लोकसभेच्या दुसऱ्या टप्प्याचं मतदान संपलं, महाराष्ट्रात 53.51 टक्के मतदान, 'या' जिल्ह्यात झालं सर्वाधिक मतदान - Lok Sabha Election 2024

20:24 April 26

लोकसभेच्या दुसऱ्या टप्प्याचं मतदान संपलं, महाराष्ट्रात 53.51 टक्के मतदान, 'या' जिल्ह्यात झालं सर्वाधिक मतदान

मुंबई Lok Sabha Second Phase Voting : देशभरातील 89 मतदारसंघात आज दुसऱ्या टप्प्यातील मतदान पार पडलं. या सर्व मतदारसंघांमध्ये मतदानाची वेळ संपेपर्यंत अर्थात संध्याकाळी सहा वाजेपर्यंत सरासरी 64.70 टक्के मतदान झालं. तर यापैकी महाराष्ट्रात आठ मतदारसंघात 53.51 टक्के मतदान झालं. यामध्ये वर्धा लोकसभा मतदार संघात सर्वाधिक 56.66 टक्के मतदान नोंदवण्यात आले, तर हिंगोलीत सर्वात कमी 52.03 टक्के मतदान झाले.

लोकसभा मतदारसंघनिहाय टक्केवारी :

वर्धा - 56.66 टक्के

अकोला -52.49 टक्के

अमरावती - 54.50 टक्के

बुलढाणा - 52.24 टक्के

हिंगोली - 52.03 टक्के

नांदेड - 52.47 टक्के

परभणी -53.79 टक्के

यवतमाळ-वाशिम - 54.04 टक्के

'या' चर्चेतील मतदारांचं भवितव्य ईव्हीएममध्ये कैद : लोकसभा निवडणुकीच्या दुसऱ्या टप्प्यात झालेल्या मतदानामुळं प्रकाश आंबेडकर (अकोला), रवी राणा (अमरावती), रविकांत तुपकर (बुलडाणा), रामदास तडस (वर्धा) या महत्वाच्या उमेदवारांचं भवितव्य ईव्हीएममध्ये कैद झालंय.

वर्धा लोकसभा मतदारसंघ : वर्ध्यात सायंकाळी 5 वाजेपर्यंत 56.66 टक्के मतदान झालं. वर्ध्यात काँग्रेसचे माजी आमदार अमर काळे विरुद्ध भाजपाचे खासदार रामदास तडस अशी लढत आहे.

अकोला लोकसभा मतदारसंघ : अकोला मतदारसंघात सायंकाळी 5 वाजेपर्यंत 52.49 टक्के मतदान झाले. यापूर्वी अकोल्यात दुपारी 3 वाजेपर्यंत 42.69 टक्के मतदान झाले होते. अकोल्यात भाजपचे खासदार पुत्र अनुप धोत्रे, काँग्रेसचे डॉ.अभय पाटील आणि वंचित बहुजन आघाडीचे प्रकाश आंबेडकर यांच्यात तिरंगी लढत होत आहे.

अमरावती लोकसभा मतदारसंघ : अमरावती लोकसभा मतदारसंघात सायंकाळी पाच वाजेपर्यंत 54% मतदान झालं. अमरावतीतील अचलपूर विधानसभा मतदारसंघात सर्वाधिक 61.33% मतदान सायंकाळी पाच वाजेपर्यंत झालं. अचलपूर आणि चांदूरबाजार असे दोन तालुके मिळून अचलपूर विधानसभा मतदारसंघ असून आमदार बच्चू कडू यांचा हा मतदार संघ आहे. अचलपूर मतदारसंघाला लागून असणाऱ्या मेळघाट मतदार संघात 55.20% मतदान झालं आहे.

बुलढाणा लोकसभा मतदारसंघ : बुलढाणा मतदारसंघात सायंकाळी 5 वाजेपर्यंत 52.24 टक्के मतदान झालं. यापूर्वी बुलढाण्यात दुपारी 3 वाजेपर्यंत 41.66 टक्के मतदान झालं होतं. येथे शिवसेनेचे (शिंदे गट) प्रतापराव जाधव यांची लढत ठाकरे गटाच्या नरेंद्र खेडेकर यांच्याशी आहे.

