मुंबई - Katrina Kaif Praises Maharaja : अभिनेत्री कतरिना कैफ शहरातील दैनंदिन व्यवहारापासून दूर राहून काही काळ सुट्टीचा आनंद घेण्यात मग्न आहे. यादरम्यान, तिनं 'मेरी ख्रिसमस' या तिच्या गाजलेल्या चित्रपटाचा सहकलाकार विजय सेतुपतीचा लेटेस्ट रिलीज 'महाराजा' चित्रपट पाहिला. हा चित्रपट सध्या नेटफ्लिक्सवर खूप पाहिला जात आहे. चित्रपट पाहिल्यानंतर कतरिना भारावून गेल्याचं तिच्या परीक्षणावरुन दिसतं. यामधील विजयच्या भूमिकेचं तिनं खूप कौतुक केलंय. 'महाराजा' चित्रपट पाहिल्यानंतर आपल्या सोशल मीडियावर याबद्दलची आपली प्रतिक्रिया तिनं पोस्टमधून कळवली आहे.
कतरिनानं तिच्या इन्स्टाग्राम स्टोरीजमध्ये 'महाराजा'विषयी आपलं मत व्यक्त केलंय. थ्रिलर चित्रपटाचं पोस्टर शेअर करताना कतरिनानं लिहिलं, "काय चित्रपट आहे... अतिउत्कृष्ट कथाकथन." उत्साह वाढवणाऱ्या शब्दांसह तिनं अभिनेता विजय सेतुपती आणि अनुराग कश्यप यांना टॅग केलं आणि दिग्दर्शक निथिलन समीनाथन यांचं जोरदार कौतुक केलं.
कतरिनाने साऊथ सुपरस्टार विजय सेतुपतीबरोबर 'मेरी ख्रिसमस' या चित्रपटात काम केलं होतं. या चित्रपटातील त्यांच्या केमिस्ट्रीची अनेकांनी प्रशंसा केली होती. श्रीराम राघवन दिग्दर्शित हा त्यांचा एकत्र रिलीज झालेला अखेरचा चित्रपट होता.
'मेरी ख्रिसमस'चे दिग्दर्शक श्रीराम राघवन यांनी याआधी खुलासा केला होता की विजयनं चित्रपटाच्या सेटवर नवीन घटक आणल्यामुळे कैफ सुरुवातीला फारशी कन्फर्टेबल नव्हती. परंतु ती जेव्हा सेटवर आली तेव्हा तिनं विजयच्या कल्पनांचा विचार केला, असं राघवन यांनी सांगितलं होतं.
"कतरिना खूप मेहनत करणारी अभिनेत्री आहे. तिला प्रत्येक गोष्टींचा तपशील बारकाईनं समजून घ्यायचा असतो. तिला सीन्स बद्दल अनेक प्रश्न निर्माण झालेले असतात आणि त्याचं उत्तर मिळेपर्यंत ती समाधानी नसते. विजयचं अगदी याच्या विरुद्ध आहे. तो संवादाबद्दल आपल्या काही सूचना करतो किंवा त्याच्या पात्राबद्दल सूचवतो आणि मी नेहमी अशा कल्पना स्वीकारण्यासाठी मनमोकळा असतो.", असं दिग्दर्शक राघवनं सांगितलं. असं असलं तरी, कतरिना आणि विजय यांच्यातील कॉमन गोष्टी शोधण्यात आणि शेवटी समजूत काढण्यात यश आलं.