वरुण 'रेकॉर्ड ब्रेक' चक्रवर्ती... टीम इंडियाच्या पराभवातही पठ्ठ्यानं केले विक्रम

इंग्लंडविरुद्धच्या तिसऱ्या T20 सामन्यात वरुण चक्रवर्तीनं शानदार कामगिरी करत पाच विकेट्स घेतल्या. पण तरीही टीम इंडियाला पराभवाचा सामना करावा लागला.

राजकोट Varun Chakravarthy Record : राजकोटच्या निरंजन शाह स्टेडियमवर इंग्लंडविरुद्ध खेळल्या गेलेल्या 5 सामन्यांच्या T20 मालिकेतील तिसऱ्या सामन्यात भारतीय क्रिकेट संघाला 26 धावांनी पराभव पत्करावा लागला असला तरी, या सामन्यात टीम इंडियाचा फिरकी गोलंदाज वरुण चक्रवर्तीची जादू दिसून आली, ज्यात त्यानं 5 विकेट घेतल्या. त्याच वेळी, वरुणच्या नावावर एक नकोसा रेकॉर्ड नोंदवला गेला आहे, ज्याचा तो कधीही भाग होऊ इच्छित नाही. वरुण आता आंतरराष्ट्रीय T20 क्रिकेटमध्ये पहिला खेळाडू बनला आहे ज्यानं 2 सामन्यांत 5 विकेट घेतल्या, परंतु त्यात संघाला पराभवाचा सामना करावा लागला.

राजकोटपूर्वी गकेबरहामध्ये वरुणनं केला होता पराक्रम : वरुण चक्रवर्तीची चेंडूसह उत्कृष्ट कामगिरी आंतरराष्ट्रीय T20 सामन्यांमध्ये सातत्यपूर्ण राहिली आहे, ज्यात त्यानं आतापर्यंत 16 सामने खेळून 29 बळी घेतले आहेत. यात वरुण चक्रवर्तीने दोनदा 5 बळी घेतले आहेत. 2024 च्या अखेरीस दक्षिण आफ्रिका दौऱ्यादरम्यान गकेबरहा इथं खेळल्या गेलेल्या T20 मालिकेत वरुणनं 17 धावा देत 5 विकेट्स घेतल्या, परंतु या सामन्यात भारतीय संघाला 3 विकेट्सनी पराभव स्वीकारावा लागला. आता इंग्लंडविरुद्धच्या T20 मालिकेतील तिसऱ्या सामन्यात वरुणनं 5 विकेट घेतल्या पण या सामन्यातही टीम इंडिया 26 धावांनी हरली.

इंग्लंडविरुद्ध अशी कामगिरी करणारा दुसरा खेळाडू :राजकोटमध्ये खेळल्या गेलेल्या तिसऱ्या T20 सामन्यात टीम इंडियाला 26 धावांनी पराभव पत्करावा लागला असला तरी, वरुण चक्रवर्तीला त्याच्या शानदार कामगिरीसाठी सामनावीराचा किताब देण्यात आला. इंग्लंडविरुद्धच्या T20 आंतरराष्ट्रीय सामन्यात पराभूत झालेल्या सामन्यात सामनावीराचा पुरस्कार मिळवणारा वरुण चक्रवर्ती आता दुसरा खेळाडू आहे. यापूर्वी 2011 मध्ये इंग्लंडनं अॅडलेडच्या मैदानावर ऑस्ट्रेलियाविरुद्धचा T20 सामना जिंकला होता, परंतु त्या सामन्यात शेन वॉटसननं त्याच्या अष्टपैलू कामगिरीच्या जोरावर सामनावीराचा किताब जिंकला होता.

वरुण चक्रवर्तीच्या मालिकेत 10 विकेट्स :इंग्लंडविरुद्धच्या T20 मालिकेत वरुण चक्रवर्तीनं शानदार गोलंदाजी केली आणि तिन्ही सामन्यांमध्ये त्याची कामगिरी उल्लेखनीय ठरली. त्यानं पहिल्या सामन्यात तीन, दुसऱ्या सामन्यात दोन आणि तिसऱ्या सामन्यात 5 विकेट्स घेतल्या. आतापर्यंत त्यानं मालिकेत एकूण 10 विकेट्स घेतल्या आहेत. यासह, तो भारतात झालेल्या द्विपक्षीय T20 मालिकेत सर्वाधिक विकेट्स घेणारा भारतीय गोलंदाज बनला आहे.

हेही वाचा :