हिंगोली लोकसभा मतदारसंघ : हिंगोलीत सायंकाळी 5 वाजेपर्यंत 54.03 टक्के मतदान झाले. दुपारी 3 वाजेपर्यंत 40.5 टक्के मतदान झालं होतं. हिंगोलीत शिवसेनेनं (शिंदे) बाबुराव कोहळीकर यांना तिकीट दिलंय. तर त्यांच्याविरोधात ठाकरे गटानं नागेश पाटील आष्टीकर यांना उभं केलंय.

नांदेड लोकसभा मतदारसंघ : नांदेड मतदारसंघात सायंकाळी 5 वाजेपर्यंत 52.47 टक्के मतदान झालं. दुपारी 3 वाजेपर्यंत येथे 42.42 टक्के मतदान झालं होतं. नांदेडमध्ये खासदार प्रतावराव चिखलीकर विरुद्ध काँग्रेसचे उमेदवार वसंत चव्हाण अशी लढत आहे.

19:42 April 26

मेळघाटातील चाकर्दा गावात 500 मतदारांना मतदानाची प्रतीक्षा

अमरावती : मेळघाटातील धारणी तालुक्यात येणाऱ्या चाकर्दा गावात जिल्हा परिषद माध्यमिक मराठी शाळेत ईव्हीएम मशीन बंद पडल्यामुळं, या मतदान केंद्रावर एकूण 500 मतदार ईव्हीएम मशीनमध्ये दुरुस्ती झाल्यावर आपल्याला मतदानाची संधी मिळेल, या प्रतीक्षेत वाट पाहत आहेत. ईव्हीएम मशीनमध्ये दुरुस्ती झाल्यावर या गावातील मतदारांना त्यांचा मतदानाचा हक्क बजावता येईल, असं जिल्हा प्रशासनाच्या वतीनं स्पष्ट करण्यात आलंय.

18:18 April 26

युवकाने फोडले ईव्हीएम मशीन

नांदेड : जिल्ह्यातील बिलोली तालुक्यातील रामतीर्थ येथे मतदान केंद्रात एका युवकाने ईव्हीएम मशीन फोडलं. छोट्या कुऱ्हाडीने ईव्हीएम मशीन फोडण्यात आलं. भय्यासाहेब एडके असं या युवकाचं नाव आहे. मतदान केंद्रावरील पोलिसांनी तत्काळ त्याला ताब्यात घेतलं आहे. त्यानं असं का केलं याचा पोलीस तपास करत आहेत, अशी माहिती जिल्हाधिकारी अभिजित राऊत यांनी दिली.

17:48 April 26

लोकसभा निवडणुकीच्या दुसऱ्या टप्प्यातील आठ मतदारसंघात सायंकाळी ५ वाजेपर्यंत ५३.५१ टक्के मतदान

मुंबई : राज्यातील लोकसभा निवडणुकीच्या दुसऱ्या टप्प्यातील मतदान आज २६ एप्रिल २०२४ रोजी सकाळी ७.०० वा. पासून सूरु झाले आहे. दुसऱ्या टप्प्यातील एकूण आठ मतदार संघात सायंकाळी ५ वाजेपर्यंत सरासरी ५३.५१ टक्के मतदान झाले आहे.

दुसऱ्या टप्प्यातील एकूण ८ लोकसभा मतदारसंघनिहाय टक्केवारी पुढीलप्रमाणे :

वर्धा - ५६.६६ टक्के

अकोला -५२.४९ टक्के

अमरावती - ५४.५० टक्के

बुलढाणा - ५२.२४ टक्के

हिंगोली - ५२.०३ टक्के

नांदेड - ५२.४७ टक्के

परभणी -५३.७९ टक्के

यवतमाळ-वाशिम - ५४.०४ टक्के

15:50 April 26

लोकसभा निवडणुकीच्या दुसऱ्या टप्प्यातील आठ मतदारसंघात दुपारी ३ वाजेपर्यंत ४३.०१ टक्के मतदान

मुंबई : राज्यातील लोकसभा निवडणुकीच्या दुसऱ्या टप्प्यातील मतदान आज २६ एप्रिल २०२४ रोजी सकाळी ७.०० वा. पासून सूरु झालंय. दुसऱ्या टप्प्यातील एकूण आठ मतदार संघात दुपारी ३ वाजेपर्यंत सरासरी ४३.०१ टक्के मतदान झालं आहे.

