ରାମଲାଲାଙ୍କ ପ୍ରାଣ ପ୍ରତିଷ୍ଠା ଦିବସରେ ଶୁଭିଲା କୁଆଁ କୁଆଁ ଡାକ, ଜନ୍ମ ନେଲେ 600ରୁ ଅଧିକ ଶିଶୁ

Couples welcome newborns: ରାମ ମନ୍ଦିର ପ୍ରାଣ ପ୍ରତିଷ୍ଠା ପରି ଶୁଭ ଦିନରେ ଜନ୍ମ ନେଲେ 600ରୁ ଅଧିକ ଶିଶୁ । ରାମ, ଲକ୍ଷ୍ମଣ ଓ ସୀତା ନାମରେ କରାଗଲା ନାମକରଣ । ଅଧିକ ପଢ଼ନ୍ତୁ

ହାଇଦ୍ରାବାଦ: ରାମ ମନ୍ଦିର ପ୍ରାଣ ପ୍ରତିଷ୍ଠା ଉତ୍ସବ ଯୋଗୁଁ ସୋମବାର ଉତ୍ସବମୁଖର ହୋଇ ଉଠିଥିଲା ପୁରା ଦେଶ । ରାମ ମନ୍ଦିର ପରିସର ବେଦ, ପାଠରେ ପ୍ରକମ୍ପିତ ହେଉଥିବା ବେଳେ ଦେଶର ବିଭିନ୍ନ ହସ୍ପିଟାଲରେ ଶୁଭିଥିଲା କୁଆଁ କୁଆଁ ସ୍ବର । ଏହି ପରି ଶୁଭ ଦିନରେ ଜନ୍ମଲାଭ କରିଥିବା ଜନ୍ମିତ ଶିଶୁଙ୍କ ନାମ ରାମ, ଲକ୍ଷ୍ମଣ ଓ ସୀତା ରଖାଯାଇଛି । ଦେଶର ବିଭିନ୍ନ ସ୍ଥାନର ବିଭିନ୍ନ ଡାକ୍ତରଖାନାରେ ଏକାଧିକ ଶିଶୁ ଜନ୍ମ ହୋଇଥିଲେ ।

ବିହାରରେ 500 ଶିଶୁଙ୍କ ଜନ୍ମଗ୍ରହଣ: ରାମ ମନ୍ଦିର ପ୍ରାଣ ପ୍ରତିଷ୍ଠା ଉତ୍ସବ ଦିନ ପ୍ରସବ କରାଇବାକୁ ଅନେକ ଗର୍ଭବତୀ ମହିଳା ଇଚ୍ଛା ପ୍ରକାଶ କରିଥିଲେ । ଏଥିପାଇଁ ବିହାରର ବିଭିନ୍ନ ଜିଲ୍ଲାର ଏକାଧିକ ଗର୍ଭବତୀ ମହିଳା ପାଟନା ସହରର ବିଭିନ୍ନ ହସ୍ପିଟାଲରେ ଭର୍ତ୍ତି ହୋଇଥିଲେ । ସୋମବାର ଦିନ ହସ୍ପିଟାଲଗୁଡିକରେ ପ୍ରାୟ 500 ଶିଶୁ ଜନ୍ମ ହୋଇଥିବା ସୂଚନା ମିଳିଛି । ଜନ୍ମିତ ଶିଶୁଙ୍କ ନାମ ରାମ , ଲକ୍ଷ୍ମଣ ଓ ସୀତା ରଖିଛନ୍ତି ସେମାନଙ୍କ ପିତା ମାତା ।

ପୁଅର ନାମ ରାମ ରହିମ ରଖିଲେ ମୁସଲମାନ ମହିଳା: ଉତ୍ତରପ୍ରଦେଶର ଫିରୋଜାବାଦରେ ଏକ ମୁସଲମାନ ପରିବାରରେ ଜଣେ ମହିଳା ଶିଶୁପୁତ୍ର ଜନ୍ମ ଦେଇଛନ୍ତି । ନବଜାତ ଶିଶୁର ନାମ ପରିବାର ଲୋକେ ରାମ ରହିମ ରଖିଛନ୍ତି । ସେହିପରି କର୍ଣ୍ଣାଟକର ବିଜୟପୁରର ଜେଏସଏସ ସୁପର ସ୍ପେସିଆଲିଟି ହସ୍ପିଟାଲ ସୋମବାର 20ରୁ ଅଧିକ ଶିଶୁ ଜନ୍ମ ଗ୍ରହଣ କରିଥିଲେ। ମଧ୍ୟପ୍ରଦେଶର ବିଭିନ୍ନ ଜିଲ୍ଲାରେ ଅତି କମରେ 50 ଶିଶୁ ଜନ୍ମଲାଭ କରିଥିବା ସୂଚନା ରହିଛି ।

ପ୍ରାଣ ପ୍ରତିଷ୍ଠା ପରି ଶୁଭ ଦିନରେ ପାଟନାର କଙ୍କାରବାଘଠାରେ ଥିବା ଏକ କ୍ଲିନିକରେ ପ୍ରାୟ 34 ପିଲା ଜନ୍ମ ହୋଇଥିଲେ। ସେମାନଙ୍କ ମଧ୍ୟରୁ 19 ଜଣ ପୁଅ ଏବଂ 15 ଜଣ ଝିଅ ରହିଛନ୍ତି । ଜଣେ ମୁସଲମାନ ମହିଳା କହିଛନ୍ତି ଯେ, ବିବାହରେ 5 ବର୍ଷ ପରେ ମୁଁ ମାଆ ହେବାର ସୌଭାଗ୍ୟ ଅର୍ଜନ କରିଛି । ଫେବ୍ରୁଆରୀରେ ମୋର ଡେଲିଭରି ଡେଟ ଥିଲା । କିନ୍ତୁ ହଠାତ୍ ପ୍ରସବ ବେଦନା ହେବାରୁ ମୋତେ ଡାକ୍ତରଖାନାରେ ସୋମବାର ଭର୍ତ୍ତି କରାଯାଇଥିଲା । ମୁଁ ଏକ ଶିଶୁ ପୁତ୍ରକୁ ଜନ୍ମ ଦେଇଛି । ପରିବାରରେ ସମସ୍ତେ ଖୁସି ଅଛନ୍ତି ।

ପ୍ରାଣ ପ୍ରତିଷ୍ଠା ପରି ଶୁଭ ଦିନରେ ଅନେକ ଗର୍ଭବତୀ ମହିଳା ପ୍ରସବ କରାଇବାକୁ ଇଚ୍ଛା ପ୍ରକାଶ କରିଥିଲେ । ଏଥିପାଇଁ ହସ୍ପିଟାଲରରେ ଆଗୁଆ ବୁକିଂ ହୋଇସାରିଥିଲା । ପ୍ରାକୃତିକ ପ୍ରକ୍ରିୟାରେ ପ୍ରସବ କରାଇବାକୁ ବହୁ ଗର୍ଭବତୀ ମହିଳା ଓ ତାଙ୍କ ପରିବାର ଲୋକେ ଡାକ୍ତରଙ୍କ ପରାମର୍ଶ ନେଇଥିଲେ । ଅସ୍ତ୍ରୋପଚାର ମାଧ୍ୟମରେ ନିର୍ଦ୍ଧାରିତ ସମୟ ପୂର୍ବରୁ ଏକାଧିକ ଗର୍ଭବତୀ ମହିଳା ସନ୍ତାନ ପ୍ରସବ କରାଇଛନ୍ତି ।