मुंबई - Tabu Nagarjuna : सध्या तब्बू तिच्या आगामी 'औरों में कहाँ दम था' या चित्रपटामुळे चर्चेत आहे. या चित्रपटात ती बऱ्याच दिवसांनी अजय देवगणबरोबर स्क्रीन शेअर करणार आहे. यापूर्वी तब्बूचा 'क्रू' चित्रपट प्रदर्शित झाला होता. या चित्रपटानं रुपेरी पडद्यावर खूप कमाई केली होती. वयाच्या 52 व्या वर्षीही तब्बू आपल्या अभिनयानं चाहत्यांचं मन जिंकत आहे. तब्बू अनेकदा तिचे फोटो सोशल मीडियावर शेअर करत असते. दरम्यान एक काळ असा होता की तब्बू आणि नागार्जुन एकमेकांना डेट करत असल्याच्या बातम्या येत होत्या. आता नुकतंच तब्बूनं असं काही केलं आहे की, ज्यामुळे ही प्रेमकहाणी पुन्हा एकदा चर्चेत आली आहे.
नागा चैतन्यच्या फोटोवर तब्बूनं दिली प्रतिक्रिया : अलीकडेच 'फादर्स डे'च्या निमित्तानं नागा चैतन्यनं त्याचे वडील नागार्जुनबरोबरचा एक जुना फोटो त्याच्या इंस्टाग्रामवर शेअर केला होता. या फोटोत नागार्जुन पट्टेदार शर्टमध्ये अतिशय देखणा दिसत आहे. याशिवाय नागा चैतन्य त्याच्या खांद्यावर बसलेला दिसत आहे. यानंतर या फोटोवर तब्बूनं प्रेमाचा वर्षाव केला. तिनं फोटोवर बरेच हार्ट इमोजी पोस्ट केले. आता अनेक युजर्स तब्बूच्या प्रतिक्रियेबद्दल आश्चर्य व्यक्त करताना दिसत आहेत. नागा चैतन्यनं शेअर केलेला हा फोटो अनेकांना आवडत आहे. या फोटोवर अनेकजण कमेंट्स करू त्याचे आणि नागार्जुनचं कौतुक करताना दिसत आहेत.