अमरावती :अमरावती जिल्ह्यात एकूण आठ विधानसभा मतदारसंघ आहेत. सर्वच विधानसभा मतदारसंघातील राजकारण नेहमीच चर्चेत राहिलंय. मात्र, अमरावती शहराचा अर्धा भाग आणि काही ग्रामीण भाग एकत्र करून तयार झालेला बडनेरा विधानसभा मतदारसंघ सर्वांचं लक्ष वेधून घेणारा मतदारसंघ आहे. या मतदारसंघात अपक्ष उमेदवार म्हणून विजयाची हॅट्ट्रिक साधणारे आमदार रवी राणा आता चौथ्यांदा आपला विजय कायम ठेवणार? की बडनेरा मतदारसंघात परिवर्तन होणार हे निवडणुकीच्या निकालानंतरच स्पष्ट होणार आहे.
बडनेरा मतदार संघाचा इतिहास :1962 मध्ये झालेल्या पहिल्या सार्वत्रिक निवडणुकीत काँग्रेसनं बडनेरा विधानसभा मतदारसंघ जिंकला. त्यावेळी पुरुषोत्तम देशमुख आमदार म्हणून निवडून आले होते. 1962 नंतर अवघ्या पाच वर्षांत बडनेरा विधानसभा मतदारसंघातील मतदारांनी काँग्रेसऐवजी रिपब्लिकन पार्टी ऑफ इंडियाला पाठिंबा दिला. 1967 च्या निवडणुकीत रिपब्लिकन पार्टी ऑफ इंडियाचे कृष्णराव श्रींगारे विजयी झाले. 1972 च्या निवडणुकीत मतदारांनी पुन्हा एकदा काँग्रेसच्या पुरुषोत्तम देशमुख यांना साथ दिली. 1978 मध्ये बडनेरामधून काँग्रेसचे मंगलदास यादव निवडून आले. काँग्रेसचे राम मेघे यांनी बडनेरा विधानसभा मतदारसंघाचं 1980 आणि 1985 मध्ये सलग दोन निवडणुकांमध्ये प्रतिनिधित्व केलं. मात्र, 1990 मध्ये शिवसेनेनं बडनेरा विधानसभा मतदारसंघातील काँग्रेसचं वर्चस्व संपुष्टात आणलं.
रवी राणांनी विजयाचा महामेरू कायम राखला :1990 च्या निवडणुकीत शिवसेनेचे प्रदीप वडनेरे हे बडनेरामधून विजयी झाले होते. त्यानंतर 1995 आणि 1999 अशा सलग दोन निवडणुकांमध्ये शिवसेनेचे ज्ञानेश्वर धाने यांनी बडनेरा विधानसभा मतदारसंघावर शिवसेनेचा भगवा फडकवला. बडनेरा विधानसभा मतदारसंघ हा 2004 मध्ये शिवसेनेचा बालेकिल्ला मानला जात होता, मात्र राष्ट्रवादीच्या सुलभा खोडके यांनी मोठा विजय मिळवला. 2009 च्या निवडणुकीत राजकारणात नवख्या असलेल्या रवी राणा यांनी सुलभा खोडके यांचा 18 हजार 771 मतांनी पराभव करून संपूर्ण अमरावती जिल्ह्याला धक्का दिला. पुढे 2014 आणि 2019 च्या निवडणुकीत रवी राणा यांनी आपल्या विजयाचा महामेरू बडनेरा विधानसभा मतदारसंघात कायम राखला.
