प्रयागराज - बॉलिवूड फिल्म इंडस्ट्रीमध्ये काम करत असताना पडद्यावरील भूमिकांमधून प्रेक्षकांना मोहिनी घालणारी अभिनेत्री ममता कुलकर्णी अध्यात्माच्या प्रवासात कुंभमेळ्यामध्ये दाखल झाली आहे. ममतानं आता 'माई ममता नंद गिरी' ही नवीन ओळख धारण करून आध्यात्मिक प्रवासाला सुरुवात केली असल्याचं उत्तर प्रदेश सरकारच्या निवेदनात म्हटलं आहे.
उत्तर प्रदेश सरकारने एका निवेदनात म्हटले आहे की, सध्या सुरू असलेल्या महाकुंभात कुलकर्णीने प्रथम किन्नर आखाड्यात 'संन्यास' घेतला आणि नंतर तिला त्याच आखाड्यात 'माई ममता नंद गिरी' असं नवीन नाव मिळालं.
'पिंडदान' केल्यानंतर, किन्नर आखाड्यानं तिचा पट्टाभिषेक केला. ५२ वर्षीय ममता कुलकर्णी शुक्रवारी महाकुंभ मेळ्यातील किन्नर आखाड्यात पोहोचली आणि तिनं किन्नर आखाड्याचे आचार्य महामंडलेश्वर लक्ष्मी नारायण त्रिपाठी यांची भेट घेतली आणि त्यांचे आशीर्वाद घेतले. तिनं अखिल भारतीय आखाडा परिषदेचे (एबीएपी) अध्यक्ष महंत रवींद्र पुरी यांचीही भेट घेतली.
ममता कुलकर्णीनं संगमच्या पवित्र पाण्यात स्नान केल्यानंतर शुक्रवारी गंगा नदीच्या काठावर स्वतःचे 'पिंडदान' केलं. रात्री ८ वाजण्याच्या सुमारास, किन्नर आखाड्यात वैदिक जप दरम्यान तिला महामंडलेश्वर म्हणून अभिषेक करण्यात आला.
किन्नर आखाडा २०१८ मध्ये स्थापन झाला होता आणि तो जुना आखाड्याअंतर्गत काम करतो. आखाडा हा हिंदू धार्मिक क्रम आहे, तर पिंडदान हा दिवंगत पूर्वजांना श्रद्धांजली वाहण्यासाठी केला जाणारा विधी आहे.
या प्रवेशासह, ममता कुलकर्णी आदरणीय महामंडलेश्वरांच्या श्रेणीत सामील झाली आहे. धार्मिक प्रवचन आणि सामाजिक उन्नतीमध्ये महत्त्वाची भूमिका बजावणाऱ्या आध्यात्मिक नेत्यांना दिले जाणारं 'महामंडलेश्वर' हे पद आहे.
संन्यास आणि पट्टाभिषेक केल्यानंतर, ममता म्हणाली की "हे माझे भाग्य आहे की, मी महाकुंभाच्या या पवित्र क्षणाची साक्षीदार होत आहे". तिनं सांगितलं की तिला संतांचे आशीर्वाद मिळत आहेत. तिनं २३ वर्षांपूर्वी कुपोली आश्रमात गुरु श्री चैतन्य गगन गिरी यांच्याकडून दीक्षा घेतली होती आणि आता ती पूर्ण संन्यास घेऊन नवीन जीवनात प्रवेश करत आहे, असे निवेदनात म्हटले आहे.
पत्रकारांशी बोलताना ममता कुलकर्णी म्हणाली, "मी २००० मध्ये माझी तपस्या सुरू केली आणि मी लक्ष्मी नारायण त्रिपाठी यांना माझे 'पट्टगुरु' म्हणून निवडले कारण आज शुक्रवार आहे... महाकाली (देवी काली) चा दिवस आहे.
"काल माझी महामंडलेश्वर बनवण्याची तयारी सुरू होती. पण आज माता शक्तीने मला लक्ष्मी नारायण त्रिपाठी निवडण्याची सूचना दिली कारण ती व्यक्ती अर्धनारेश्वराचे 'साक्षात्' रूप आहे. अर्धनारेश्वर माझा 'पट्टाभिषेक' करतो यापेक्षा मोठी पदवी दुसरी कोणती असू शकते,"असं ती म्हणाली.
ममता कुलकर्णी म्हणाली की तिला महामंडलेश्वर या पदवीसाठी परीक्षेला सामोरं जावं लागलं. "मी सर्व परीक्षा उत्तीर्ण झाल्यावर मला महामंडलेश्वराची 'उपाधी' मिळाली," असं ती म्हणाली.
ममतानं सांगितले की तिला या महाकुंभमध्ये येऊन खूप छान वाटत आहे. १४४ वर्षांनंतर अशा ग्रहांच्या स्थिती तयार होत आहेत. कोणताही महाकुंभ यासारखा पवित्र असू शकत नाही, असे ती पुढे म्हणाली. तिच्या 'दीक्षे'बद्दल साधूंच्या एका गटात राग आहे का असं विचारले असता ती म्हणाली, "अनेक लोक रागावले आहेत, माझे चाहतेही रागावले आहेत, त्यांना वाटते की मी बॉलिवूडमध्ये परत येईन. पण ते ठीक आहे.
"महाकाल आणि महाकालीच्या इच्छेला कोणीही डावलू शकत नाही. तो 'परम ब्रह्म' आहे. मी संगम येथे 'पिंड दान' चा विधी केला आहे," असं ती पत्रकारांना म्हणाली.
जूना आखाड्याचे महामंडलेश्वर स्वामी महेंद्रानंद गिरी, किन्नर आखाड्याचे आचार्य महामंडलेश्वर लक्ष्मी नारायण त्रिपाठी आणि इतर किन्नर महामंडलेश्वरांच्या उपस्थितीत, पाच महामंडलेश्वर - गिरनारी नंद गिरी, कृष्णानंद गिरी, राजेश्वरी नंद गिरी, विद्या नंद गिरी आणि नीलम नंद गिरी - यांना या कार्यक्रमात अभिषेक करण्यात आला.
ममता कुलकर्णी गेल्या दोन वर्षांपासून जुना आखाड्याशी संबंधित आहेत आणि गेल्या दोन-तीन महिन्यांपासून ती किन्नर आखाड्याशी संपर्कात आली आहे. त्रिपाठी यांनी कुलकर्णीचा किन्नर आखाड्याशी असलेला संबंध आणि तिच्या आध्यात्मिक प्रवासाच्या गोष्टीला दुजोरा दिला.
"ममता कुलकर्णी गेल्या एक-दोन वर्षांपासून आमच्या संपर्कात आहेत. त्या पूर्वी जूना आखाड्याशी जोडल्या गेल्या होत्या," लक्ष्मी त्रिपाठी म्हणाल्या. जेव्हा कुलकर्णी महाकुंभात आल्या तेव्हा त्यांनी सनातन धर्माची सेवा करण्याची इच्छा व्यक्त केली. द्रष्टा भक्त आणि परमात्मा यांच्यामध्ये उभे राहत नाहीत आणि म्हणूनच त्यांनी तिच्या इच्छेचा आदर केला. कुलकर्णी यांनी आता पवित्र विधी पूर्ण केले आहेत आणि लवकरच त्या अधिकृतपणे आखाड्यात सामील होतील, असे लक्ष्मी त्रिपाठी म्हणाल्या.