दुसऱ्या टप्प्यातील एकूण ८ लोकसभा मतदारसंघनिहाय टक्केवारी पुढीलप्रमाणे :

वर्धा - ४५.९५ टक्के

अकोला -४२.६९ टक्के

अमरावती - ४३.७६ टक्के

बुलढाणा - ४१.६६ टक्के

हिंगोली - ४०.५० टक्के

नांदेड - ४२.४२ टक्के

परभणी -४४.४९ टक्के

यवतमाळ- वाशिम - ४२.५५ टक्के

15:48 April 26

बुलढाणा लोकसभा मतदारसंघात दुपारी 3 वाजेपर्यंत 41.66% मतदान

मुंबई : बुलढाणा लोकसभा मतदारसंघात दुपारी 3 वाजेपर्यंत 41.66% मतदान पार पडलं आहे.

बुलढाणा- 34.72%

चिखली- 43.78%

जळगाव जामोद--39.46%

खामगाव- 42.88%

मेहकर- 46.88%

सिंदखेडराजा- 42.15%

14:38 April 26

लोकसभा निवडणुकीच्या दुसऱ्या टप्प्यातील आठ मतदारसंघात दुपारी १ वाजेपर्यंत ३१.७७ टक्के मतदान

मुंबई- राज्यातील लोकसभा निवडणुकीच्या दुसऱ्या टप्प्यातील मतदान आज दि.२६ एप्रिल २०२४ रोजी सकाळी ७.०० वा. पासून सूरु झाले आहे. दुसऱ्या टप्प्यातील एकूण आठ मतदार संघात दुपारी १ वाजेपर्यंत सरासरी ३१.७७ टक्के मतदान झाले आहे.

दुसऱ्या टप्प्यातील एकूण ८ लोकसभा मतदारसंघनिहाय टक्केवारी पुढीलप्रमाणे

वर्धा - ३२.३२ टक्के

अकोला -३२.२५ टक्के

अमरावती - ३१.४०टक्के

बुलढाणा - २९.०७ टक्के

हिंगोली - ३०.४६ टक्के

नांदेड - ३२.९३ टक्के

परभणी -३३.८८ टक्के

यवतमाळ - वाशिम -३१.४७ टक्के

13:51 April 26

ना वीज, ना रस्ता, ना पिण्यास पाणी; मेळघाटातील चार आदिवासी गावातील नागरिकांचा मतदानावर बहिष्कार

अमरावती Lok Sabha Election 2024 : देशभरात आज लोकसभा निवडणूक 2024 साठी मतदान सुरू आहे. मात्र अमरावतीतील मेळघाटात मतदारांना कोणत्याच सुविधा नाहीत. त्यामुळे मेळघाटातील चार गावांनी मतदानावर बहिष्कार टाकला आहे. यात धारणी तालुक्यात येणाऱ्या रंगूबेली, धोकडा, कुंड आणि खामदा या अतिदुर्गम गावातील ग्रामस्थांनी लोकसभा निवडणुकीवर बहिष्कार टाकला आहे. आज अमरावती लोकसभा मतदारसंघात सर्वत्र मतदान प्रक्रिया राबविली जात असताना या चार गावातील ग्रामस्थांनी मतदान करण्यास नकार दिला.