राणांच्या विजयाची कहाणी :अमरावतीच्या विद्यमान आमदार सुलभा खोडके आणि राष्ट्रवादी काँग्रेसचे प्रदेश सरचिटणीस असणारे त्यांचे पती संजय खोडके या राजकारणातील अतिशय मुरब्बी नेत्यांनी आणि त्यांच्या बलाढ्य समर्थकांनी बडनेरा विधानसभा मतदारसंघात रवी राणा यांच्यासमोर हात टेकले. 2009 च्या निवडणुकीत रवी राणा यांचा खोडके समर्थकांशी जोरदार संघर्ष झाला होता.त्यावेळी पहिल्यांदा प्रचार कार्यालय जाळणं, एकमेकांच्या पदाधिकारी आणि कार्यकर्त्यांवर हल्ला चढवणं. महापालिकेत महापौरांच्या दालनात धिंगाणा घालणं असं सारं काही रवी राणा आणि त्यांच्या कार्यकर्त्यांनी केलं होतं. राणांचा धसका घेऊन खोडक्यांनी चक्क बडनेरा मतदारसंघालाच हात जोडले आणि 2019 ची निवडणूक सुलभा खोडके या काँग्रेसच्या उमेदवार म्हणून अमरावती विधानसभा मतदारसंघातून लढल्या आणि विजयी झाल्या. 2019 च्या निवडणुकीत राणा यांच्या कट्टर विरोधक असणाऱ्या सुलभा खोडके या बडनेरा विधानसभा मतदार संघात नव्हत्या, अशावेळी शिवसेनेचे माजी आमदार दिवंगत संजय बंड यांच्या पत्नी प्रीती बंड या भाजपा आणि शिवसेना युतीच्या उमेदवार म्हणून राणांविरुद्ध उभ्या ठाकल्या. रवी राणा यांनी प्रीती बंड यांचा 15 हजार 541 मतांनी पराभव करून सलग तिसऱ्यांदा बडनेरा मतदारसंघात आपलं नेतृत्व कायम राखलं.
राणांच्या विजयामागचं गणित :रवी राणा यांनी 2009 मध्ये पहिली विधानसभा निवडणूक लढवली. तेव्हा ते 24, 25 वर्षांचे होते. बडनेरा विधानसभा मतदारसंघात येणाऱ्या प्रत्येक घरात भेट देणारा एकमेव उमेदवार, अशी ओळख रवी राणा यांनी निर्माण केली. बडनेरा विधानसभा मतदारसंघात राणा यांनी मोठ्या प्रमाणात निधी आणला. आमदार झाल्यानंतर रवी राणा यांनी सलग पाच वर्षे मतदारसंघात खळबळ उडवून दिली. मतदारसंघात प्रत्येक दिवाळीला आमदार रवी राणा यांनी दिवाळीला किराणा सामान प्रत्येकाच्या घरी पोहोचवण्याचा अभिनव उपक्रम राबवला. त्यांनी विदर्भ दहीहंडी नावानं राजापेठ चौकात भव्य दहीहंडी स्पर्धा सुरू केली. दरवर्षी प्रसिद्ध चित्रपट कलाकार या दहीहंडीला उपस्थित असतात. विशेष म्हणजे अमरावती शहरातील सायन्स कोअर मैदानावर झालेल्या सामूहिक विवाह सोहळ्यात त्यांनी नवनीत राणा यांच्याशी विवाह केला. बडनेरा विधानसभा मतदारसंघात सर्वच जाती धर्माच्या लोकांशी रवी राणांची जवळीक आहे. 45 ते 50 हजारापर्यंत दलित मतदार बडनेरा मतदार संघात असून यापैकी अनेक मतदार हे रवी राणांशी आतापर्यंत तरी चांगले जुळले आहेत. विशेष म्हणजे कितीही संकटं आली, तरी शांत राहून निर्णय घेण्याची वृत्ती हा रवी राणा यांचा सर्वात मोठा प्लस पॉईंट आहे.
नवनीत राणांनी तयारी केली तर रवी राणांचं नुकसान : अमरावतीच्या माजी खासदार नवनीत राणा यादेखील अनुसूचित जातीसाठी राखीव असणारा दर्यापूर मतदारसंघातून भाजपाच्या उमेदवार म्हणून निवडणूक लढण्यास इच्छुक असल्याचं बोललं जातंय. नवनीत राणा या कुठल्याही मतदारसंघातून उमेदवार म्हणून निवडणूकीच्या रिंगणात उतरल्या तर याचा फटका निश्चितच बडनेरा मतदारसंघात आमदार रवी राणा यांना बसेल. कारण एकाच घरात खासदार आणि आमदार मतदारांनी नाकारलेत. रवी राणा यांची बाजू बडनेरा विधानसभा मतदारसंघात काहीशी मजबूत दिसत असताना नवनीत राणा यादेखील दर्यापूर किंवा राज्यातील कुठल्याही मतदारसंघातून उमेदवार म्हणून निवडणुकीच्या रिंगणात उतरल्या तर दोन ठिकाणी शक्तीपणास लावताना बडनेरात आमदार रवी राणा यांना निश्चितच फटका बसू शकतो.