ରାଞ୍ଚି:ଆସନ୍ତାକାଲି (ସୋମବାର) ଫ୍ଲୋରଟେଷ୍ଟରେ ଅଂଶଗ୍ରହଣ କରିବା ପାଇଁ ଶୁକ୍ରବାର ଠାରୁ ହାଇଦ୍ରାବାଦରେ ଥିବା ଜେଏମଏମ-କଂଗ୍ରେସ ବିଧାୟକମାନେ ଆଜି ରାଞ୍ଚିରେ ପହଞ୍ଚିଛନ୍ତି । ଅପରାହ୍ନରେ ହାଇଦ୍ରାବାଦରୁ ବିମାନ ଯାତ୍ରା କରିଥିବା ବିଧାୟକମାନେ ବିଳମ୍ବିତ ସଂଧ୍ୟାରେ ବିର୍ସା ମୁଣ୍ଡା ଅନ୍ତର୍ଜାତୀୟ ବିମାନ ବନ୍ଦରରେ ପହଞ୍ଚିଛନ୍ତି । ସେମାନଙ୍କ ପ୍ରକୃତ ସଂଖ୍ୟା ସମ୍ପର୍କରେ ଜଣାନଥିଲେ ସୁଦ୍ଧା ପ୍ରାୟ 40 ହେବା ନେଇ କୁହାଯାଉଛି । ବିଧାୟକମାନଙ୍କୁ ବ୍ୟକ୍ତିଗତ କାର ବ୍ୟବହାର କରିବାକୁ ଦିଆଯାଇନି । ଦୁଇଟି ବସରେ ସମସ୍ତଙ୍କୁ ସର୍କିଟ ହାଉସକୁ ନିଆଯାଇଛି । ଗଣମାଧ୍ୟମରେ ଏହି ବିଧାୟକମାନେ ମଧ୍ୟ କିଛି ପ୍ରତିକ୍ରିୟା ଦେଇନାହାନ୍ତି ।
ସେମାନେ ଆଜି ସର୍କିଟ ହାଉସରେ ରହିବେ । ଆସନ୍ତକାଲି ପୂର୍ବାହ୍ନରେ ସେମାନେ ସିଧା ସର୍କିଟ ହାଉସରୁ ବିଧାନସଭାରେ ପହଞ୍ଚିବେ । ଶୁକ୍ରବାର ସମସ୍ତ ବିଧାୟକଙ୍କୁ କଂଗ୍ରେସଶାସିତ ତେଲେଙ୍ଗାନା ରାଜଧାନୀ ହାଇଦ୍ରାବାଦକୁ ପଠାଯାଇଥିଲା । ସେଠାରେ ସେମାନେ ଦୁଇଦିନ ରହିବା ପରେ ଆଜି ଫେରିଛନ୍ତି । ଶୁକ୍ରବାର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ଚମ୍ପାଇ ସୋରେନ ସଂଖ୍ୟା ବହୁମତର ପ୍ରମାଣ ଦେବେ । ତେବେ ଚମ୍ପେଇଙ୍କ ସମର୍ଥନରେ ଆବଶ୍ୟକ ସଂଖ୍ୟକ ବିଧାୟକ ଥିବା ଚର୍ଚ୍ଚା ହେଉଛି । ତଥାପି ଆସନ୍ତାକାଲିର ଘଟଣା ଉପରେ ସମସ୍ତଙ୍କ ନଜର ରହିଛି । ହେଲେ ଆଜି ଜଣେ ଜେଏମଏମ ବିଧାୟକ ହେମନ୍ତ ସୋରେନଙ୍କ ଉପରେ ଅସନ୍ତୁଷ୍ଟ ଥିବା ଖବର ସାମ୍ନାକୁ ଆସିଥିଲା । ଆସନ୍ତାକାଲି ଗୃହରେ ଚମ୍ପାଇ ସରକାର ଆସ୍ଥା ଭୋଟର ସାମ୍ନା କରିବ ।