12:44 April 26

खासदार नवनीत राणांनी केलं मतदान, सर्वोच्च न्यायालयाच्या निर्णयावर दिली 'ही' प्रतिक्रिया

अमरावती Lok Sabha Election 2024 : अमरावती लोकसभा निवडणूक 2024 साठी आज सकाळपासून मतदान प्रक्रिया सुरू आहे. अमरावती मतदार संघात विद्यमान खासदार नवनीत राणा यांच्या विरोधात वंचित बहुजन आघाडीचे आनंदराज आंबेडकर आणि महाविकास आघाडीचे बळवंत वानखेडे यांच्यात लढत होत आहे. महाविकास आघाडीच्या उमेदवार नवनीत राणा यांनी सकाळी 11 वाजता मतदान केलं. यावेळी त्यांनी "देशात असणारा काळा पैसा हा देशातील गरिबांना वाटण्यात येईल, असा निर्णय पंतप्रधान नरेंद्र मोदी यांनी घेतला आहे. या निर्णयाचं मी स्वागत करते," असं मत अमरावती लोकसभा मतदारसंघातील महायुतीच्या उमेदवार नवनीत राणा यांनी व्यक्त केलं. मतदानाचा हक्क बजावल्यावर नवनीत राणा यांनी माध्यमांशी संवाद साधला.

12:24 April 26

लोकसभा निवडणूक 2024 मतदान : प्रतापराव जाधव यांनी केलं रांगेत उभं राहून मतदान

बुलढाणा Lok Sabha Election 2024 : बुलढाणा लोकसभा मतदार संघात आज सकाळी सात वाजतापासून मतदान सुरू आहे. सकाळी 11 वाजतापर्यंत जवळपास 17.92 टक्के मतदान झालं आहे. गुरुवारी झालेल्या रात्रीच्या पावसानंतर सकाळी वातावरण बदललं असलं तरी नागरिक मतदानासाठी घरातून बाहेर पडत आहेत. बुलढाणा लोकसभा मतदारसंघाचे विद्यमान खासदार तथा महायुतीचे उमेदवार प्रतापराव जाधव यांनी सकाळी मतदानाचा हक्क बजावला. यावेळी त्यांनी सर्व मतदारांना जास्तीत जास्त मतदान करण्याचं आवाहन केलं. विशेष म्हणजे सामान्य नागरिकांसारखं रांगेत उभं राहून त्यांनी मतदान केंद्रावर आपला मतदानाचा हक्क बजावला.

11:58 April 26

लोकसभा निवडणूक 2024; दुसऱ्या टप्प्यातील आठ मतदारसंघात सकाळी 11 वाजतापर्यंत 18.83 टक्के मतदान

मुंबई Lok Sabha Election 2024 : राज्यातील लोकसभा निवडणुकीच्या दुसऱ्या टप्प्यातील मतदान आज आज सकाळी 7.00 वाजतापासून सूरु झालं आहे. दुसऱ्या टप्प्यातील एकूण आठ मतदार संघात सकाळी 11.00 वाजतापर्यंत सरासरी 18.83 टक्के मतदान झालं.

मतदारसंघनिहाय टक्केवारी पुढीलप्रमाणं :

वर्धा - 18.35 टक्के

अकोला -17.37 टक्के

अमरावती - 17.73 टक्के

बुलढाणा - 17.92 टक्के

हिंगोली - 18.19 टक्के

नांदेड - 20.85 टक्के

परभणी -21.77 टक्के

यवतमाळ - वाशिम -18.01 टक्के

11:07 April 26

अकोल्यात मतदानाला धीम्या गतीनं, शांततेत सुरुवात; सकाळच्या सत्रात 7 टक्के मतदान

अकोला lok Sabha Election 2024 : अकोला लोकसभा मतदार संघात मतदानाला सुरुवात झाली. अकोला लोकसभा मतदार संघात सर्व 6 विधानसभा मतदार संघामधील 2056 मतदान पथकं कार्यरत आहेत. 11 हजार 544 कर्मचारी निवडणूक कार्यात गुंतली आहेत. 18 लाख 90 हजार 814 मतदार आज मतदानाचा हक्क बजावत आहे. सर्वच मतदान केंद्रावर मतदान प्रक्रिया सकाळपासून शांततेत सुरू झाली आहे. सकळी 7 ते 9 दरम्यान 7.17 टक्के मतदान झालं. मतदान प्रक्रिया धिम्या गतीनं सुरू असल्याचं दिसते. सकाळपासून ढगाळ वातावरण आहे, त्यामुळे नागरिक वादळी पावसाच्या भीतीनं घराबाहेर पडत नसल्याचं चित्र सध्या दिसत आहे.

