मुंबई - सलमान खानचे जवळचे मित्र राष्ट्रवादी काँग्रेस पक्षाचे नेते बाबा सिद्दिकी यांची 12 ऑक्टोबर 2024 रोजी काही अज्ञात लोकांनी हत्या केली होती. त्यानंतर बॉलिवूड सुपरस्टार सलमान खानची सुरक्षा कडक करण्यात आली आहे. सलमान खानला यापूर्वीच गँगस्टर लॉरेन्स बिश्नोईकडून हत्येची धमकी मिळाली आहे. काही महिन्यापूर्वी त्याच्या मुंबईतील राहत्या घराबाहेर काही बंदुकधाऱ्यांनी गोळीबारही केला होता. त्यानंतर सलमान खानच्या सुरक्षेत वाढ करण्यात आली होती.
'सिकंदर' वेळेत पूर्ण करण्याचा सलमानचा निर्धार
बिश्नोई गँग कडून सलमान खानला हत्येची धमकी मिळाल्यानंतर त्याच्या सुरक्षेत वाढ करण्यात आली आहे. सध्या तो 'सिकंदर' या चित्रपटाचं शूटिंग करत आहे. सध्याच्या वातावरणात न डगमगता शूटिंग सुरू ठेवण्याचा निर्धार सलमाननं केला आहे. त्यामुळे आता सेटवर सुरक्षा सुनिश्चित करण्यासाठी अतिरिक्त सुरक्षा प्रोटोकॉल ठेवण्यात आले आहेत.
सलमानच्या सुरक्षेत वाढ
काही काळापासून वाय-प्लस सुरक्षेखाली असलेल्या खानला त्याच्या संरक्षणासाठी आणखी सुरक्षा कर्मचारी तैनात करण्यात आले आहेत. अलीकडील अहवालानुसार, आणखी आठ ते दहा सशस्त्र पोलीस अधिकारी त्याच्या सुरक्षेच्या पथकात सामील झाले आहेत. मुंबई पोलिसांनी सलमान खानच्या निवासस्थानी, गॅलेक्सी अपार्टमेंट्स येथे एक कमांड सेंटर देखील स्थापन केले आहे, जिथे कोणत्याही संशयास्पद हालचालींवर नजर ठेवण्यासाठी एआय-चालित पाळत ठेवणारे कॅमेरे बसवले आहेत. अनधिकृत प्रवेशास प्रतिबंध करण्यासाठी, त्याच्या निवासस्थानाभोवती बॅरिकेड्स लावण्यात आले आहेत. चाहत्यांना सेल्फी घेण्यापासून किंवा मोठ्या संख्येने एकत्र येण्यापासून प्रतिबंधित केले आहे. याव्यतिरिक्त, त्याच्या पनवेल फार्महाऊसवर समान सुरक्षा उपाय लागू केले गेले आहेत, सर्व ठिकाणी त्याचे रक्षण केले आहे.
'सिकंदर' कधी पूर्ण होणार ?
मिळालेल्या माहितीनुसार सलमानला धमक्या वाढल्या असूनही, अतिरिक्त सुरक्षा उपायांसह 'सिकंदर'साठी शूटिंग सुरू ठेवण्यात येणार आहे. सुरक्षेची चिंता असूनही, सलमान खान सिकंदरच्या शूटिंगसाठी जोर देत आहे. प्रॉडक्शनच्या जवळच्या लोकांकडून समजत की शूटिंगच्या वेळापत्रकात किरकोळ स्वरुपाचे बदल करण्यात आले असले, तरी चित्रपट वेळेत पूर्ण करण्यासाठी टीम प्रयत्न करत आहे. या चित्रपटाचं शूटिंग नोव्हेंबर अखेरीस अथवा डिसेंबरपर्यंत पूर्ण होईल अशी अपेक्षा होती. परंतु सध्या बदलेल्या परिस्थितीमुळे हे काम जानेवारीपर्यंत वाढू शकते.
बाबा सिद्दीकी यांच्या अंत्यसंस्काराला उपस्थित राहण्याच्या सलमान खानच्या निर्णयामुळे असं म्हटलं जातंय की, 'सिकंदर'चं शूटिंग आणखी काही काळ लाबू शकतं. 'सिकंदर' हा चित्रपट 2025 च्या ईदला रिलीज करण्याचा निर्मत्यांचे नियोजन आहे. या चित्रपटात सलमान शिवाय रश्मिका मंदान्ना, सत्यराज, प्रतीक बब्बर, शर्मन जोशी आणि काजल अग्रवाल यांच्या प्रमुख भूमिका आहेत.
