मुंबई - Shaitaan Box Office Day 1 Collection : अजय देवगण, आर. माधवन आणि साऊथ अभिनेत्री ज्योतिका स्टारर 'शैतान'नं पहिल्या दिवशी बॉक्स ऑफिसवर जबरदस्त कमाई केली आहे. हा चित्रपट 8 मार्च रोजी आंतरराष्ट्रीय महिला दिनी प्रदर्शित झाला. बॉक्स ऑफिसवर या चित्रपटाचा क्रेझ आता पाहायला मिळत आहे. अजय, माधवन आणि ज्योतिका हे तिन्ही स्टार्स पहिल्यांदाच रुपेरी पडद्यावर एकत्र काम करत आहेत. हा चित्रपट बॉक्स ऑफिसवर प्रेक्षकांचे खूप मनोरंजन करत आहे. चित्रपटानं पहिल्या दिवशी किती कमाई केली आणि पहिल्या वीकेंडमध्ये चित्रपट किती कमाई करू शकतो हे जाणून घेऊया.
'शैतान'नं प्रेक्षकांचे लक्ष वेधून घेतलं :काळ्या जादूवर आधारित या चित्रपटाला यूए (U/A) प्रमाणपत्र मिळालं आहे. यामध्ये आर. माधवननं खलनायकाची भूमिका साकारली आहे. 'शैतान' चित्रपटाच्या ट्रेलरनं प्रेक्षकांना खूप आकर्षक केलं होतं. ट्रेलरमध्ये अजय, माधवन आणि ज्योतिका यांनी त्यांच्या चाहत्यांना हा चित्रपट पाहण्यास भाग पाडलं होतं. 'शैतान'नं रिलीजच्या पहिल्या दिवशी हिंदी पट्ट्यांमध्ये 25.70 टक्के ऑक्युपन्सी रेट नोंदवला आहे. आता सॅकनिल्कच्या रिपोर्टनुसार, 'शैतान'च्या पहिल्या दिवशीच्या कमाईबद्दल बोलायचं झालं तर, या चित्रपटानं बॉक्स ऑफिसवर 14.2 कोटीची कमाई केली आहे. आता हा चित्रपट रिलीजच्या दुसऱ्या दिवसात आहे. रिलीजच्या दुसऱ्या दिवशी हा चित्रपट धमाकेदार कमाई करेल अशी अपेक्षा केली जात आहे.