मुंबई - GOAT Movie :थलपथी विजय स्टारर 'गोट' (द ग्रेटेस्ट ऑफ ऑल टाइम) हा 5 सप्टेंबरला चित्रपटगृहांमध्ये प्रदर्शित झाला आहे. 'गोट'नं ॲडव्हान्स बुकिंगमध्ये धमाकेदार कमाई केली होती. आता हा चित्रपट या वर्षातील सर्वात मोठा तमिळ ओपनर ठरू शकतो, असं बोललं जात आहे. सॅकनिल्कच्या रिपोर्टनुसार, या चित्रपटानं रिलीजच्या पहिल्या दिवशी 44.42 कोटीची धमाकेदार कमाई केली आहे. 'द ग्रेटेस्ट ऑफ ऑल टाइम' या चित्रपटानं ॲडव्हान्स बुकिंगमध्ये 29.83 कोटी रुपयांची कमाई केली होती. या चित्रपटाचं चाहत्यांनामध्ये खूप क्रेझ आहे. 'गोट' चित्रपटानं कमल हासन स्टारर 'इंडियन 2'ला देखील मागे टाकले आहे.
'गोट' चित्रपटाची स्टार कास्ट : एजीएस एंटरटेनमेंटच्या बॅनरखाली निर्मित झालेला 'गोट' या चित्रपटाचं दिग्दर्शन व्यंकट प्रभू यांनी केलंय. या चित्रपटामध्ये विजय दुहेरी भूमिकेत आपला जलवा दाखवतोय. 'गोट' मध्ये विजय व्यतिरिक्त चंद्रशेखर, प्रभू देवा, प्रशांत, अजमल अमीर, स्नेहा, मीनाक्षी चौधरी आणि योगी बाबू यांच्याही महत्त्वाच्या भूमिका आहेत. दरम्यान 'इंडियन 2'नं रिलीजच्या पहिल्या दिवशी 25.6 कोटींची कमाई बॉक्स ऑफिसवर केली. आता थलपथी विजयच्या 'गोट'नं हा आकडा पार केला आहे. हा चित्रपट खूप वेगानं बॉक्स ऑफिसवर कमाई करेल असा अंदाज आता व्यक्त केला जात आहे. 'गोट' चित्रपट पाहण्यासाठी आता चित्रपटगृहांमध्ये खूप गर्दी पाहायला मिळत आहे.