି । ଦଳର ନିର୍ବାଚନ ସହ ସଦସ୍ୟ ସଂଗ୍ରହ ଅଭିଯାନର ସମ୍ପର୍କ ନାହିଁ ।"
'ସଭ୍ୟ ସଂଗ୍ରହ ଅଭିଯାନକୁ ଅଧିକ କ୍ରିୟାଶୀଳ କରାଯିବ'
ଅନ୍ୟପଟେ ବିଜେଡି ନେତା ସଞ୍ଜୟ ଦାସବର୍ମା କହିଛନ୍ତି, "ବିଭିନ୍ନ ନିର୍ବାଚନ ମଣ୍ଡଳୀରେ ସାଙ୍ଗଠନିକ ପ୍ରକ୍ରିୟା ଜୋରଦାର କରାଯାଇଛି । ସମସ୍ତଙ୍କୁ ସାଙ୍ଗରେ ନେଇ କାର୍ଯ୍ୟକ୍ରମ କରିବା ସହ ସଂଗଠନକୁ ଶକ୍ତିଶାଳୀ କରାଯିବ । ସଭ୍ୟ ସଂଗ୍ରହ ଅଭିଯାନକୁ ଅଧିକ କ୍ରିୟାଶୀଳ କରାଯିବ । ସେଥିପାଇଁ କିଛି ନିର୍ଦ୍ଦିଷ୍ଟ ନେତୃତ୍ୱକୁ ଦଳର ସଭାପତି ଦାୟିତ୍ୱ ଦେଇଛନ୍ତି । ଏହି ଉଦ୍ୟମ ତୃଣମୂଳ ସ୍ତରରେ କର୍ମୀ ମାନଙ୍କୁ ଏକଜୁଟ କରିବାରେ ସଫଳ ହେବ । ଦଳକୁ ତୃଣମୂଳ ସ୍ତରରେ ସଂଠିତ କରିବ । ଲମ୍ବା ସମୟ ଧରି ଓଡିଶାବାସୀ ନବୀନ ବାବୁଙ୍କ ଉପରେ ବିଶ୍ଵାସ ରଖିଛନ୍ତି । ଆଞ୍ଚଳିକ ଦଳ ହିସାବରେ ଆଜି ବି ବିଜେଡି ଓଡିଶାବାସୀଙ୍କ ଅଗ୍ରାଧିକାର ରହିଛି । ବିରୋଧୀ ଦଳର ଭୂମିକା ସମର୍ପିତ ଭାବେ ନିର୍ବାହ କରିବା ଆମ ଦାୟିତ୍ୱ । ସେହି ଦାୟିତ୍ୱ ନବୀନଙ୍କ ନେତୃତ୍ୱରେ ଓଡିଶାବାସୀଙ୍କ ବିଭିନ୍ନ ସମସ୍ୟା ସମାଧାନ କରିବା ଆମ ପାଇଁ ଚ୍ୟାଲେଞ୍ଜ ।"
ଇଟିଭି ଭାରତ, ଭୁବନେଶ୍ୱର
