ରାୟପୁର: ସଡ଼କ ଦୁର୍ଘଟଣାରେ ପ୍ରାଣ ହରାଇଲେ ଛତିଶଗଡୀ ଅଭିନେତା । ଛତିଶଗଡୀ ଚଳଚ୍ଚିତ୍ରରେ ଖଳନାୟକ ଭୂମିକାରେ ଅଭିନୟ କରୁଥିବା ଅଭିନେତା ସୁରଜ ମେହେର ଆଉ ନାହାଁନ୍ତି । ଗତ(ବୁଧବାର) ବିଳମ୍ବିତ ରାତିରେ ଏକ ସଡ଼କ ଦୁର୍ଘଟଣାରେ ସୁରଜଙ୍କ ମୃତ୍ୟୁ ଘଟିଛି । ସେ "ଆଖ୍ରୀ ଫୈସଲା"ଫିଲ୍ମର ସୁଟିଂ ସାରି ଘରକୁ ଫେରୁଥିବା ବେଳେ ତାଙ୍କ କାର୍ ଦୁର୍ଘଟଣାଗସ୍ତ ହୋଇଥିଲା । ସେହିପରି ଗତ କାଲି ତାଙ୍କର ନିର୍ବନ୍ଧ ହୋଇଥିଲା । ଏକ ଦୁର୍ଘଟଣାରେ ସୁରଜଙ୍କ ଆକସ୍ମିକ ମୃତ୍ୟୁ ପରେ ଛତିଶଗଡ ଚଳଚ୍ଚିତ୍ର ଜଗତରେ ଶୋକର ଛାୟା ଖେଳିଯାଇଛି ।
ସୂଚନାଯୋଗ୍ୟ, ବିରିସପୁରର ସେନ୍ଦରୀ ଗ୍ରାମରେ ଥିବା ଶ୍ରୀରାଇସ୍ ମିଲରେ ଫିଲ୍ମ "ଆଖ୍ରୀ ଫୈସଲା" ସୁଟିଂ ପାଇଁ ଯାଇଥିଲେ ସୁରଜ । ଏହାପରେ ସୁଟିଂ ସାରି ବିଳମ୍ବିତ ରାତିରେ ନିଜ କାର୍ ଯୋଗେ ସେ ଘରକୁ ଫେରୁଥିଲେ ।ଏହି ସମୟରେ ଭିଲେଇଗଡ ସରସ୍ବିନା ଅଞ୍ଚଳରେ ଏକ ପିକଅପ୍ ଗାଡି ସହ ମୁହାଁମୁହିଁ ଧକ୍କା ହୋଇଥିଲା ।ଏହି ଦୁର୍ଘଟଣାଟି ଏତେ ଭୟଙ୍କର ଥିଲା ଯେ କାର ଆଗରେ ବସିଥିବା ସୁରଜଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିଲା ।
ତେବେ ଗତ ବୁଧବାର ସକାଳେ ସୁରଜ ମେହେରଙ୍କ ପରିବାର ଏହି ଦୁଃଖଦ ଘଟଣା ବିଷୟରେ ଖବର ପାଇଥିଲେ । ପରିବାର ଲୋକେ ସଙ୍ଗେ ସଙ୍ଗେ ଘଟଣାସ୍ଥଳରେ ପହଞ୍ଚି ସେଠାରେ ପୋଲିସ ସହାୟତାରେ ସୁରଜଙ୍କ ମୃତଦେହକୁ ସାରଙ୍ଗ ଜିଲ୍ଲା ଡାକ୍ତରଖାନାକୁ ପଠାଇଥିଲେ । ଏହି ଘଟଣାରେ ତାଙ୍କର ଅନ୍ୟ ଦୁଇ ସାଥୀ ମଧ୍ୟ ଗୁରୁତର ଆହତ ହୋଇଥିବା ଜଣାପଡ଼ିଛି । ଗୁରୁତର ଦୁଇ ଜଣ ହେଲେ ଆର୍ଯ୍ୟ ଭର୍ମା ଏବଂ ଡ୍ରାଇଭର ଭୁପେଶ ପାଟଲେ । ସେମାନଙ୍କୁ ଭିଲେଇଗଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା । କିନ୍ତୁ ସେମାନଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ବିଲାସପୁରକୁ ସ୍ତାନାନ୍ତରଣ କରାଯାଇଥିଲା ।