ପାଟନା:ଫିଲ୍ମ ଷ୍ଟାଇଲରେ ହେଲା ବିବାହ । ଶହୀଦ ଯବାନଙ୍କ ଭଉଣୀଙ୍କ ବିବାହ କରାଇଛନ୍ତି ସାଥୀ ଯବାନ । ବିହାରର ରୋହତାସ ଜିଲ୍ଲାରେ ଦେଖିବାକୁ ମିଳିଛି ଏଭଳି ନିଆରା ବିବାହ । ସୂଚନା ଅନୁସାରେ, ମାର୍ଚ୍ଚ ୪ ତାରିଖରେ ଶହୀଦ ଯବାନ ଜ୍ୟୋତି ପ୍ରକାଶ ନିରାଲାଙ୍କ ଭଉଣୀଙ୍କ ବିବାହ ଆୟୋଜିତ ହୋଇଥିଲା । ଯେଉଁଥିରେ ଯୋଗ ଦେବା ସହ ଭାଇଙ୍କ ଅନୁପସ୍ଥିତିକୁ ପୂରଣ କରିଛନ୍ତି ଅନ୍ୟ ଯବାନ । ଗୋଟିଏ କି ଦୁଇଟି ନୁହେଁ, ୧୬ ଗରୁଡ଼ କମାଣ୍ଡୋ ଆସି ଜ୍ୟୋତି ପ୍ରକାଶ ନିରାଲାଙ୍କ ଭଉଣୀଙ୍କ ବିବାହ କାର୍ଯ୍ୟକ୍ରମରେ ଯୋଗଦାନ କରିଛନ୍ତି ।
ନିଜର ଏକମାତ୍ର ଭାଇକୁ ହରାଇଥିଲେ ବି ଶୂନ୍ୟ ସ୍ଥାନ ପୂରଣ କରିବାକୁ ଆସିଥିଲେ ୧୬ ଭାଇ । ବିବାହ ଭୋଜିରେ ସମସ୍ତଙ୍କ ନଜର ଏହି ୧୬ ଭାଇଙ୍କ ଉପରେ ରହିଥିଲା । ପରମ୍ପରା ଅନୁସାରେ, ଚାରି ଜଣ ଭଉଣୀଙ୍କ ମୁଣ୍ଡ ଉପରେ ଚାଦର ଟାଣିଥିଲେ । ଅନ୍ୟ ୧୨ ଯବାନ ଭଉଣୀଙ୍କ ପାଦ ତଳେ ନିଜର ହାତ ରଖିଥିବା ଦେଖିବାକୁ ମିଳିଥିଲା । ଏପରି ଦୃଶ୍ୟ ସେଠାରେ ଉପସ୍ଥିତ ଥିବା ସମସ୍ତ ଅତିଥିଙ୍କୁ ଭାବବିହ୍ବଳ କରିଥିଲା ।
ସୂଚନା ଅନୁସାରେ, ଶହୀଦ ଗରୁଡ଼ ଯବାନ ଜ୍ୟୋତି ପ୍ରକାଶ ନିରାଲା ଅଶୋକ ଚକ୍ର ସମ୍ମାନରେ ସମ୍ମାନିତ ହୋଇଛନ୍ତି । ତେବେ ତାଙ୍କ ଭଉଣୀ ସୁନିତା ପେଶାରେ ଜଣେ ସବ ଇନସପେକ୍ଟର । ଜ୍ୟୋତି ପ୍ରକାଶ ନିରାଲା ୭ ବର୍ଷ ପୂର୍ବେ ଆତଙ୍କୀ ହମଲାରେ ଜମ୍ମୁର ବାଦୀପୁରାଠାରେ ଶହୀଦ ହୋଇଯାଇଥିଲେ । ଜ୍ୟୋତିଙ୍କ ପରିବାର ଯେପରି ନିଜ ପୁଅର ଅନୁପସ୍ଥିତିକୁ ଅନୁଭବ ନକରିବେ ସେଥିପାଇଁ ଏହି ବିବାହ କାର୍ଯ୍ୟକ୍ରମରେ ସମସ୍ତ ଦାୟିତ୍ବ ନେବାକୁ ମନସ୍ଥ କରିଥିଲେ ୧୬ ଯବାନ ।