11:00 April 26

महाविकास उमेदवार बळवंत वानखडे यांनी केलं मतदान

अमरावती Lok Sabha Election 2024 : महाविकास आघाडीचे उमेदवार आमदार बळवंत वानखडे यांनी त्यांच्या लेहगाव तालुका दर्यापूर जिल्हा अमरावती या ठिकाणी जाऊन सकाळी आठ वाजता मतदान केलं. मतदान केल्यानंतर माध्यमांशी बोलताना ते म्हणाले की, हे माझं जन्मगाव आहे, या गावापासूनच माझा राजकीय प्रवास सुरू झाला. ग्रामपंचायत सदस्य, सरपंच, कृषी उत्पन्न बाजार समिती संचालक पदी विराजमान झालो. माझा विजय निश्चित असून मी किमान दोन लाख मतांनी निवडून येईल, असा विश्वास वानखेडे यांनी व्यक्त केला.

10:52 April 26

लोकसभा निवडणुकीच्या दुसऱ्या टप्प्यातील आठ मतदारसंघात सकाळी 9 वाजेपर्यंत 7.45 टक्के मतदान

मुंबई Lok Sabha Election 2024: राज्यातील लोकसभा निवडणुकीच्या दुसऱ्या टप्प्यातील मतदान आज एप्रिल 2024 रोजी सकाळी 7.00 वाजतापासून सूरु झालं आहे. दुसऱ्या टप्प्यातील एकूण आठ मतदार संघात सकाळी 9.00 वाजतापर्यंत सरासरी 7.45 टक्के मतदान झालं आहे.

मतदारसंघनिहाय टक्केवारी पुढीलप्रमाणं :

वर्धा - 7.18 टक्के

अकोला - 7.17 टक्के

अमरावती - 6.34 टक्के

बुलढाणा - 6.61 टक्के

हिंगोली - 7.23 टक्के

नांदेड - 7.73 टक्के

परभणी - 9.72 टक्के

यवतमाळ - वाशिम - 7.23 टक्के

10:11 April 26

महाविकास आघाडीचे उमेदवार वसंत चव्हाण यांनी केलं मतदान

नांदेड Lok Sabha Election 2024 : लोकसभा निवडणूक 2024 साठी महाविकास आघाडीचे उमेदवार वसंत चव्हाण यांनी आज सकाळीच मतदान केलं. वसंत चव्हाण यांनी नायगाव शहरातील गजाली परिसरात असलेल्या जिल्हा परिषद शाळेत आपला मतदानाचा हक्क बजावला. वसंत चव्हाण यांनी जनतेला मतदान करण्याचं आवाहन केलं. नांदेड लोकसभा मतदारसंघात आज दुसऱ्या टप्प्यातील मतदान प्रक्रिया सुरू आहे. स्वच्छ प्रशासनासाठी जास्तीत जास्त मतदान करण्याचं आवाहन केलं.

09:26 April 26

नांदेडमध्ये मतदानाला शांततेत सुरुवात; महिला सखी केंद्रावर गुलाब पुष्पानं होत आहे मतदारांचं स्वागत

नांदेड Lok Sabha Election 2024 : लोकसभा निवडणूक 2024 च्या मतदानाला आज सकाळच्या सत्रात मोठ्या संख्येनं नागरिकांनी मतदान केंद्रावर उपस्थिती लावली. वजिराबाद येथील महिला सखी केंद्रावर गुलाब पुष्प देऊन मतदारांचं स्वागत करण्यात येत आहे. नांदेड जिल्ह्यात 2062 मतदान केंद्रावर मतदानाला शांततेत सुरूवात झाली आहे. माजी मुख्यमंत्री अशोक चव्हाण यांनी काँग्रेस सोडून भाजपात प्रवेश केला. त्यामुळे नांदेड लोकसभा मतदार संघात चुरशीची लढत होत आहे. अशोक चव्हाण यांची प्रतिष्ठा पणाला लागली आहे. भाजपाचे नेते तथा विद्यमान खासदार प्रताप पाटील चिखलीकर यांचा सामना महाविकास आघाडीचे नेते वसंत चव्हाण यांच्याशी होत आहे.

