शिर्डी(अहमदनगर) Raksha Bandhan 2024 : शिर्डीमध्ये रक्षाबंधन सण उत्साहात साजरा केला जात आहे. साईंच्या दर्शनासाठी भाविकांनी शिर्डीत गर्दी (Shirdi Saibaba Raksha Bandhan 2024) केली आहे. तसंच साईबाबांना राखी बांधण्यासाठीही भाविक गर्दी करत आहेत. बिलासपूर येथील एका साईभक्त परिवारानं तब्बल 36 फूट लांब राखी साईबाबांना अर्पण केली.
35 किलो वजनाची राखी : देशभरातील लाखो भगिनींनी रक्षाबंधनानिमित्तानं साईबाबांना राख्या पाठवल्या आहेत. सर्वांचं लक्ष वेधुन घेतेय ती एक आगळीवेगळी आणि अवाढव्य राखी. छत्तीसगड राज्यातील बिलासपूर येथील एका साईभक्त परिवाराकडून 35 किलो वजनाची 36 फूट लांब व 5 फूट रुंद अशी राखी साईबाबांच्या चरणी अर्पण केली. ही भव्य राखी कलाकार दिलीप दिवाकर पात्रीकर यांनी 10 दिवसांत बनवली. फायबर प्लाय, मोती, जडी-बुटी, जरी यापासून ही राखी तयार करण्यात आली. सुबक आणि सुंदर कारागिरी या राखीवर करण्यात आली. साईबाबांनी आपल्या अंतिम समयी भक्त लक्ष्मीबाई शिंदे यांना नवविधा भक्ती म्हणून नऊ नाणी दिली होती. ही थीम या राखीमध्ये समाविष्ट केली आहे. प्रत्येक नाणी ही श्रीमद भागवत आणि श्री रामचरितमानस यांच्या नवविधा भक्तीचं एक वैशिष्ट्य दर्शवते. तेच या राखीमध्ये समाविष्ट केलं असल्याचं प्रबोधराव यांनी सांगितलं.
भव्य राखी साईबाबांना अर्पण : ही राखी मोठी असल्यानं साईबाबांच्या मंदिरात न ठेवता मंदिर परिसरात ठेवण्यात आली. साईबाबा संस्‍थानच्‍या वतीनं मुख्य कार्यकारी अधिकारी गोरक्ष गाडीलकर व त्‍यांच्‍या पत्‍नी वंदिना गाडीलकर, उपमुख्‍य कार्यकारी अधिकारी तुकाराम हुलवळे व त्‍यांच्‍या पत्‍नी ज्‍योती हुलवळे तसंच राखी देणगीदार साईभक्त प्रबोधराव यांच्या हस्ते या राखीचे विधीवत पूजन करण्यात आलं. यावेळी मंदिर विभागप्रमुख विष्‍णू थोरात, जनसंपर्क अधिकारी तुषार शेळके, मंदिर पुजारी व कर्मचारी उपस्थित होते.