झोपड्यांवर महापालिकेची करवाई: पवईत पोलिसांवर जमावाची दगडफेक, 5 पोलीस जखमी - Stone Pelting On Mumbai Police

Stone Pelting On Mumbai Police :पवईतील झोपडपट्टी परिसरात अतिक्रमणावर कारवाई करण्यासाठी गेलेल्या पोलिसांवर जमावानं दगडफेक केली. या दगडफेकीत 5 पोलीस जवान जखमी झाले आहेत. पवईतील झोपडपट्टी वाचवा आंदोलन चिघळलं असून या परिसरात संतप्त जमाव चालून आला आहे. पवईतील 800 झोपड्यांना मुंबई महापालिकेनं अवैध ठरवलं आहे. त्यांच्यावर कारवाई करण्यासाठी महापालिका अधिकारी पोलीस फौजफाट्यांसह गेले होते. त्यावेळी ही दगडफेक करण्यात आली.

मुंबई Stone Pelting On Mumbai Police : निवडणुका संपल्यानंतर पालिकेने पुन्हा एकदा अनधिकृत बांधकामांवर हातोडा चालवण्यास सुरुवात केलीय. काही दिवसांपूर्वीच पालखीनं अंधेरी येथे अनधिकृत बांधकामावर जेसीबी चालवला. अंधेरी येथे पालिकेनं तीन इमारती पाडल्या. त्यानंतर आता पालिका एस विभागातील पवई मधील जय भीम नगर येथे अनधिकृत बांधकामावर कारवाई करण्याचं काम पालिकेनं हाती घेतलं आहे. पालिकेचे कर्मचारी आणि मुंबई पोलीस मिळून ही कारवाई करण्यासाठी पवई जय भीम नगर येथे दाखल झाले असता, जमावाने पोलीस कर्मचाऱ्यांवर दगडफेक केल्याची घटना समोर आली आहे.

पोलिसांवर केली दगडफेक: पालिकेने दिलेल्या माहितीनुसार, पवई येथील जय भीम नगर वसाहतीतील काही अनधिकृत बांधकामांना यापूर्वीच 'अनधिकृत बांधकाम' हटवण्याच्या नोटिसा बजावण्यात आल्या होत्या. वारंवार नोटिसा पाठवून देखील अनधिकृत बांधकाम नागरिकांकडून न हटवण्यात आल्यानं मुंबई पोलिसांच्या मदतीनं पालिकेनं ही कारवाई करण्याचं ठरवलं. त्यानुसार सकाळी साडेदहा वाजता पालिका आणि पोलीस कर्मचारी जय भीम नगर येथे दाखल झाले होते. या कर्मचाऱ्यांनी साडेदहा वाजता अनधिकृत बांधकामावर पाडकामाच्या कारवाईला सुरुवात केली. बृहन्मुंबई महानगरपालिकेच्या कारवाईला जय भीम नगरीतील स्थानिक रहिवाशांनी कडाडून विरोध केला. पालिकेची कारवाई सुरू असतानाच येथे मोठा जमाव दाखल झाला. त्याचवेळी या जमावातून दगडफेकीला सुरुवात झाली.

पाच पोलीस कर्मचारी जखमी: जमावाकडून दगडफेक होताच परिस्थितीवर नियंत्रण मिळवण्यासाठी पोलिसांकडून जमावावर सौम्य लाठीचार्ज करण्यात आला. यात पाच पोलीस कर्मचारी जखमी झाल्याची माहिती मिळत आहे. सध्या या भागात मोठ्या प्रमाणात तणावाची स्थिती आहे. पवई येथील हिरानंदनी भागात मागील अनेक वर्ष जय भीम नगर झोपडपट्टी परिसर आहे. या झोपडपट्टी परिसरावर पालिकेनं आज कारवाई केली. या संदर्भात आम्ही पालिकेचे एस विभागाचे सहाय्यक आयुक्त यांच्याशी बातचीत केली असता त्यांनी 'आम्ही थोड्या वेळात तुम्हाला या संदर्भात माहिती देऊ' असं म्हटलंय.

हेही वाचा -