ନୂଆଦିଲ୍ଲୀ:କିଏ ହେବ ଆପ୍ର ମୁଖ୍ୟମନ୍ତ୍ରୀ ଚେହେରା । କାହାକୁ ବାଛିବ ଦଳ । ଅରବିନ୍ଦ କେଜ୍ରିୱାଲ ଇସ୍ତଫା ଘୋଷଣା କରିବା ପରେ ରାଜନୀତି ସରଗରମ । ଏହାରି ଭିତରେ ସିଏମ ରେସରେ ଅନେକ ଚେହେରା ଥିବା ବେଳେ କାହା ଉପରେ ବାଜିବ ଦଳର ମୋହର । ଆସନ୍ତାକାଲି ସୁଦ୍ଧା ଚିତ୍ର ସ୍ପଷ୍ଟ ହୋଇପାରେ । ଆସନ୍ତାକାଲି(ସେପ୍ଟେମ୍ବର 17) ସକାଳ 11.30ରେ ବସିବାକୁ ଯାଉଛି ଆମ ଆଦମି ପାର୍ଟିର ବିଧାୟକ ଦଳ ବୈଠକ । ଏଥିରେ ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବେ ତାହା ଉପରେ ହେବ ଚର୍ଚ୍ଚା । ସେପଟେ ଆସନ୍ତାକାଲି ଇସ୍ତଫା ଦେବେ କେଜ୍ରିୱାଲ । ଉପରାଜ୍ୟପାଳଙ୍କୁ ଭେଟିବାକୁ ମାଗିଲେ ସମୟ ।
11.30ରେ ବିଧାୟକ ଦଳ ବୈଠକ:
ଏନେଇ ଦଳ କହିଛି ଆସନ୍ତାକାଲି(ମଙ୍ଗଳବାର) 11.30ରେ AAP (ଆପ)ର ବିଧାୟକ ଦଳ ବୈଠକ ବସିବ । ଏଥିରେ ସିଏମ କିଏ ହେବ ତାହା ଉପରେ ଆଲୋଚନା ହେବ । ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବ ତାହା ଉପରେ ଦଳର ମୋହର ବାଜିପାରେ ।
ଉପରାଜ୍ୟପାଳଙ୍କୁ ଭେଟିବେ କେଜ୍ରିୱାଲ:
ପୂର୍ବ ଘୋଷଣା ଅନୁସାରେ ଆସନ୍ତାକାଲି ଇସ୍ତଫା ଦେବେ କେଜ୍ରିୱାଲ । ଏଥିପାଇଁ ସେ ଦିଲ୍ଲୀ ଉପରାଜ୍ୟପାଳଙ୍କୁ ସମୟ ମାଗିଛନ୍ତି । ଆସନ୍ତାକାଲି ଅପରାହ୍ନ 4.30ରେ ସେ ଉପରାଜ୍ୟପାଳଙ୍କୁ ଭେଟି ଇସ୍ତଫା ଦେଇପାରନ୍ତି । ସେପଟେ ଆସନ୍ତାକାଲି ପ୍ରଧାନମନ୍ତ୍ରୀଙ୍କ ଜନ୍ମ ଦିନ । ଆଉ କାଲିର ଦିନରେ ଇସ୍ତଫା ଦେବେ କେଜ୍ରିୱାଲ । ଯାହାକୁ ନେଇ ଚର୍ଚ୍ଚା ବେଶ ଜୋର ଧରିଛି ।