मुंबई - सिनेमाच्या पडद्यावर आजपर्यंत अनेक प्रेमकथा आपण पाहिल्या असतील. पुस्तकातूनही अशा सुंदर प्रेमकथा वाचल्या असतील. परंतु आज आम्ही तुम्हाला पडद्यावरच्या 'हिरो नंबर वन'ची खऱ्या खुऱ्या आयुष्यातील प्रेमकथा सांगणार आहोत. हा हिरो दुसरा तिसरा कोणी नसून गोविंदा आहे.
गोविंदा-सुनीताची प्रेमकहाणी - गोविंदाची पत्नी सुनीता आहुजानं एका मुलाखतीत सांगितलं होतं की तिच्या बहिणीचं लग्न गोविंदाच्या मामाशी झालं होते. गोविंदाचा मामा आनंद हे चित्रपट निर्माता आणि दिग्दर्शक होते. त्यावेळी सुनिता फक्त नववीत शिकत होती. याच लग्नात तिनं गोविंदाला पहिल्यांदा पाहिले, तर गोविंदा त्यावेळी कॉलेजच्या शेवटच्या वर्षात होता. सुनीताच्या जीजूनं म्हणजेच निर्माता आनंद यांनी तिला गोविंदाबद्दल सांगितलं होते की तो खूप साधा माणूस आहे. सुनीताचा जीजू असलेल्या आनंद यांनी दोघांनाही 'तन बदन' हा चित्रपट ऑफर केला पण सुनीताने तो नाकारला. त्यानंतर सुनीता या चित्रपटाच्या सेटवर गोविंदाला भेटायला येत असे आणि इथेच दोघंही एकमेकांना डेट करू लागले.