गणेश विसर्जन 2024 : सार्वजनिक गणेश मंडळाच्या विसर्जन मिरवणुकीत कलावंताचं 'तांडव' नृत्य, बघण्यासाठी नाशिककरांची तोबा गर्दी - Ganesh Visarjan 2024

Ganesh Visarjan 2024 : नाशिक शहरात भाविकांनी आपल्या लाडक्या बाप्पाला मोठ्या भक्तीभावानं निरोप दिला. काही भाविकांनी जीवंत देखावा यावेळी सादर केला. शहरात 5 हजार स्वयंसेवकांकडून बाप्पांची मूर्ती संकलन करण्यात येत आहे.

नाशिक Ganesh Visarjan 2024 :शहरातील वाकडी बारव इथून दुपारी सार्वजनिक गणेश विसर्जन मिरवणुकीचं पालकमंत्री दादा भुसे यांच्या हस्ते पूजन करुन सुरुवात करण्यात आली. यावेळी मंत्री दादा भुसे यांनी स्वत: ढोलवादनाचा आनंद घेतला. या मिरवणुकीत मानाच्या मंडळांसह 20 हुन अधिक मंडळांचा सहभाग आहे. मिरवणूक बघण्यासाठी नाशिककरांनी मोठी गर्दी केली. मिरवणुकी दरम्यान कुठलाही अनुचित प्रकार होऊ नये, यासाठी पोलिसांनी मोठा पोलीस बंदोबस्त तैनात केला. यावेळी कलावंतांनी केलेलं तांडव नृत्य पाहण्यास नागरिकांची मोठी गर्दी झाली.

गणपती बाप्पांची विसर्जन मिरवणूक (Reporter)

विसर्जन मिरवणूक मार्ग :विसर्जन मिरवणूक वाकडी बारव इथून सुरुवात झाल्यानंतर दादासाहेब फाळके मार्ग -महात्मा फुले मार्केट- दूधबाजार चौक- बादशाही लॉज कॉर्नर-गाडगे महाराज पुतळा-मेनरोड- धुमाळ पॉइंट- सांगली बँक सिग्नल-महात्मा गांधी रोड- मेहर सिग्नल-अशोकस्तंभ- नवीन तांबट गल्ली- रविवार कारंजा-होळकर पूल-मालेगाव स्टँड-पंचवटी कारंजा-मालविय चौक- परशुराम पुरियामार्ग- कपालेश्वर मंदिर-भाजी बाजार-म्हसोबा पटांगण हा मिरवणुकीचा मार्ग आहे. मिरवणूक संपेपर्यंत मिरवणूक मार्ग वाहनांसाठी बंद ठेवण्यात आला आहे. तसेच भद्रकाली परिसरातील गल्लीमध्ये देखील बॅरिकेटींग करण्यात आलं आहे. अतिसंवेदनशील समजला जाणारा खडकाळी सिग्नल परिसरात स्ट्रॅायकिंग फोर्स तैनात करण्यात आला आहे. गणेश मिरवणुकीत लेझर, गुलाल आणि डीजे नसावा, अन्यथा कडक कारवाई करण्यात येईल, अशा सूचना पोलिसांनी दिल्या आहेत. मात्र तरी काही मंडळामध्ये डीजे वाजवण्यात आला आहे. दरम्यान, नाशिक शहरात विसर्जनासाठी तीन हजार पोलिसांचा फौजफाटा तैनात करण्यात आला आहे, अशी माहिती सूत्रांनी दिली आहे.

गणपती बाप्पांची विसर्जन मिरवणूक (Reporter)

5000 स्वयंसेवकांकडून मूर्ती संकलन :रासायनिक रंग वापरून प्लास्टर ऑफ पॅरिसच्या गणेश मूर्तींचं विसर्जन गोदावरी नदीत केल्यानं प्रदूषणात भर पडते. त्यामुळे नाशिक महापालिकेसोबत शहरातील 40 स्वयंसेवी संस्थांनी प्लास्टर ऑफ पॅरिसच्या गणेश मूर्तीं संकलन केंद्र विविध ठिकाणी उभारले आहेत. निर्माल्य संकलन करुन त्यापासून खतनिर्मिती केली जाणार आहे. तसेच नाशिक महानगरपालिकेकडून सातपूर, नाशिक रोड, गंगापूर रोड, तपोवन, पंचवटी, सातपूर आदी 56 ठिकाणी कृत्रिम तलावाची निर्मिती करण्यात आली आहे.

विसर्जन मिरवणूक (Reporter)

गोदावरी नदी प्रदूषण रोखण्यासाठी उपक्रम :"गेल्या 14 वर्षापासून आम्ही उपक्रम राबवत आहे. मागील वर्षी हजारो प्लास्टर ऑफ पॅरिसच्या गणेश मूर्तींचं संकलन आम्ही केलं होतं. गोदावरी नदीत प्रदूषण होणार नाही, या उद्देशानं हा उपक्रम आम्ही हाती घेतलाय. नागरिकांनी सुद्धा बाप्पा आम्हाला द्यावा, असं आवाहन आम्ही त्यांना करीत आहोत," असं सुविचार मंचाचे अध्यक्ष आकाश पगार यांनी सांगितलं.

हेही वाचा :