मुंबई -Randeep Hooda : अंडरवर्ल्ड डॉन अमीर सरफराजची लाहोरमध्ये अज्ञात हल्लेखोरांनी गोळ्या घालून हत्या केली आहे. दरम्यान आयएसआयच्या सूचनेवरून अमीर सरफराजनं पाकिस्तानमध्ये कैदेत असलेल्या सरबजीत या भारतीय नागरिकाची हत्या केली होती. पाकिस्तानच्या कोट लखपत तुरुंगात अमीरनं सरबजीतचा पॉलिथिननं गळा आवळून आणि मारहाण करून हत्या केली होती. पंजाबच्या सरबजीतला पाकिस्तानात हेरगिरीच्या आरोपावरून पाकिस्तानी सैन्यानं पकडलं होतं. आता 'सरबजीत' चित्रपटात सरबजीतची भूमिका साकारणारा अभिनेता रणदीप हुड्डानं याप्रकरणी प्रतिक्रिया दिली आहे.
सरबजीतचा मारेकऱ्याचा मृत्यू : 2016 मध्ये प्रदर्शित झालेला 'सरबजीत' चित्रपटात सरबजीतनं पाकिस्तानच्या तुरुंगात आपले दिवस कसे घालवले आणि त्याचा कसा छळ झाला हे दाखवण्यात आलं होतं. सरबजीतची पाकिस्तानमधील तुरुंगात 2013 मध्ये हत्या करण्यात आली होती. आता सरबजीतच्या मारेकऱ्याच्या मृत्यूवर रणदीप हुड्डा म्हटलंय की, "सरबजीतवर चित्रपट करत असताना मला एक गोष्ट नेहमीच खटकत होती की, जेव्हा त्याला भारतात सोपवण्याची आणि त्याच्या कुटुंबीयांकडे परत आणण्याची चर्चा होत होती, तेव्हा त्याच्या मारेकऱ्याला तुरुंगात डांबण्यात का आलं होतं." दरम्यान तो लवकरच सरबजीतच्या मुलींना फोन करून त्यांच्याशी बोलणार असल्याचं त्यानं सांगितलं. याशिवाय त्यानं अमीर सरफराजला ज्यानं मारले, त्या अज्ञात व्यक्तींचे आभार मानले आहेत.