नवी मुंबई INDW vs WIW 2nd T20I Live Streaming : भारतीय महिला राष्ट्रीय क्रिकेट संघ विरुद्ध वेस्ट इंडिज महिला क्रिकेट संघ तीन सामन्यांच्या T20 मालिकेतील दुसरा सामना आज 17 डिसेंबर (मंगळवार) रोजी डॉ. डी वाय पाटील स्पोर्ट्स अकादमी, नवी मुंबई इथं संध्याकाळी 07:00 वाजता खेळवला जाईल. महिला T20 विश्वचषक 2024 मध्ये निराशाजनक कामगिरी केल्यानंतर आणि त्यानंतर ऑस्ट्रेलिया दौऱ्यावर व्हाईटवॉश भोगल्यानंतर भारतीय महिला क्रिकेट संघानं वेस्ट इंडिज महिला क्रिकेट संघाविरुद्धच्या तीन सामन्यांच्या मालिकेतील पहिल्या T20 सामन्यात शानदार पुनरागमन केलं आहे.
पहिला सामना भारतानं जिंकला : भारतीय महिलांनी पहिल्या T20 सामन्यात 4 बाद 195 धावा अशी भक्कम धावसंख्या उभारली. भारताची सलामीवीर स्मृती मानधनानं 33 चेंडूंत 7 चौकार आणि दोन षटकारांसह 54 धावांची शानदार खेळी केली. जेमिमाह रॉड्रिग्जनं 35 चेंडूत नऊ चौकार आणि दोन षटकारांच्या मदतीनं 73 धावा करत यजमान संघाला स्पर्धात्मक धावसंख्येपर्यंत नेलं. तर या धावसंख्येचा बचाव करताना तीतस संधूनं तीन, तर दीप्ती शर्मा आणि राधा यादवनं प्रत्येकी दोन गडी बाद केले. अनुभवी अष्टपैलू डिआंड्रा डॉटिननं 28 चेंडूत 52 धावांची जलद खेळी खेळली, त्यानंतर वेस्ट इंडिजचा संघ 7 बाद 146 धावांवर रोखला गेला. पाहुण्या संघानं एकतर्फी सामना 49 धावांनी गमावला.
दोन्ही संघांचा हेड-टू-हेड रेकॉर्ड : भारतीय महिला राष्ट्रीय क्रिकेट संघाने वेस्ट इंडिज महिला क्रिकेट संघाविरुद्ध एकूण 22 आंतरराष्ट्रीय क्रिकेट सामने खेळले आहेत. या 22 पैकी भारतानं 14 सामने जिंकून आघाडी मिळवली आहे, तर वेस्ट इंडिजनं 8 सामने जिंकले आहेत. भारतीय महिला संघानं यापुर्वी नोव्हेंबर 2019 मध्ये वेस्ट इंडिजसंघाविरुद्ध T20 मालिका जिंकली होती. आता पाच वर्षांनी पुन्हा भारताला मालिका विजयाची संधी मिळाली आहे.
भारत विरुद्ध वेस्ट इंडिज महिला संघातील दुसरा T20 सामना कधी आणि कुठं खेळला जाईल?
भारतीय विरुद्ध वेस्ट इंडिज महिला संघातील दुसरा सामना 17 डिसेंबर (मंगळवार) रोजी डॉ डी वाय पाटील स्पोर्ट्स अकादमी, नवी मुंबई इथं संध्याकाळी 7 वाजता सुरु होईल, ज्याची नाणेफेक संध्याकाळी 06:30 वाजता होणार आहे.