मुंबई -Kartik Aaryan :अभिनेता कार्तिक आर्यनची झोळी सध्या चित्रपटांनी भरलेली आहे. 'चंदू चॅम्पियन' आणि 'भूल भुलैया 3' नंतर आता कार्तिक आर्यनचे नाव आणखी एका चित्रपटाशी जोडलं गेलं आहे. कार्तिक आता एका थ्रिलर चित्रपटात दिसणार आहे, ज्याचे दिग्दर्शन हिंदी चित्रपटसृष्टीतील निर्माते विशाल भारद्वाज करणार आहेत. कार्तिक आर्यन या चित्रपटात डॉन हुसैन उस्ताराची भूमिका साकारणार आहे. या चित्रपटाचं शीर्षक अद्याप ठरलेलं नाही. या चित्रपटाचे निर्माते साजिद नाडियादवाला आहेत. हा चित्रपट यापूर्वी सपना दीदींच्या नावानं बनवला जात होता, ज्यामध्ये दिवंगत अभिनेता इरफान खान आणि दीपिका पदुकोण दिसणार होते.
कार्तिक डॉन हुसैन उस्तराची भूमिका साकारणार :आता कार्तिकच्या या आगामी चित्रपटाची शुटिंग सप्टेंबर 2024 मध्ये सुरू होणार आहे. अंडरवर्ल्डमधील डॉन हुसैन उस्तारा असं एक नाव आहे, ज्याला दाऊद इब्राहिम हवा होता. डॉन हुसैन हा अंडरवर्ल्डच्या किंग विरोधात निर्भयपणे उभा राहिला होता. या चित्रपटाबाबत अद्यापही घोषणा झालेली नाही. मात्र, सोशल मीडियावर या चित्रपटाबद्दल बरीच चर्चा होत आहे. पहिल्यांदा कार्तिक एका डॉनच्या भूमिकेत रुपेरी पडद्यावर झळणार आहे. या शीर्षक नसलेल्या चित्रपटामध्ये मुख्य भूमिकेत कुठली अभिनेत्री दिसणार हे सध्या ठरलेलं नाही. मात्र लवकरच या चित्रपटाबाबत घोषणा होईल अशी अपेक्षा केली जात आहे.