सलमान खान आणि महेश बाबू यांनी शेअर केला सोनू सूद स्टारर 'फतेह'चा दुसरा ट्रेलर

सलमान खान आणि महेश बाबू यांनी नुकताच सोनू सूद अभिनीत चित्रपट 'फतेह'चा दुसरा ट्रेलर शेअर केला आहे.

मुंबई :अभिनेता सोनू सूदच्या आगामी 'फतेह' चित्रपटाचा पहिला ट्रेलर डिसेंबरमध्ये प्रदर्शित झाला होता. या चित्रपटाचा पहिला ट्रेलर पाहिल्यानंतर अनेकजण चित्रपटाच्या रिलीजसाठी उत्सुक झाले होते. दरम्यान सोनूनं त्याच्या चित्रपटाचा दुसरा ट्रेलर प्रदर्शित करून चाहत्यांना एक सुंदर भेट दिली आहे. आज 7 जानेवारी रोजी 'फतेह' चित्रपटाचा ट्रेलर रिलीज करण्यात आला आहे. याशिवाय 'दबंग' स्टार सलमान खान आणि साऊथ अभिनेता महेश बाबूनं देखील 'फतेह' चित्रपटाचा दुसरा ट्रेलर आपल्या सोशल मीडिया हॅंडलवर शेअर केला आहे. 'भाईजान' आणि महेश बाबू यांनी सोशल मीडियावर 'फतेह'चा दुसरा ट्रेलर रिलीज केल्यानंतर चाहत्यांमध्ये पुन्हा खळबळ उडाली आहे.

सलमान खान आणि महेश बाबूनी दिल्या शुभेच्छा :सोनू सूद आणि महेश बाबू यांनी 2005 मध्ये आलेल्या तेलुगू ॲक्शन हिट 'अथाडु'मध्ये एकत्र काम केलं होतं. यानंतर या दोघांमध्ये चांगली मैत्री झाली होती. तसेच बॉलिवूड चित्रपट 'दबंग'मधील सलमान खान आणि सोनू सूदच्या जोडीनं सर्वांची मनं जिंकली होती. तसेच 'भाईजान' आणि सोनूमध्ये देखील चांगली मैत्री आहे. सलमान खाननं त्याच्या इंस्टाग्राम स्टोरीजवर 'फतेह'च्या ट्रेलरची लिंक शेअर केली आहे. यात त्यानं या चित्रपटामधील पोस्टर शेअर केले आहे. यामध्ये सोनू सूदचा चेहरा रक्तानं माखलेला दिसत आहे. ट्रेलर रिलीज करताना सलमाननं कॅप्शन लिहिलं, 'सोनू सूद तुझ्या चित्रपटासाठी शुभेच्छा'.

सोनू सूद (Mahesh babu - instagram)

सोनू सूद (Salman khan - instagram)

'फतेह'मधील सोनू सूदची भूमिका :दुसरीकडे, महेश बाबूनं 'फतेह' चित्रपटाच्या दुसऱ्या ट्रेलरची लिंक शेअर करत लिहिलं, 'एक ॲक्शन-पॅक्ड चित्रपट जो अप्रतिम आहे, माझा प्रिय मित्र सोनू सूदला खूप खूप शुभेच्छा. त्याची जादू पडद्यावर पाहण्यासाठी प्रतीक्षा करू शकत नाही.' तसेच आता सोनू सूदनं देखील सलमान खान आणि महेश बाबू यांचे आभार मानले आहेत. त्यानं त्याच्या पोस्टमध्ये लिहिल होतं, 'ट्रेलर लॉन्च केल्याबद्दल मी सुपरस्टार सलमान खान आणि महेश बाबू यांचा आभारी आहे.' सायबर क्राईमवर आधारित असलेल्या 'फतेह'मध्ये सोनू सूद एका माजी फॉर्मर ऑपरेशन ऑफिसरची भूमिका साकारत आहे, जो सायबर गुन्ह्यांविरुद्ध लढतो. या चित्रपटात सोनूबरोबर अभिनेत्री जॅकलिन फर्नांडिस, विजय राज आणि नसीरुद्दीन शाह हे कलाकार दिसणार आहेत. दरम्यान रिलीज झालेल्या दोन्ही ट्रेलरमध्ये जबरदस्त ॲक्शन पाहायला मिळत आहे. 'फतेह' हा चित्रपट 10 जानेवारी 2025 रोजी बॉक्स ऑफिसवर प्रदर्शित होणार आहे.

हेही वाचा :