मुंबई : Mahavikas Aghadi and Vanchit Meeting : आजमहाविकास आघाडीची जागा वाटपावर चर्चा झाली. या बैठकीला वंचित आघाडीचे प्रमुख प्रकाश आंबेडकर उपस्थित होते. तसंच, महाविकास आघाडीतील शरद पवार, उद्धव ठाकरे, बाळासाहेब थोरात, संजय राऊत हे प्रमुख नेतेही उपस्थित होते. तब्बल चार तास ही बैठक चालली. या बैठकीत 48 मतदार संघात कोणत्या जागेवर कोण उमेदवार देण्यात यावा याबाबत सविस्तर सुमारे चार तास चर्चा झाली. ही चर्चा सकारात्मक झाल्याचे संकेत स्वत: प्रकाश आंबेडकर यांनी दिले आहेत.
एकत्रित पत्रकार परिषदेत होणार : प्रकाश आंबेडकर यांनी आपल्याला किती जागा लढवायच्या आहेत याबाबत प्रस्ताव दिला आहे. दरम्यान, महाविकास आघाडीतील तिन्ही पक्षांमध्ये जागा वाटपावरून कोणतेही मतभेद नसल्याचं ते म्हणाले आहेत. महाविकास आघाडीसोबत वंचितने एकत्रितपणे निवडणुकीला सामोरं जायचं ठरलं आहे. आजच्या बैठकीत सकारात्मक चर्चा झाली. आम्ही एका गोष्टीवर पूर्ण समाधानी आहोत की महाराष्ट्रातून आणि देशातून मोदींची हुकूमशाही उलथून टाकण्यावर आमचं आणि आंबेडकरांचं एकमत झाल आहे अशी प्रतिक्रिया ठाकरे गटाचे खासदार संजय राऊत यांनी दिली आहे. तसंच, लवकरच महाविकास आघाडीतील उमेदवार एकत्रित पत्रकार परिषदेत घेऊन जाहीर केले जाईल असंही राऊत म्हणाले आहेत.
पुढील बैठकीत निर्णय होईल :महाविकास आघाडीच्या आजच्या बैठकीला प्रकाश आंबेडकरांनी हजेरी लावली. परंतु, या बैठकीत अंतिम निर्णय झाला नसून, पुढील बैठकीत निर्णय होईल असं प्रकाश आंबेडकर यांनी म्हटलं आहे. बैठकीत सकारात्मक चर्चा झाली का? यावर प्रकाश आंबेडकर यांनी 'तुम्हाला माझ्या चेहऱ्याकडं पाहून काय वाटतं?' असा उलट प्रश्न करत थेट उत्तर देण टाळलं आहे. सूत्रांकडून मिळालेल्या माहितीनुसार प्रकाश आंबेडकर आणि महाविकास आघाडीच्या नेत्यांची नऊ मार्चला पुन्हा बैठक होण्याची शक्यता वर्तवली जात आहे.