संतोष देशमुख हत्या प्रकरण: "धनंजय मुंडे यांचं नाव डायरेक्ट...", नेमंक काय म्हणाले चंद्रशेखर बावनकुळे?

मस्साजोग गावचे सरपंच संतोष देशमुख यांच्या हत्या प्रकरणानं मंत्री धनंजय मुंडे हे चांगलेच अडचणीत सापडलेत. यावरच आता चंद्रशेखर बावनकुळे यांनी वेगळंच भाष्य केलय.

पुणे : बीडमधील मस्साजोग गावचे सरपंच संतोष देशमुख (Santosh Deshmukh Murder) यांची गेल्या महिन्यात निर्घृण हत्या करण्यात आली. या घटनेवरुन विरोधकांनी सरकारला धारेवर धरत रान उठवलंय. तसंच या प्रकरणात वाल्मिक कराड यांचं नाव आलं असून ते मंत्री धनंजय मुंडे यांचे विश्वासू असल्यानं मुंडे हे चांगलेच अडचणीत सापडलेत. यावरुन विरोधकांकडून मुंडे यांच्या राजीनाम्याची मागणी केली जात आहे. सत्ताधारी आमदारही यामध्ये काही कमी नाहीत. यावरच आता महसूल मंत्री चंद्रशेखर बावनकुळे यांनी प्रतिक्रिया दिलीय.

नेमकं काय म्हणाले चंद्रशेखर बावनकुळे? : विभागीय आयुक्त कार्यालय पुणे इथं आज (10 जाने.) चंद्रशेखर बावनकुळे यांच्या अध्यक्षतेखाली बैठकीचं आयोजन करण्यात आलं होतं. बैठकीनंतर प्रसार माध्यमांशी संवाद साधताना चंद्रशेखर बावनकुळे म्हणाले, "आपण वस्तूस्थितीवर गेलं पाहिजे. आज धनंजय मुंडे यांचं नाव डायरेक्टली किंवा इनडायरेक्टली तपासामध्ये कुठंही येत नाही. जेव्हा नाव तपासात येईल, तेव्हा आम्ही कोणालाही सोडणार नाही, असं मुख्यमंत्री म्हणालेत. या प्रकरणातील आरोपी कोर्टातून सुटणार नाही, यासाठी सरकार काम करतंय. योग्य तो तपास सुरू आहे. कोणत्याही प्रकरणात डायरेक्ट मंत्र्यावर आरोप करण्यापेक्षा वस्तूस्थिती वर बोललं पाहिजे. यात जर मंत्री दोषी असेल तर ते राजीनामा देतील."

कोणीही राजकारण करू नये : पुढं बावनकुळे म्हणाले, "मी स्वतः सुरेश धस यांना भेटलोय आणि उद्याही भेटणार आहे. या प्रकरणात राजकारण आमच्याकडून किंवा कोणाकडूनही झालं तर तपासाला वेगळं वळण मिळेल. आपल्या विरोधी पक्षाची आणि सर्वांची जबाबदारी आहे की, या प्रकरणामध्ये जागृत राहिलं पाहिजे. आरोपीला शिक्षा मिळावी यासाठी सगळ्यांनी एकजूटपणे काम केलं पाहिजे. या प्रकरणात कोणीही राजकारण करू नये. तसंच मला या प्रकरणात कोणावरही आरोप करायचा नाही. मात्र, आरोपीला मदत व्हायला नको", असंही ते म्हणाले.

हेही वाचा -