08:42 April 26

अमरावती मतदानाला सुरुवात; लग्नाआधी वऱ्हाड पोहोचलं मतदान केंद्रावर, नवरदेवानं केलं मतदान

अमरावती Lok Sabha Election 2024 : लोकसभा मतदारसंघात आज लोकसभा निवडणुकीच्या दुसऱ्या टप्प्यातील मतदानाला सुरुवात झाली आहे. निवडणुकीच्या मुहूर्तासह आज मोठ्या संख्येनं लग्नं देखील आहेत. अमरावतीच्या वडारपुरा परिसरातील नवरदेव लग्नासाठी वऱ्हाड घेऊन वर्धा इथं जाण्यापूर्वी मतदान केंद्रावर पोहोचून त्यानं मतदानाचा हक्क बजावला.

अमरावती शहरातील वडारपुरा परिसरातील आकाश पवार या युवकाचं आज वर्धा इथं लग्न आहे. लग्नाआधी मतदानाचं कर्तव्य बजावण्यासाठी आकाश पवार आपल्या आई-वडील तसेच वडापूर येथील महापालिकेच्या शाळेत असणाऱ्या मतदान केंद्रावर लग्नाच्या वऱ्हाड्यांसह मतदानाचा हक्क बजावण्यासाठी आला. वर्धा इथं देखील आज मतदान होणार असून आमची नवरी देखील वर्धेत आधी मतदानाचा हक्क बजावणार आहे. त्यानंतर सकाळी 11 वाजता आमचं लग्न होणार असल्याचं आकाश पवार यांनी ईटीव्ही भारतशी बोलताना सांगितलं.

08:13 April 26

विवाह मंडपात जाण्यापूर्वी वरानं अमरावतीत केलं मतदान

लोकसभा निवडणुकीत मतदान करण्यासाठी अमरावतीच्या वडारपुरा भागातील वरानं विवाह मंडपात जाण्यापूर्वी मतदान केलं आहे. आकाश हे वराचं नाव आहे. दुपारी २ वाजता विवाह आहे. पण मतदानदेखील महत्त्वाचं असल्याचं त्यानं सांगितलं.

08:02 April 26

वर्धेत भाजपाची प्रतिष्ठा पणाला; रामदास तडस यांनी बजावलं मतदान, विजयाचा व्यक्त केला विश्वास

वर्धा Lok Sabha Election 2024 : लोकसभा मतदारसंघतील भारतीय जनता पक्षाचे उमेदवार रामदास तडस यांनी सकाळीचं मतदानाचा हक्क बजावला आहे. सकाळी देवदर्शन आटोपून ते थेट मतदानकेंद्रात दाखल झाले. मतदान केल्यानंतर विजयाची मोदी गॅरंटी असल्याचं त्यांनी यावेळी सांगितलं. लढत सोपी नसली तरी विजय निश्चित असल्याचं रामदास तडस यांनी ईटीव्ही भारतशी साधलेल्या संवादात स्पष्ट केलं. रामदास तडस हे सलग दोन वेळा वर्धा लोकसभा निवडणुकीत मोठ्या मताधिक्यानं विजयी झाले. मात्र, यावेळी वर्धेतील राजकीय परिस्थिती ही फारचं बदललेली आहे. शिवाय समोरील उमेदवार देखील तुल्यबळ आहे. त्यामुळे यंदाची ही लढत सोपी अजिबात नसल्याचं स्पष्ट दिसत आहे.

07:49 April 26

बुलढाण्यात मतदानाला सुरुवात ; तरुणानं बजावला मतदानाचा हक्क, केलं मतदान करण्याचं आवाहन

बुलढाण्यात मतदानाला सुरुवात : देशभरात लोकशाहीचा सण मोठ्या उत्साहात साजरा केला जात आहे. दुसऱ्या टप्प्यात होत असलेल्या बुलढाणा लोकसभा मतदारसंघाच्या निवडणुकीसाठी आज मतदान होत आहे. या मतदानाकरिता मतदार मतदानासाठी बाहेर निघण्यास सुरुवात झाली आहे. बुलढाण्यातील सावळा या गावांमधील मतदान केंद्रावर जाऊन पहिल्या मतदारानं आपल्या मतदानाचा हक्क बजावला आहे. तसेच मतदारांनी आपल्या मतदानाचा हक्क बजावा आणि देशाला सुरक्षित ठेवेल अशा उमेदवाराला मतदान करावं, असं आवाहन या मतदारानं केलं आहे.

