'कल्की एडी 2898'च्या निर्मात्यांनी शेअर केलं नवीन पोस्टर, आज होईल रिलीज तारखेची मोठी घोषणा - kalki 2898 ad

Kalki 2898 AD New Poster : प्रभास अभिनीत 'कल्की एडी 2898' या चित्रपटामधील एक पोस्टर रिलीज करण्यात आलं आहे. आज या चित्रपटाबद्दल मोठी घोषणा होणार आहे.

मुंबई -Kalki 2898 AD New Poster :साऊथ सुपरस्टार प्रभास स्टारर 'कल्की एडी 2898' या चित्रपटाची वाट अनेकजण आतुरतेने पाहत आहेत. नुकताच या चित्रपटाचा रोमांचक टीझर प्रदर्शित करण्यात आला. अमिताभ बच्चन साकारत असलेली 'अश्वत्थाम्या'ची व्यक्तिरेखा हे या चित्रपटाचं प्रमुख आकर्षण आहे. बच्चनला या नव्या अवतारात पाहण्यासाठी स्वाभाविकपणे त्याचे चाहते आतुर झाले आहेत. नाग अश्विन दिग्दर्शित 'कल्की एडी 2898' या चित्रपटात अमिताभ बच्चनसह प्रभास, दीपिका पदुकोण, कमल हासन आणि दिशा पटानी महत्त्वाच्या भूमिकेत आहेत. 26 एप्रिल रोजी संध्याकाळी, 'कल्की एडी 2898' च्या निर्मात्यांनी एक टीझर रिलीज केला होता, ज्यामध्ये त्यांनी एक मोठी घोषणा करण्याचे आश्वासन दिलं होतं.

'कल्की एडी 2898' चित्रपटाबद्दल होणार आज घोषणा : 'कल्की एडी 2898' या चित्रपटाबद्दल आज संध्याकाळी 5 वाजता एक मोठी अपडेट येणार आहे. दरम्यान या चित्रपटाच्या निर्मात्यांनी एक नवीन पोस्टर रिलीज केलं आहे. एक मुखवटा घातलेला माणूस हातात शस्त्र घेऊन उभा आहे आणि त्याच्या वर एक एक विशेष डिझाईन असलेलं गोल चिन्ह आहे. पोस्टरची ही रचनाच चित्रपटाबद्दलचं कुतुहल वाढवण्याचं काम करतेय. हॉलीवूडपट आवडीने पाहणाऱ्या प्रेक्षकांसाठी हे चिन्ह नवं नाही. शेअर झालेल्या सदर पोस्टरवरची, 'फायनल काउंटडाउन, आज संध्याकाळी 5 वाजेपर्यंत पाहा.' ही वाक्यं चित्रपटाचं वेगळेपण ठसवण्याचा प्रयत्न करतायत, हे नक्की. चित्रपट निर्माते नाग अश्विन यांनी आगामी सायन्स फिक्शन 'कल्की 2898 एडी'ची घोषणा केल्यापासून हा चित्रपट खूप चर्चेत होता.

'कल्की एडी 2898' रिलीज डेट बदलू शकते : 'कल्की एडी 2898' या चित्रपटावर बऱ्याच दिवसांपासून काम सुरू आहे. हा चित्रपट बॉक्स ऑफिसवर 9 मे 2024 रोजी प्रदर्शित होणार असल्याची चर्चा होती. मात्र सध्या या चित्रपटाच्या प्रदर्शनाची तारीख पुढे ढकलल्याच्या बातम्या समोर येत आहेत. याबद्दल अद्याप काहीही घोषणा करण्यात आलेली नाही. याआधी 'कल्की एडी 2898' मकर संक्रांतीच्या काही दिवस आधी म्हणजे 12 जानेवारी 2024 रोजी रिलीज होणार होता. याच तारखेला 6 साऊथ चित्रपट प्रदर्शित झाले होते. त्यामुळे या चित्रपटाची रिलीज डेट बदलून 9 मे करण्यात आली होती. या चित्रपटाच्या नेमक्या रिलीज डेटचं सस्पेन्स आज संपण्याची शक्यता आहे.

हेही वाचा :