एकनाथ शिंदे यांची शिवसेना न्यायालयानं प्रमाणित केलेली खरी शिवसेना; केशव उपाध्ये यांचा हल्लाबोल - Keshav Upadhye On Uddhav Thackeray

Keshav Upadhye On Uddhav Thackeray : पंतप्रधान नरेंद्र मोदी यांनी चंद्रपूरमध्ये उबाठा प्रमुख उद्धव ठाकरे यांच्यावर टीका केली. त्यानंतर उद्धव ठाकरे यांनी पंतप्रधान नरेंद्र मोदी यांच्यावर पलटवार केला. त्यावर आता भाजपाकडून केशव उपाध्ये यांनी उद्धव ठाकरे यांच्यावर जोरदार टीका करण्यात आली.

मुंबई Keshav Upadhye On Uddhav Thackeray : पंतप्रधान नरेंद्र मोदी यांनी शिवसेना उद्धव बाळासाहेब ठाकरे पक्षाला नकली शिवसेना असं, संबोधल्यानंतर उद्धव ठाकरे यांनी त्याचा समाचार घेतला. बाहेरच्या माणसांनी येऊन सांगायची गरज नाही. महाराष्ट्रातील जनतेला माहीत आहे, असं उद्धव ठाकरे म्हणाले. त्यानंतर भाजपाचे मुख्य प्रवक्ते केशव उपाध्ये यांनी ठाकरे यांना शिंदे यांचीच शिवसेना न्यायालयानं प्रमाणित केलेली खरी शिवसेना असल्याचं प्रत्युत्तर दिलं आहे.

पंतप्रधान नरेंद्र मोदींची टीका :पंतप्रधान नरेंद्र मोदी यांनी चंद्रपूर इथं झालेल्या सभेत बोलताना शिवसेना उद्धव बाळासाहेब ठाकरे पक्षावर जोरदार टीका केली. "उद्धव ठाकरे यांची शिवसेना ही नकली शिवसेना आहे. शिंदे यांची शिवसेना खरी असून जनता शिंदे यांच्या सेनेच्या पाठीशी राहील," असं पंतप्रधान या सभेदरम्यान बोलले. पंतप्रधानांच्या या वक्तव्यावर शिवसेना उद्धव बाळासाहेब ठाकरे गटाचे पक्षप्रमुख उद्धव ठाकरे यांनी मुंबईत पत्रकार परिषदेत जोरदार टीका केली. "पंतप्रधान नरेंद्र मोदी हे देशाचे पंतप्रधान नाहीत, तर एका पक्षाचे नेते आहेत. त्यांनी अशा पद्धतीची वक्तव्य करून त्यांची वृत्ती दाखवून दिली. यापुढे आम्ही त्यांना निश्चितच उत्तर देऊ, कारण आमचे उत्तर हे पंतप्रधानांना नसेल तर एका पक्षाच्या नेत्याला असेल. आमची शिवसेना असली आहे, की नकली हे राज्याबाहेरील व्यक्तीनं येऊन सांगण्याची गरज नाही. ते राज्यातील जनतेला निश्चितच माहीत आहे," असा टोला ठाकरे यांनी लगावला. तर "भारतीय जनता पार्टी म्हणजे भ्रष्ट जनता पार्टी, भेकड जनता पार्टी आणि भाकड जनता पार्टी," अशा शब्दात ठाकरे यांनी भाजपावर टीकेचा प्रहार केला.

शिंदे यांची शिवसेनाच असली :उद्धव ठाकरे यांच्या टीकेवर प्रतिक्रिया व्यक्त करताना भारतीय जनता पार्टीचे मुख्य प्रवक्ते केशव उपाध्ये म्हणाले की, "मुख्यमंत्री एकनाथ शिंदे यांची शिवसेना ही खरी शिवसेना असल्याचं विधिमंडळ आणि न्यायालयानंही प्रमाणित केलं आहे. त्यामुळे उद्धव ठाकरे यांच्याकडं उरलेली शिवसेना ही उबाठा असून ती नकली आहे, हे स्पष्ट आहे. पंतप्रधान नरेंद्र मोदी यांच्या धोरणांमुळे जनता त्यांच्या पाठीशी आहे आणि त्यांनी केलेल्या विकासावर जनतेचा विश्वास आहे. त्यामुळे उद्धव ठाकरे किंवा 'इंडिया' आघाडी काहीही म्हणाले तरी त्याचा काही फरक पडणार नाही," असं केशव उपाध्ये म्हणाले.

त्यांनी केवळ टोमणे मारावे :भारतीय जनता पार्टीवर उद्धव ठाकरे यांनी केलेल्या टीकेला प्रत्युत्तर देताना केशव उपाध्य म्हणाले की "उद्धव ठाकरे हे केवळ टोमणे बहाद्दर आहेत. टोमणे मारण्यात ते पटाईत आहेत. त्यामुळे त्यांनी तेवढंच काम करावे. त्यांच्या या असल्या टोमण्यांना जनता भीक घालणार नाही. भारतीय जनता पार्टी ही देशाची पार्टी आहे. ती काँग्रेस सारखी भ्रष्ट पार्टी नाही, हे जनतेला माहीत आहे," असंही उपाध्ये यावेळी म्हणाले.

हेही वाचा :