07:44 April 26

वर्धा लोकसभा मतदार संघात मतदान सुरू : भाजपा विरुद्ध राष्ट्रवादीतच होत आहे खरी लढत

वर्धा Lok Sabha Election 2024 : लोकसभा मतदारसंघासाठी मतदान सुरू झालं आहे. सकाळी 7 वाजल्यापासून मतदार आपले कर्तव्य म्हणजे मतदानाचा हक्क बजावण्यासाठी घराबाहेर पडण्यास सुरुवात झाली. वर्धा लोकसभा मतदारसंघात 16 लाख 82 हजार 771 मतदार हे आज आपला नेता निवडण्यासाठी उत्साहानं मतदान करत आहेत. वर्धा लोकसभा मतदारसंघामध्ये एकूण 24 उमेदवार निवडणूक रिंगणात असले तरी थेट लढत ही भाजपा विरुद्ध राष्ट्रवादी अशीचं होताना दिसत आहे. वर्धा जिल्हात एकूण 16 लाख 82 हजार 771 मतदार आहेत. यामध्ये 8 लाख 58 हजार 439 पुरूष तर 8 लाख 24 हजार 318 महिलांचा समावेश असून 14 तृतीयपंथीयांचा सुद्धा समावेश आहे. संपूर्ण वर्धा जिल्ह्यात दिव्यांग मतदारांची संख्या 11 हजार 786 असून 80 वर्षावरील मतदारांची संख्या 25 हजार 22 आहे. वर्धा जिल्ह्यात सुरळीत मतदान व्हावं, यासाठी एकूण 1 हजार 997 मतदान केंद्र असणार आहेत.

06:23 April 26

लोकसभा निवडणूक 2024 मतदान ; महाराष्ट्रातील 8 लोकसभा मतदार संघातील मतदानाला सुरुवात, नागरिकांमध्ये मतदानाचा उत्साह

मुंबई Lok Sabha Election 2024 2nd Phase : लोकसभा निवडणूक 2024 च्या दुसऱ्या टप्प्यातील 8 लोकसभा मतदार संघात थोड्याच वेळात मतदानाला सुरुवात होणार आहे. दुसऱ्या टप्प्यात अकोला, अमरावती, बुलढाणा, यवतमाळ-वाशिम, वर्धा, परभणी, नांदेड, हिंगोली या लोकसभा मतदार संघात चुरशीची लढत होत आहे. सकाळी सात वाजता मतदानाला सुरुवात होणार आहे. आठही लोकसभा मतदार संघातील मतदानाची तयारी प्रशासनानं पूर्ण केली आहे.

या दिग्गजांमध्ये होणार लढत :आज होणाऱ्या प्रमुख लढतीत देशाचं लक्ष लागलेल्या अमरावती लोकसभा मतदार संघात नवनीत राणा यांची लढत महाविकास आघाडीच्या बळंवत वानखेडे यांच्याशी होणार आहे. इथं वंचित बहुजन आघाडीनं आनंदराज आंबेडकर यांना मैदानात उतरवलं आहे. त्यामुळे अमरावती लोकसभा मतदार संघात तिरंगी लढत होत आहे. अकोला मतदार संघात वंचितचे प्रकाश आंबेडकर यांची महायुतीच्या अनुप धोत्रे यांच्याशी होत आहे. नांदेडमध्ये प्रताप पाटील चिखलीकर यांची महाविकास आघाडीच्या वसंत चव्हाण यांच्याशी होणार आहे. काँग्रेसचे नेते तथा माजी मुख्यमंत्री अशोक चव्हाण यांनी भाजपामध्ये प्रवेश केल्यानंतर ही लढत अत्यंत चुरशीची मानली जात आहे.