पुन्हा एका नव्या आजारानं काढलं डोकं वर; दिल्लीत आढळला जपानी एन्सेफलायटीसचा पहिला रुग्ण, देशभर खळबळ

देशाच्या राजधानीत जपानी एन्सेफलायटीसचा पहिला रुग्ण आढळल्यानं मोठी खळबळ उडाली आहे. हा रुग्ण नेपाळमधून उत्तर प्रदेशमार्गे भारतात आला होता.

नवी दिल्ली :दिल्लीत जपानी एन्सेफलायटीसचा पहिला रुग्ण आढळल्यानं आरोग्य विभागात मोठी खळबळ उडाली आहे. दिल्ली महानगरपालिकेच्या आरोग्य विभागानं (एमसीडी) सगळ्या जिल्हा आरोग्य अधिकारी आणि साथरोग विशेषज्ञांना या आजाराबाबत अलर्ट केलं आहे. जपानी एन्सेफलायटीसचा प्रसार रोखण्यासाठी जनजागृती मोहीम सुरू करण्याचे निर्देश देण्यात आले आहेत. यासोबतच डास नियंत्रणासाठी पावलं उचलण्याच्या सूचनाही देण्यात आल्या.

दिल्लीत आढळला जपानी एन्सेफलायटीसचा पहिला रुग्ण :जपानी एन्सेफलायटीस या तापानं पहिला रुग्ण आढळल्यानं मोठी खळबळ उडाली. ही पीडित व्यक्ती दिल्लीच्या पश्चिम विभागातील बिदापूरमधील रहिवाशी आहे. दिल्ली महापालिकेनं पीडित रुग्णाच्या घराजवळील नागरिकांचीही तपासणी केली आहे. महापालिकेच्या अधिकाऱ्यांनी दिलेल्या माहितीनुसार, तपासणीअंती रुग्ण मूळचा नेपाळचा असल्याचं समोर आलं. नुकताच ही रुग्ण महिला नेपाळहून उत्तर प्रदेशमार्गानं भारतात परतली. मात्र परत येताच ही महिला आजारी पडल्यानंतर या महिलेला जपानी एन्सेफलायटीस असल्याचं उघड झालं. उपचारानंतर महिला रुग्णाला डिस्चार्ज देण्यात आला.

उत्तर प्रदेश आणि बिहारमध्ये एन्सेफलायटीसचे रुग्ण :उत्तर प्रदेश आणि बिहार या राज्यात जपानी एन्सेफलायटीसचे रुग्ण असल्याची माहिती पुढं आली आहे. बिहार आणि उत्तर प्रदेशात या आजाराची रुग्ण आढळतात. गेल्या वर्षीही एलएनजेपी रुग्णालयात तीन रुग्णांना दाखल करण्यात आलं. मात्र यावेळी जपानी एन्सेफलायटीस या विषाणूचा संसर्ग दिल्लीपर्यंत पोहोचला. या विषाणूंचा संसर्ग टाळण्यासाठी मच्छरदाणी वापरणं चांगलं असल्याचं तज्ज्ञ डॉक्टरांचं मत आहे. हा संसर्ग पसरवणारा क्युलेक्स डास रात्री चावत असल्याची माहितीही यावेळी देण्यात आली. याबाबत बोलताना सफदरजंग हॉस्पिटलच्या कम्युनिटी मेडिसिनचे प्रमुख जुगल किशोर म्हणाले की, जपानी एन्सेफलायटीस विषाणू उत्तर प्रदेश आणि बिहार आढळून येतो. रुग्णाच्या प्रवासामुळे या आजाराचा संसर्ग दिल्लीपर्यंत पसरला. हा संसर्ग डासांमुळे पसरला, असंही त्यांनी नमूद केलं.

काय आहेत जपानी एन्सेफलायटीसची लक्षणं आणि धोका : जपानी एन्सेफलायटीस हा धोकादायक विषाणूजन्य संसर्ग आहे. हा संसर्ग डासांद्वारे पसरतो. या संसर्गाचा मेंदूवर परिणाम होतो. हा आजार संक्रमित डासांच्या चाव्याव्दारे पसरतो. आजाराची लक्षणं सौम्य असतात. यात ताप, डोकंदुखी आणि उलट्या अशी लक्षणं आढळून येतात. मात्र काही गंभीर प्रकरणात मेंदूला सूज येणं, फेफरं येणं आणि कोमा जाण्यासारख्या घटनाही घडू शकतात, अशी माहिती तज्ज्ञांनी दिली. इतर न्यूरोलॉजिकल लक्षणं विशेषतः मुलांमध्ये अधिक सामान्य आहेत. स्वच्छतेचा अभाव आणि डासांची उत्पत्ती झपाट्यानं होणाऱ्या परिसरात या आजाराचा धोका जास्त आहे. उन्हाळा आणि पावसाळ्यात हा रोग पसरण्याची शक्यता असते. जपानी एन्सेफलायटीसचा मेंदूवर गंभीर परिणाम होऊ शकतो. त्यामुळे श्रवणशक्ती कमी होणं, शरीराच्या एका भागात कमकुवतपणा आदी समस्या होऊ शकतात. डासांच्या उत्पतींवर नियंत्रण करुन स्वच्छता राखल्यास हा धोकादायक आजार टाळता येऊ शकतो, असं आरोग्य तज्ज्ञांचं मत आहे.

कसा रोखावा जपानी एन्सेफलायटीस :हा गंभीर आजार रोखण्यासाठी दोन डोसची लस आहे. याचा पहिला डोस बाळ 9 महिन्यांच्या वयात असताना दिला जाते. तर दुसरा डोस 16-24 महिन्यांच्या वयात दिला जाते. ही लस मुलांना जपानी एन्सेफलायटीस आणि त्याच्या गंभीर धोक्यांपासून वाचवण्यास मदत करते.

हेही वाचा :