बापरे! मतदान केंद्रात निघाला विषारी साप, मतदार गोंधळले - Lok Sabha Election 2024

नागपूर Lok Sabha Election 2024 : लोकसभा निवडणूक 2024 च्या मतदानाला आजपासून (19 एप्रिल) सुरुवात झाली. पूर्व विदर्भातील नागपूर, रामटेक, भंडारा-गोंदिया, गडचिरोली-चिमूर आणि चंद्रपूर या पाच मतदारसंघात आज मतदान होत आहे. सकाळी सातवाजेपासून मतदानाला सुरुवात झाली असून उन्हाचा तडाखा असल्यानं नागरिकांनी सकाळीच मतदान केंद्रांवर गर्दी करण्यास सुरुवात केली. मात्र, यादरम्यान नागपुरातील एका मतदान केंद्रावर मतदान सुरू असताना अचानक खळबळ उडाल्याचं पाहायला मिळालं. केडीके महाविद्यालयातील लोकसभा निवडणुकीच्या मतदान कक्ष क्र. पाचच्या बाहेर सकाळी दहा वाजेच्या सुमारास सापानं प्रवेश केला. मोहनीष मोहाडीकर हा तरुण मतदानासाठी रांगेत उभा असताना अचानक त्याचं लक्ष या सापकडं गेलं आणि त्याने आरडाओरड केली. साप पाहून तिथे उपस्थित मतदार दूर पळायला लागले, त्यामुळं काही वेळ मतदानही थांबलं. त्यानंतर वाईल्ड लाईफ सोसायटीचे नितेश भांदक्कर यांना हा प्रकार कळविण्यात आला. माहिती मिळताच भांदक्कर यांनी रूपचंद वैद्य, लकी खलोडे यांच्यासह घटनास्थळी धाव घेत सापाला पकडून जंगलात सोडून दिलं. त्यानंतर पुन्हा एकदा मतदान प्रक्रियेला सुरुवात करण्यात आली.