കെഎസ്‌ആർടിസി ബസില്‍ പിറന്ന കുഞ്ഞിന് പേരിട്ടു - BABY BORN IN KSRTC

പ്രസവം പകുതി ഘട്ടത്തിലെത്തി നിൽക്കുമ്പോൾ അമല ആശുപത്രിയിലെ ഡോക്‌ടറും നഴ്‌സുമാരും ചേർന്നാണ് ബസിനുള്ളിൽ വച്ച് കുഞ്ഞിനെ പുറത്തെടുത്തത്.

തൃശൂർ: തൃശൂരിൽ കെഎസ്ആർടിസി ബസിൽ പിറന്ന കുഞ്ഞിന് മാതാപിതാക്കൾ 'അമല' എന്ന് പേരിട്ടു. അമല ആശുപത്രിയിലെ ഡോക്‌ടർമാരും നഴ്‌സുമാരും ചേർന്ന് പ്രസവം എടുക്കുകയും ശുശ്രൂഷിക്കുകയും ചെയ്‌തതിന്‍റെ ഓർമയ്ക്കായാണ് പെൺകുട്ടിക്ക് മാതാപിതാക്കൾ അമലയെന്ന പേര് നൽകിയത്. ആശുപ്രതിയിലെ ചികിത്സയ്ക്കു ശേഷം കുഞ്ഞുമായി ദമ്പതികൾ ഇന്നലെ നാട്ടിലേയ്ക്ക് മടങ്ങി.

അമല ആശുപത്രിയിലെ ഇരുവരുടെയും ചികിത്സ പൂർണമായും സൗജന്യമായിരുന്നു. ആശുപത്രിയിൽ നിന്ന് ലഭിച്ച സ്നേഹവും പരിചരണവും മറക്കാന്‍ ആവാത്തതാണെന്നും അതിനാലാണ് ആശുപത്രിയുടെ പേര് തന്നെ മകൾക്ക് നൽകിയതെന്നും മാതാവ് പറഞ്ഞു. അമല ആശുപത്രിയിൽ നടന്ന ലളിതമായ യാത്രയയപ്പ് ചടങ്ങിൽ ആശുപത്രിയുടെ സ്നേഹോപഹാരം ഡയറക്‌ടർ ഫാ.ജൂലിയസ് അറയ്ക്കൽ കൈമാറി.

കഴിഞ്ഞ മെയ്‌ 29നാണ് ഭർത്താവിനൊപ്പം യാത്ര ചെയ്യുന്നതിനിടെ യുവതി കെഎസ്‌ആർടിയിൽ പ്രസവിച്ചത്. തൃശൂരിൽ നിന്നും തൊട്ടിപ്പാലം വരെ പോകുന്ന കെഎസ്ആർടിസി ബസിലാണ് യുവതി പ്രസവിച്ചത്. ബസ് തിരിച്ച് അമല ആശുപത്രിയിലെ അത്യാഹിത വിഭാഗത്തിന് മുന്നിലേക്ക് എത്തിക്കുകയായിരുന്നു.

ആശുപത്രിയിലേക്ക് എത്തിക്കുമ്പോഴേക്കും പ്രസവം പകുതി ഘട്ടത്തിലെത്തിയിരുന്നു. തുടർന്ന് ആശുപത്രിയിലെ ഡോക്‌ടറും നഴ്‌സുമാരും ചേർന്ന് ബസിനുള്ളിൽ വച്ച് തന്നെ കുഞ്ഞിനെ സുരക്ഷിതമായി പുറത്തെടുക്കുകയായിരുന്നു.